ဆော်ဒီတွင် လူ့သမိုင်းတလျှောက် အကြီးမားဆုံး နေစွမ်းအင်စီမံကိန်းကြီးကို ကန်ဒေါ်လာ ၂၀၀ ဘီလီယံအကုန်ကျခံတည်ဆောက်ရန် SoftBank နှင့် နားလည်မှုသဝဏ်လွှာ လက်မှတ်ရေးထိုး

ဆော်ဒီအာရေးဗီးယားနိုင်ငံတွင် လူ့သမိုင်းတလျှောက် အကြီးမားဆုံး နေစွမ်းအင်စီမံကိန်းကြီးကို ကန်ဒေါ်လာ ၂၀၀ ဘီလီယံ အကုန်အကျခံတည်ဆောက်ရန် SoftBank နှင့် ဆော်ဒီအာရေးဗီးယားအကြား နားလည်မှုသဝဏ်လွှာ လက်မှတ်ရေးထိုးလိုက်ကြောင်း အရှေ့အလယ်ပိုင်းအခြေစိုက် အိမ်ခြံမြေသတင်း
ဝက်ဘ်ဆိုက်တစ်ခုတွင် ဖော်ပြသည်။

SoftBank တည်ထောင်သူ မာဆာယိုရှီဆန်နှင့် ဆော်ဒီ၏ နန်းလျာ အိမ်ရှေ့မင်းသား မိုဟာမက် ဘင် ဆယ်လ်မန်တို့ နယူးယောက်တွင် တွေ့ဆုံကာ လက်မှတ်ရေးထိုးခဲ့ကြခြင်း ဖြစ်သည်။

ကမ္ဘာပေါ်တွင် ရေနံစိမ်းအကြီးမားဆုံး တင်ပို့သည့်နိုင်ငံဖြစ်သော ဆော်ဒီသည် ၎င်းတို့၏ စီးပွားရေးလမ်းကြောင်း ပြောင်းလဲရန်နှင့် ရေနံအပေါ်မှီခိုနေရမှုကို လျှော့ချသွားရန် ကြိုးပမ်းလာသည်။

ဆော်ဒီသည် ပြန်လည်ပြည့်ဖြိုးမြဲစွမ်းအင်များ ရယူရေးအတွက် အရှိန်ဟုတ်မြှင့် ကြိုးပမ်းရန် ကတိပြုထားရာ ယခုခြေလှမ်းမှာ နောက်ဆုံးကြိုးပမ်းချက်လည်း ဖြစ်သည်။

သဘာဝဝန်းကျင် မထိခိုက်စေမည့် စွမ်းအင်ရယူနိုင်ရန် ကြိုးပမ်းနေခဲ့သည်မှာ ၄ နှစ်ခန့်ရှိခဲ့ပြီဖြစ်ပြီး ပြီးခဲ့သော ၂၀၁၇ ခုနှစ်တွင်မှ တင်ဒါလျှောက်ထားမှုများကို စတင်စိစစ်နိုင်ခဲ့သည်။

• 

SoftBank က ဆော်ဒီတွင် တည်ဆောက်မည့် စီမံကိန်းသည် ပြီးခဲ့သော ၂၀၁၇ ခုနှစ်အတွင်း တစ်ကမ္ဘာလုံး နေစွမ်းအင်ထုတ်လုပ်မှု၏ သုံးပုံတစ်ပုံခန့်အထိ ရှိမည် ဖြစ်ကာ ၂၀၀ gigawatts အထိ ရရှိနိုင်မည်ဟု ဆိုသည်။

“ဒါဟာ လူ့သမိုင်းတစ်လျှောက် ကြီးမားတဲ့ ခြေလှမ်းကြီးတစ်ရပ်ဖြစ်ပါတယ်။ ရဲဝံ့စွန့်စားတဲ့ ခြေလှမ်းဖြစ်သလို အောင်မြင်မယ်လို့လည်း ကျွန်တော်တို့ ယုံကြည်ထားပါတယ်” ဟု မင်းသား မိုဟာမက်က ဆိုသည်။

