ဆပ်ကွန်း မိန်းကွန်း တင်ဒါစနစ်အကြားက တိုင်ပတ် နေတဲ့ စီမံကိန်းများ

ဆောက်လုပ်ရေးလုပ်ငန်းတွေ ၊ လမ်းတံတား ဆောက်လုပ်တဲ့ လုပ်ငန်းတွေ ၊ အိမ်ရာစီမံကိန်းတွေ ကိုတင်ဒါစနစ်နဲ့ နိုင်ငံတော်ကနေ
ပုဂ္ဂလိဂ လုပ်ငန်းရှင်တွေကို အဆိုပြုလွှာ အသီးသီးတင်ပြီး ဆောက်လုပ်ခွင့် ပြုလာပါတယ် ၊ မဆလ ခေတ် ၊ မြန်မာဆိုရှယ်လစ် လမ်းစဉ်ပါတီ နဲ့ န၀တ ခေတ် တစ်လျှောက်လုံးမှာ တည်ဆောက်ရေး လုပ်ငန်းတွေကို ဌာနဆိုင်ရာတွေကဘဲ တာဝန်ယူ တည်ဆောက်ခဲ့ကြပါတယ် ၊ ဌာနရဲ့ စက်ယန္တာရား ၊ ဌာနရဲ့ လူအင်အား တွေနဲ့ ဘဲ ဆောက်လုပ်ခဲ့ကြတာဖြစ်ပြီး အရည်အသွေး ပိုင်းဆိုင်ရာ ပြသနာ တွေနဲ့ အဂတိ လိုက်စားမှု တွေ ရှိခဲ့တယ် ဆိုတဲ့ စွပ်စွဲချက်တွေကလည်း ကောလဟလ လိုလို အတည်လိုလိုကြားထဲ နှစ်ပေါင်းများစွာ ပြည်သူတွေကျော်ဖြတ်ခဲ့ရ
ပါတယ် ။

ဒါပေမယ့် ၂၀၁၀ ကနေစပြီး တက်လာတဲ့ ဒီမိုကရေစီ အစိုးရလက်ထက်မှာတော့ စီမံကိန်းလုပ်ငန်းတွေ တော်တော်များများကို အရင်ဝန်ကြီးဌာန တာဝန်ယူဆောက်ခဲ့တဲ့ စနစ်တခုကနေ ပြင်ပဆောက်လုပ်ရေး ကုမ္မဏီတွေကို တင်ဒါစနစ်နဲ့ ၀င်ပြိုင်စေပြီး မှ ဆောက်လုပ်စေတဲ့ စနစ်တစ်ခုကို ပြောင်းလဲခဲ့ပါတယ် ။ ပွင့်လင်းမြင်သာတဲ့ တင်ဒါစနစ်လို့ ပြောခဲ့ပေမယ့် အရင်အစိုးရလက်ထက်မှာကတည်း တင်ဒါရွေးချယ်မှု နှင့် ပက်သက်ပြီး ဝေဖန်ခံခဲ့ရပါတယ် ။

တင်ဒါစနစ်နဲ့ ရွေးချယ် ဆောက်လုပ်စေတဲ့ အတွက် ၀န်ကြီးဌာန
အတွက်လည်း ၀န်ထုပ်ဝန်ပိုးမဖြစ်စေသလို ၊ ဆောက်လုပ်ရေး လုပ်ငန်း လုပ်ကိုင်ခဲ့တဲ့ ပြင်ပ ကုမ္မဏီ တွေ အတွက်လည်း အလုပ်ရစေပါတယ်၊ ပြင်ပ ကုမ္မဏီတွေကို ဆောက်လုပ်စေတဲ့ အတွက်ကြောင့်လည်း အရည်အသွေး မကောင်းရင် မကောင်းသလို ပြန်ပြင်ခိုင်းတာတို့ ၊ သတ်မှတ်ချိန်အတွင်းအမြန်ပြီးစေပါတယ် ၊ ကောင်းမွန်တဲ့
နည်းစနစ်ဖြစ်လို့ ဒီမိုကရေစီ နိုင်ငံတွေ တော်တော်များများပါ ဒီစနစ်ကို ကျင့်သုံးကြပါတယ် ။ အရည်အသွေး စီစစ်အကဲဖြတ်တဲ့ လူတွေရဲ့ သမာသမတ်ကျမှု ကတော့နည်းနည်းစကားပြောပါတယ် ။

