အထပ်မြင့် အဆောက်အအုံရှိ မြေညီထပ်အခန်း အမြင့်ပေ ပြောင်းမည်ဟုဆို

ရန်ကုန်မြို့အတွင်း ဆောက်လုပ်နေသည့် အထပ်မြင့် အဆောက်အအုံများရှိ မြေညီထပ် အခန်းများကို နှစ်ခန်းခွဲကာ ရောင်းချနေမှုများကြောင့် အဆိုပါအခန်း တည်ဆောက်မှုကို
ယခုနှစ်အတွင်း အမြင့်ပေ ပြောင်းလဲ သတ်မှတ်ရန် စီစဉ်နေကြောင်း ရန်ကုန်မြို့တော် စည်ပင်သာယာရေး ကော်မတီထံမှ သိရသည်။

"လက်ရှိ အထပ်မြင့် အဆောက်အအုံများ၏ မြေညီထပ် အခန်းကို ၁၇ ပေအထိ ခွင့်ပြုထားရာမှ ၁၄ ပေခန့်အထိသာ သတ်မှတ်သွားမည်ဖြစ်ကြောင်း ရန်ကုန် မြို့တော်စည်ပင်သာယာရေး ကော်မတီမှ အကြီးတန်းအရာရှိ တစ်ဦးက ဆိုသည်။ "

• 

“လက်ရှိဆောက်နေတဲ့ အထပ်မြင့်တိုက်တွေက မြေညီထပ်တွေမှာ မှန်ခန်းတွေ ဆောက်လာတယ်။ အဲဒီအခန်းကို ပြန်လည် ရောင်းချတယ်။ အဲဒီလိုအခန်းတွေ မရှိစေဖို့ အမြင့်ပေ ကန့်သတ်ဖို့ လိုအပ် လို့ ဆောင်ရွက်ဖို့ စီစဉ်တာပါ။ လက်ရှိကတော့ မြေညီထပ်တွေကို အရင်မူအတိုင်း ဆောက်လုပ်ခွင့် ပေးထားပါတယ်” ဟု ၎င်းက ဆိုသည်။

အထပ်မြင့် ဆောက်လုပ်သူများ အနေဖြင့် မြေညီထပ် အခန်းအများစုကို ၉ ပေ၊ ၈ပေ ပြန်လည် ဆောက်လုပ်ပြီး အရှေ့ဘက်အပိတ်နှင့် အပြည့်အခန်းများ ဆောက်လုပ်လာခြင်းကြောင့် လူနေထိုင် ရာတွင် အဆင်မပြေမှုများ ဖြစ်ပေါ်နေသောကြောင့် မြေညီထပ် အမြင့်ပေကို ကန့်သတ်ရခြင်း
ဖြစ်ကြောင်း ရန်ကုန်မြို့တော် စည်ပင်သာယာရေး ကော်မတီထံမှ သိရသည်။

“အခု မြေညီထပ်တွေက ထပ်ခိုးနဲ့ မဆောက်ကြတော့ဘူး။ မြေညီထပ်ကို နှစ်ခန်းခွဲ ဆောက်ပြီး ပထမအထပ်ကို အပိတ်လုပ်ပြီး စီးပွားဖြစ်ရောင်းစားလာကြတယ်။အဲဒီလို မြေညီထပ် အခန်းတွေက အလုံပိတ်ဖြစ်နေတဲ့အတွက် နေထိုင်တဲ့ ပြည်သူတွေ ကျန်းမာရေးကို ထိခိုက်စေပါတယ်။ ၁၄ ပေ
ဆိုရင်တော့ ထပ်ခိုးလောက်ဘဲ ဆောက်လုပ်ခွင့် ရတော့မှာပေါ့”ဟု ဆောက်လုပ်ရေး လုပ်ငန်းရှင်
ကိုထွန်းထွန်းက ဆိုသည်။

တရားဝင် အဆောက်အအုံများကို ၂၀၁၅-၂၀၁၆ ခုနှစ်ဘဏ္ဍာနှစ်က အထပ်မြင့် အဆောက်အအုံ စုစုပေါင်းအလုံး ၆၀ဝ၀ ကျော် ခွင့်ပြုပေးခဲ့ပြီး ၂၀၁၆-၂၀၁၇ ဘဏ္ဍာနှစ်တွင် အထပ်မြင့် အဆောက် အအုံ စုစုပေါင်းအလုံး ၄၀ဝ၀ ခန့် ခွင့်ပြုခဲ့ကြောင်း ရန်ကုန်မြို့တော် စည်ပင်သာယာရေး ကော်မတီ ထံမှ သိရသည်။


Credit: The Voice