အကယ်၍သာ ဆောက်လုပ်ပြီးစီးခဲ့ပါက ယခုစီမံကိန်းသည် ဆော်ဒီအာရေးဗီးယား၏ လျှပ်စစ်စွမ်းအင်ကို ၃ ဆခန့် မြင့်တက်လာစေမည် ဖြစ်သည်။
လက်ရှိအားဖြင့် ဆော်ဒီ၏ လျှပ်စစ်စွမ်းအင် ၃ ပုံ ၂ ပုံကို သဘာဝဓာတ်ငွေ့မှ ရယူပြီး ကျန်သည်ကို ရေနံမှ ရယူခြင်းဖြစ်သည်။

နေစွမ်းအင်မှ လျှပ်စစ်ရရှိသည်မှာ အလွန်နည်းပါးသည့် ပမာဏသာ ရှိသည်။
ယခုစီမံကိန်းကြောင့် အလုပ်အကိုင်နေရာပေါင်း ၁၀၀၀၀၀ ခန့် ဖန်တီးပေးနိုင်မည့်အပြင် စွမ်းအင်အတွက် ကုန်ကျစရိတ် ကန်ဒေါ်လာ ၄၀ ဘီလီယံခန့်အထိ လျှော့ချသွားနိုင်မည်ဖြစ်ကာ ၂၀၃၀ ပြည့်နှစ်တွင် ရာနှုန်းပြည့် စွမ်းအင်ရရှိနိုင်မည် ဖြစ်သည်။

“ဆော်ဒီမှာ နေရောင်ခြည်ရရှိမှု သိပ်ကို ကောင်းမွန်တယ်။ မြေနေရာကျယ်ကျယ်ပြောပြောရနိုင်တဲ့အပြင် အင်ဂျင်နီယာကောင်းတွေ၊ လုပ်သားစွမ်းအားစုတွေရှိနေပါတယ်။ ဒါပေမယ့် အရေးအပါဆုံးအချက်ကတော့ သူတို့ရဲ့ အမြင်ကျယ်မှုပါပဲ” ဟု မာဆာယိုရှီဆန်က ပြောကြားသည်။

SoftBank သည် လာမည့် ၃ နှစ်မှ ၄ နှစ်တာကာလအတွင်း ဆော်ဒီတွင် ကန်ဒေါ်လာ ၂၅ ဘီလီယံခန့် ရင်းနှီးမြှုပ်နှံမှုများ ပြုလုပ်သွားရန် ရည်မှန်းထားသည်။

ယင်းအချက်မှာ ဆော်ဒီ၏ Vision 2030 ရည်မှန်းချက်နှင့် အဆိုပါခုနှစ်သို့ရောက်လျှင် ရေနံအပေါ်မှီတည်နေသည့် တိုင်းပြည်စီးပွားရေး လုံးလုံးလျားလျားပြောင်းလဲသွားရန် ရည်မှန်းထားသည့် မင်းသားမိုဟာမက်၏ ရည်မှန်းချက်အပေါ်တွင်လည်း အားတစ်ရပ်ဖြစ်လာစေမည် ဖြစ်သည်။

SoftBank က ဆော်ဒီရှိ ပင်လယ်နီကမ်းရိုးတန်းတွင် တည်ဆောက်သွားမည့် Neom မြို့သစ်စီမံကိန်းတွင် ကန်ဒေါ်လာ ၁၅ ဘီလီယံခန့် ရင်းနှီးမြှုပ်နှံသွားရန်လည်း ရည်မှန်းထားသည်။

ဆော်ဒီအာရေးဗီးယားသည် လာမည့် ၂၅ နှစ်အတွင်း ကန်ဒေါ်လာ ၈၀ ဘီလီယံကျော်သုံးစွဲကာ အနုမြူဓာတ်ပေါင်းဖိုပေါင်း အနည်းဆုံး ၁၆ လုံးတည်ဆောက်သွားရန်လည်း စီစဉ်ထားသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)