စနစ်က ကောင်းပေမယ့် မလိမ့်တပတ် လုပ်ကြတဲ့ ကိစ္စတွေကလည်း ဆောက်လုပ်ရေး လုပ်ငန်းတွေ ထဲမှာတော်တော်များများရှိခဲံပါတယ် ။တင်ဒါတစ်ခု အောင်မြင်ဖို့ ဆိုတာကလည်း သိပ်လွယ်ကူတဲ့ ကိစ္စမဟုတ်ပါဘူး ၊ တင်ဒါဝင်ရောက်ယှဉ်ပြိုင်တဲ့ ကုမ္မဏီရဲ့ နောက်ခံသမိုင်း ၊ အသုံးပြုမယ့်နည်းပညာ နဲ့ ငွေကြေးအခြေအနေကို စီစစ်ပြီးမှ ရွေးတာဖြစ်ပါတယ်။

• 

ဒါကြောင့်လည်း ငွေကြေးအင်အားတောင့်တင်းတဲ့ ကုမ္မဏီတွေ ၊ အကပ်ကောင်းတဲ့ ကုမ္မဏီတွေ ဘဲတင်ဒါတွေ ခေတ်အဆက်ဆက်မှာ ရခဲ့တာဖြစ်ပါတယ် ၊ တစ်ဖက်မှာ ပြန်ကြည့်မယ် ဆိုရင်လည်း တင်ဒါအောင်တဲ့ ကုမ္မဏီက စီမံကိန်းတစ်ခု အတွက် ကိုယ်ပိုင်ငွေကို အဆောက်အအုံ
ဒါမှ မဟုတ် တံတားတစ်ခုရဲ့ ၂၀ ရာခိုင်နှုန်း အထိ ကြိုတင်ငွေစိုက်ထုတ်ထားရပါတယ် ၊ နည်းတဲ့အရင်းအနှီးမဟုတ်တဲ့ အတွက် ငွေရှိတဲ့ သူတွေ မှ လုပ်နိုင်လို့ မုဒိတာ ပွားရပါတယ် ၊ နောက်ပြသနာတစ်ခုက ငွေလည်းမရှိဘူး ၊ ငွေရှိအင်အားရှိသလို ဟန်ဆောင်ပြီး အကပ်ကောင်းကောင်း နဲ့ ခပ်တည်တည် တင်ဒါအယူပြပြီး အမြတ်တင် လက်လွှဲလက်ပြောင်း လုပ်ခဲ့တဲ့ ဖြစ်ရပ်တွေကလည်း ဆောက်လုပ်ရေး
လောကမှာ ထူးမခြားနားဇတ်လမ်းပါဘဲ ။

သိန်းတစ်ရာတန် စီမံကိန်းတစ်ခုကို အဆင့်ဆင့် လက်လွှဲလက်ပြောင်းလုပ်ပြီး နောက်ဆုံးအဆင့်အလုပ်ရတဲ့ လူလက်ထဲ ရောက်တဲ့ အချိန်မှာ သိန်း ၆၀ လောက်ဘဲကျန်တော့တယ် ဖြစ်ရပ်တွေ အများကြီးရှိခဲ့ဖူးပါတယ် ၊ နိုင်ငံတော်အတွက်လည်း ချပေးလိုက်တဲ့ ပိုက်ဆံနဲ့ ပြန်ရတဲ့ အရည်အသွေးက မမျှတလို့ လမ်းတွေ အချိန်မတိုင်ခင် ပေါက်ပြဲပျက်စီး ၊ စီမံကိန်းအဆောက်အအုံ အသစ်တွေ လူတောင်မနေရသေးဘူး
အက်ကွဲလို အက်ကွဲ ၊ တံတားတွေ ပျက်စီးတာတွေ သတင်းတွေထဲမှာ မြင်နေကြားနေရပါတယ် ။
တလောတုံးကတောင် ဧရာဝတီ တိုင်းထဲက တံတားနှစ်စင်း အရည်အသွေးမမှီလို့ ဆိုပြီး ဆောက်လုပ်တဲ့ ကန်ထရိုက်အင်ဂျင်နီယာ တွေကို ပြန်လည်ပြင်ဆင် ဆောင်ရွက်ပေးဖို့ တိုင်းအစိုးရက နေပြန်ပြောရတယ်ဆိုတဲ့ သတင်းတွေကလည်း မီဒီယာ စာမျက်နှာပေါ် ရောက်ခဲ့တာ အားလုံးအသိဘဲဖြစ်ပါတယ် ။

