Local Property News | Posted by Aye Myat Thu
ရန်ကုန်တိုင်းဒေသကြီးအတွင်း မြရိပ်ညိုဟိုတယ်ဝင်းအတွင်း၌ တည်ဆောက်မည့် Yangon New World အဆင့်မြင့်စီမံကိန်းကို တရုတ်ပြည်သူ့သမ္မတနိုင်ငံယူနန်ပြည်နယ်အစိုးရအဖွဲ့မှ ဒုတိယဝန်ကြီးချုပ် မစ္စတာ He Bao Xiang နှင့် စီးပွားရေးပညာရှင်များ လာရောက်ကြည့်ရှုလေ့လာခဲ့သော်လည်း ယင်းစီမံကိန်းနှင့်ပတ်သက်၍ မည်သည့်ခွင့်ပြုချက်မှ မရရှိသေးကြောင်း ဗဟန်းမြို့နယ် မဲဆန္ဒနယ်အမှတ်(၂)မှ တိုင်းဒေသကြီး လွှတ်တော်ကိုယ်စားလှယ်ဦးသောင်းထွဋ်က ပြောသည်။
''အခု လောလောဆယ်တော့ ဒီစီမံကိန်းကိုတားထားတယ်။ ဆောက်လုပ်မှုနဲ့ပတ်သက်လို့လည်း ဘာတခုမှ ခွင့်ပြုချက် မရသေးဘူး။ တရုတ်ပြည်ယူနန်က ဒုတိယဝန်ကြီးချုပ်နဲ့ စီးပွားရေးပညာရှင်တွေ လာရောက်တာက လည်း စီမံကိန်းပုံစံကိုလာကြည့်တာပါ။ ကြည့်လည်း ဘာမှဖြစ်လာမှာမဟုတ်ပါဘူး''ဟု ဦးသောင်းထွဋ်က ဆိုသည်။
ယင်းစီမံကိန်းသည် ပတ်ဝန်းကျင်ပြည်သူများ၏ ထောက်ခံချက်မှတ်တမ်းများ ရယူခြင်းမရှိခဲ့သလို စည်ပင်သာယာရေးကော်မတီသို့ တင်ပြထားသည့်အဆင့်သာရှိပြီး တရားဝင်ခွင့်ပြုချက်မရသေး ကြောင်း ၎င်းက ပြောသည်။
''ကျွန်တော်ကတော့ ပြောပိုင်ခွင့်မရှိပေမဲ့ ဥက္ကဋ္ဌကြီးပြောတဲ့ သတင်းတွေမှာပါတဲ့အတိုင်းပါပဲ''ဟု ဇေကမ္ဘာ ကုမ္ပဏီ မြရိပ်ညိုဟိုတယ်ဝင်းစီမံကိန်မှ ဒါရိုက်တာကိုထွန်းဝင်းဟန်က ပြောသည်။
အမေရိကန်ဒေါ်လာ သန်း ၅ဝဝ ရင်းနှီးမြှုပ်နှံပြီး အကောင်အထည်ဖော်မည့် ရန်ကုန်မြို့၏ အကြီးဆုံးစီမံကိန်း တခုဖြစ် လာမည့် Yangon New World စီမံကိန်းကို မြန်မာနိုင်ငံ ရင်းနှီးမြှုပ်နှံမှုကော်မရှင်၏ ခွင့်ပြုချက်ရရှိပါက အမြန်ဆုံးအကောင် အထည်ဖော်ဆောင်ရွက်မည်ဖြစ်ပြီး စီမံကိန်းမြေ ၁၄ ဧကအပေါ်တွင် ဈေးဝယ်စင်တာများ၊ လူနေအိမ်များ၊ ကြယ်ငါးပွင့်အဆင့်ဟိုတယ်များ ပါဝင်မည်ဖြစ်ကြောင်း သိရသည်။
'' စီမံကိန်းနဲ့ပတ်သက်တဲ့ ရင်းနှီးမြှုပ်နှံမှုကို အခုလောလောဆယ်စိစစ်နေပါ တယ်''ဟု မြန်မာနိုင်ငံ ရင်းနှီးမြှုပ်နှံမှု ကော်မရှင်မှ တာဝန်ရှိသူတဦးက ပြောသည်။
တရုတ်နိုင်ငံ China State Construction Engineering Corporation နှင့် ဇေကမ္ဘာကုမ္ပဏီတို့ ပူးပေါင်းဆောင်ရွက်မည့်အဆိုပါစီမံကိန်းတွင် တရုတ်ကုမ္ပဏီက ၆ဝ ရာခိုင်နှုန်း၊ ဇေကမ္ဘာကုမ္ပဏီမှ ၄ဝ ရာခိုင်နှုန်း ပါဝင်ကြကြောင်း သိရသည်။
'' ဒီမြရိပ်ညိုဟိုတယ်နေရာက တပ်မတော်ပိုင်ဖြစ်ပြီး တပ်မတော်က ဇေကမ္ဘာကုမ္ပဏီကို နှစ်ပေါင်း ၇ဝ ငှားလိုက် တယ်။ ၂ဝဝ၉ ခုနှစ်ကတည်းက တနှစ်ကိုဘယ်လောက်နဲ့ ငှားတယ်ဆိုတာတော့ မသိဘူး။ ပြီးတော့ ဆောက် လုပ်မယ့်နေရာနားမှာ ရေဂါလန်ပေါင်း သန်း ၂ဝ ကျော်တဲ့ ရေလှောင်ကန်ကြီးလည်းရှိတယ်။ နောက်ပြီးတော့ အင်္ဂလိပ်ခေတ်က မြို့တော်ဝန်နေထိုင်သွားတဲ့ အိမ်ရာအချို့လည်း ဖြိုချခဲ့တာလည်းရှိတယ်''ဟု ရွှေတောင်ကြား ၂ ရပ်ကွက်နေ ဦးဝင်းဗိုလ်က ပြောသည်။
အဆိုပါ ရေလှောင်ကန်ကြီးကို ၁၉၂၅-၁၉၂၆ ခုနှစ်တွင် တည်ဆောက်ပြီး RC ကွန်ကရစ်ဖြစ်ကာ ရေဂါလန်ပေါင်း သန်း ၂ဝ ကို ရန်ကုန်မြို့အတွင်း အနောက်ပိုင်းခရိုင်နှင့် မြောက်ပိုင်းခရိုင်အတွင်းရှိ လူနေရပ်ကွက်များသို့ အဓိကရေပေးဝေနေကြောင်း သိရသည်။
Credit: News Watch
