ဂိုဒေါင်တွေ အငှားဖြစ်နေ

လက်ရှိ စက်မှုဇုန်ဈေးကွက် အခြေအနေမှာ ဂိုဒေါင်အငှားက ပိုဖြစ်နေပြီး အရောင်းအဝယ် ဈေးကွက်မရှိသလောက် ရှားပါးနေတယ်လို့ အိမ်ခြံမြေအကျိုးဆောင်တွေဆီက သိရပါတယ်။

စက်မှုဇုန်နယ်မြေတွေမှာ ဂိုဒေါင် အငှားတွေမှာလည်း ဈေးကောင်းနေဆဲဖြစ်ပြီး အငှားဈေးကွက် (1Sqft) ကျပ်သိန်း (၃၀၀)နဲ့ သိန်း (၃၅၀)ကြားရှိပြီးတော့ လက်ရှိအငှားပိုဖြစ်နေတာကတော့ လှိုင်သာယာရော၊ ရွှေလင်ဗန်းမှာရော ရွှေပြည်သာမှာပါ အငှားပိုဖြစ်နေပါတယ်။

• 
• 

လှိုင်သာယာနဲ့ ရွှေလင်ဗန်းမှာဆိုရင် မြေကွက်တွေလည်း အငှားဖြစ်နေပြီးတော့ (1Sqft) ကို တစ်လကို (၂၅)သိန်း၊ သိန်း (၃၀)လောက်အထိ ပေါက်ဈေးရှိနေတယ်လို့ သိရပါတယ်။ လှိုင်သာယာစက်မှုဇုန်မှာ (၇)ခုအနက် (၁)နဲ့ (၂)မှာသာ အငှားပိုဖြစ်နေပြီး ကပ်လျက်မှာရှိတဲ့ အနော်ရထာ၊ ရွှေသံလွင်၊ မြစိမ်းရောင်မှာလည်း အငှား ရှိနေပါတယ်။ စက်မှုဇုန် မြေဈေးတွေမှာ အရောင်း အဝယ် မကောင်းပေမဲ့ ဈေးမှာ အတက်သာ ရှိပါတယ်။ ' လက်ရှိမှာ အရောင်းအဝယ်က မရှိဘူး၊ ဂိုဒေါင်က ပိုပြီး ငှားကြတယ်၊ မြေကွက်တွေလဲ အငှားရှိပါတယ်၊ အရောင်းသာ မရှိတာ ဈေးကတော့ မကျဘူး ' လို့ စက်မှုဇုန် အရောင်းအဝယ် အငှား မင်းမဟာ Real Estate Service မှ ကိုမင်းထက်အောင်က ပြောပါတယ်။ လက်ရှိ အရောင်းဈေးကွက်မှာဆို (၈၀)ရာခိုင်နှုန်းလောက်အထိ အရောင်းကျသွားခဲ့ပြီး ဈေးတွေမှာ မြင့်တက်နေဆဲ ဖြစ်ပါတယ်။ လှိုင်သာယာ စက်မှုဇုန်မှာဆိုရင် တစ်ဧကကို သိန်း (၈၀၀၀)ပေါက်ဈေးရှိပြီးတော့ ရွှေလင်ဗန်းမှာ တစ်ဧကကို သိန်း (၅၀၀၀) ပေါက်ဈေး ရှိနေပါတယ်။

' အရောင်းအဝယ်ကျတာတော့ ကြာပြီ၊ မိုးတွင်းဆိုတော့ ပိုပြီးမဖြစ်ဘူး၊ (၂)လ (၃)လလောက် ကြာပြီဖြစ်တယ်၊ လာကြည့်တဲ့ လူတွေပဲရှိတယ်၊ ဝယ်မယ်ဆိုရင်လဲ မိုးဘက်ဆိုတော့ လာကြည့်ပြီး နွေဘက်မှသာ အဝယ်ရှိတယ် ' လို့ စက်မှုဇုန်အိမ်ခြံမြေအကျိုးဆောင်တွေဆီက သိရပါတယ်။ အငှားဈေးကွက်မှာဆို တစ်လကို (၂)လခါ (၃)ခါလောက် ဂိုဒေါင်အငှားတွေရှိနေပြီး မြေအငှားတွေလည်း အနည်းငယ် ရှိနေပါတယ်။ လက်ရှိစက်မှုဇုန်နယ်မြေတွေမှာ အငှားပိုင်းကသာ ဦးဆောင်နေပါတယ်။

လက်ရှိမှာ အရောင်းအဝယ်က အေးစက်နေပေမဲ့ ရန်ကုန်တိုင်းအတွင်း ဖော်ဆောင်ဖို့ရှိနေတဲ့ စက်မှုဇုန်စီမံကိန်းသစ်တွေကြောင့် အားကောင်းလာနိုင်ပြီး အမှန်တကယ် လုပ်ကိုင်ခြင်းမပြုတဲ့ မြေဧရိယာတွေကို အရေးယူသိမ်းဆည်းမယ်ဆိုတဲ့ စကားကြောင့် တကယ်လုပ်မယ့်သူတွေ ငှားရမ်းလာနိုင်တာနဲ့အမျှဈေးကွက်ပြန်ဖြစ်ထွန်းလာနိုင်တယ်လို့ အကျိုးဆောင်တွေ ခန့်မှန်းထားပါတယ်။

Credit: The Kumudra