Landmark Development စီမံကိန်းအတွက် FMI စင်တာနှင့် ဂရင်းမီးရထားဟိုတယ် အဆောက်အဦတို့ကို ဖြိုချတော့မည်

Local Property News | Posted by Zarni Kyaw

ရန်ကုန်မြို့ဗိုလ်ချုပ်အောင်ဆန်းလမ်းနှင့် ဆူးလေဘုရားလမ်းထောင့်ရှိ သမိုင်းဝင် မြန်မာ့မီးရထားရုံးချုပ်ဟောင်း နေရာတွင် တည်ဆောက်မည့် Landmark Development စီမံကိန်းဧရိယာတွင် ပါဝင်သော FMI စင်တာနှင့် ဂရင်းမီးရထားဟိုတယ် အဆောက်အဦတို့ကို ဖြိုချတော့မည်ဖြစ်ကြောင်း First Myanmar Invrestment (FMI) ကုမ္ပဏီ၏ ဘဏ္ဍာရေးအမှုဆောင်အရာရှိချုပ် ဦးထွန်းထွန်းက ပြောသည်။

''ကျွန်တော်တို့မှန်းထားတာကတော့ ဇွန်၊ ဇူလိုင်လလောက်ဖြစ်ပါတယ်။ ဒီဘက်အခြမ်းက ဂရင်းမီးရထား အလုံးကတော့ စနေပါပြီ''ဟု ၎င်းကပြော သည်။

အဆိုပါစီမံကိန်း ပန္နက်တော်တင် တွင်းတော်ဝန် မင်္ဂလာအခမ်းအနားကို ဖေဖော်ဝါရီ ၁၆ ရက်က စီမံကိန်းဧရိယာအတွင်းရှိ ယခင်မီးရထားရုံးချုပ်ဟောင်းနေရာတွင် ကျင်းပပြုလုပ်ခဲ့သည်။
''ဆိုင်ခန်းတွေကတော့ အရင်ငှားထားတဲ့ဟာတွေက တခုပြီးတခု ပိတ်ပြီးတော့ ပြောင်းသွားကြပြီ။ ကျွန်တော်တို့ ရုံးလည်း ဇွန်လမတိုင်ခင် နောက်ဆုံးရှုံးရွှေ့ရမှာပါ။ ဒီ FMI မှာရှိတဲ့ ဆိုင်ခန်းတွေအကုန်လုံးကို စည်းမျဉ်းစည်းကမ်းနဲ့အညီ နို့တစ်ပေး ညှိနှိုင်းဆောင်ရွက်ထားပါတယ်။ Parkson ပိတ်သွားပြီ။ city market place မကြာခင်ပိတ်တော့မယ်။ ဒီနှစ်ပတ်၊ သုံးပတ်အတွင်းမှာပဲ ပိတ်တော့မယ်''ဟု ဦးထွန်းထွန်းက ပြောသည်။

FMI စင်တာနှင့် ဂရင်းမီးရထားဟိုတယ် အဆောက်အဦကိုဖြိုချပြီး Peninsula အမှတ်တံဆိတ် အဆင့်မြင့် ဇိမ်ခံလူနေအိမ်များ၊Grade A အဆင့်ရှိ ရုံးခန်းများပါဝင်သောတာဝါနှစ်လုံး၊ စီးပွားရေးလုပ်ငန်းသုံးဟိုတယ်တလုံး၊ ၀န်ဆောင်မှုပါရှိသော လူနေအိမ်ခန်းများပါဝင်သည့် တိုက်အဆောက်အဦလေးလုံးတည်ဆောက် သွားမည်ဖြစ်ကြောင်းနှင့် ယင်းတိုက်လေးလုံးကို ဆက်စပ်ထားသော ရှောလ်ပင်း ဧရိယာရှိပြီး စီမံကိန်းတခုလုံး၏ အောက်တွင် ကားပါကင်တည်ဆောက်မည်ဖြစ်ကြောင်း သိရသည်။

Landmark Development တည်ဆောက်ရေးစီမံကိန်း၏ ခန့်မှန်းကြမ်းပြင်ဧရိယာမှာ စုစုပေါင်း စတုရန်းပေ ၂ ဒသမ ၄၄ သန်းခန့်ရှိပြီး ၁၀ ဧက အကျယ်အ၀န်းတွင်စီမံကိန်းကို အကောင်အထည်ဖော်မည်ဖြစ်သည်။ ၉ ဒသမ ၅ ဧကအကျယ်အ၀န်းကို ဟိုတယ်အတွက်နှင့် ကျန်သည့်အပိုင်းများကို စီးပွားရေးလုပ်ငန်းများ အတွက်ဟူ၍ လျာထားကြောင်း သိရသည်။

လက်ရှိအချိန်တွင် မြေပြင်လုပ်ငန်းများစတင်နေပြီး တည်ဆောက် ရေးစီမံကိန်းတခုလုံးကို ၂၀၂၀ ပြည့်နှစ် နှစ်ကုန်ပိုင်းတွင် အပြီးတည်ဆောက်သွားမည်ဖြစ်ကြောင်း သိရသည်။

အဆိုပါ Landmark Development တည်ဆောက်ရေးစီမံကိန်းကို FMI မှ ၁၂ ရာခိုင်နှုန်း၊ Yoma Strategic မှ ၄၈ ရာခိုင်နှုန်း၊ မစ်ဆူဘီရှီကော်ပိုရေးရှင်းမှ ၃၀ ရာခိုင်နှုန်း၊ The International Finance Corporation(IFC) မှ ၅ ရာခိုင်နှုန်းနှင့် အာရှဖွံ့ဖြိုးရေးဘဏ် (ADB)မှ ၅ ရာခိုင်နှုန်းဖြင့် ပူးပေါင်းဆောင်ရွက်ထားခြင်းဖြစ်ပြီး Peninsula Yangon ဟိုတယ်စီမံကိန်းကို FMI မှ ၆ ရာခိုင်နှုန်း၊ Yoma Strategic မှ ၂၄ ရာခိုင်နှုန်း၊ Hongkong and Shanghai Hotels Limited မှ ၇၀ ရာခိုင်နှုန်းဖြင့် ပူးပေါင်းဆောင်ရွက်ထားခြင်းဖြစ်ကြောင်း သိရသည်။

Credit: News Watch

ဆောက်လုပ်ရေး ဟိုတယ် စီမံကိန်း အဆောက်အအုံ တည်ဆောက်

Share on Facebook

Share on Twitter