အဆောက်အအုံ တစ်ခု တံတားတစ်ခုကို တင်ဒါရထားတဲ့ ကုမ္မဏီတော်တော်များများက သူတို့ကိုယ်တိုင်လုပ်တာ ရှိသလို ဆပ်ကွန်းလို့ ခေါ်တဲ့ အစိတ်အပိုင်းအလိုက်ကို နှုန်းတစ်ခုနဲ့ ပြန်လည် လုပ်ကိုင်စေတာတွေလည်း ရှိပါတယ် ။ စီမံကိန်းကို တကယ်လုပ်နိုင်မယ့် သူကိုရှာပြီး နာမည်ခံ ကိုယ်စားအလုပ်လုပ်ပေးသလို ဖြစ်အောင် တဆင့်ပြန်ပေးလိုက်ကြပါတယ် ၊ ခေါင်းလေးနည်းနည်းစားရုံ ၊ အလုပ်ကလေး နည်းနည်းပါးပါး လုပ်ပြလိုက်ရုံနဲ့ အသားတင် အကျိုးအမြတ် ရတဲ့ အလုပ်ဖြစ်ပြီး ဆောက်လုပ်ရေး လောကမှာ ဆပ်ကွန်ဆပ်ကွန်းဆိုပြီး သဘာဝ လိုလို ထုံးစံလိုလိုဖြစ်လာကြပါတယ် ။

ကိုယ်ပိုင်အကျိုးစီးပွား ကိုယ်ပိုင်အဆောက်အအုံ ၊ ကိုယ်ပိုင်လုပ်ငန်းအတွက် ဆပ်ကွန်းဇတ်လမ်းက မထူးခြားပေမယ့် နိုင်ငံတော်အတိုင်ပင်ခံ ပုဂ္ဂိုလ်ကိုယ်တိုင် အင်တိုက်အားတိုက် နိုင်ငံ ဖွံ့ဖြိုးရေး လုပ်ငန်းတွေကို လုပ်နေတဲ့ ယနေ့အချိန်မှာတော့ တင်ဒါအောင်မြင်တဲ့ လူတွေ အနေနဲ့ မိမိကိုယ်တိုင် အရည်အချင်း ရှိရှိ ၊ အရည်အသွေး ပြည့်ပြည့်၀၀ နဲ့ အလုပ်လုပ်ပေးဖို့ လိုပါတယ် ။ အဓိကကတော့ စေတနာ ထားဖို့ လိုပါတယ် ၊ စီးပွားရေး လုပ်နေတာ အလှုလုပ်နေတာ မဟုတ်ဘူး ဆိုပေမယ့်လည်း ရသင့်ရထိုက် တဲ့အကျိုးအမြတ်လောက်ကို ယူပြီး နိုင်ငံနဲ့ တိုင်းပြည်အနာဂတ်အတွက် စေတနာထားပြီး အလုပ်လုပ်ကြဖို့
အချိန်တန်ပါပြီ ။

မြန်မာနိုင်ငံမှာ စီမံကိန်း တင်ဒါတွေကို စိတ်ဝင်စားတဲ့ လူဘယ်လောက်များသလဲ ဆိုတာ လူတွေ သိပ်သတိမထားမိပေမယ့် ဆောက်လုပ်ရေး လုပ်ငန်းလုပ်တဲ့ သူတွေ ၊ စီးပွားရေး သမားတွေကြားမှာတော့ တင်ဒါက ရေပန်းစားပါတယ်။

ပြီးခဲ့တဲ့ ရက်ပိုင်းကမှ သီလ၀ါ ကျောက်တန်းက တန်ဖိုးနည်းအိမ်ရာစီမံကိန်း နဲ့ လှိုင်သာယာ ကတန်ဖိုးနည်းအိမ်ရာစီမံကိန်း နှစ်ခု အတွက် တင်ဒါခေါ်လိုက်တဲ့ အခါမှာ တင်ဒါ ၀င်တင်သွင်းခဲ့တဲ့ လူပုဂ္ဂိုလ် ၊ ကုမ္မဏီ အစုအဖွဲ့က ၄၀၀ နီးပါးခန့်အထိ တောင်ရှိပါတယ် ၊ ပမာဏသေးတဲ့ တန်ဖိုးနည်းအိမ်ရာစီမံကိန်း လေးတောင် ကုမ္မဏီ ၄၀၀ ကျော်လာပြိုင်တယ်ဆိုရင် နိုင်ငံတော် အဆင့်စီမံကိန်းကြီးတွေ ဆိုရင် တင်ဒါ ၀င်ပြိုင်မယ့် ကုမ္မဏီ ဘယ်လောက်ရှိနိုင်သလဲ ဆိုတာ ခန့်မှန်းရခက်ပါတယ် ။ ဒါတောင် တစ်ချို့ စီမံကိန်းတွေ မှာတင်ဒါအောင်တဲ့ လူတွေက နောက်လူကို ဆပ်ကွန်းပြန်မပေးရဘူးလို့ သတ်မှတ်ချက်တွေ ထားထားပေမယ့် လက်တလုံးခြား လှည့်ပြီး လုပ်ကိုင်နေတဲ့ လူတွေ အများကြီး ရှိနေဆဲဖြစ်ပါတယ် ။

နိုင်ငံတော်က ယုံကြည်လို့ စီမံကိန်းလုပ်ငန်းကြီးကို တင်ဒါချပေးလိုက်တာကို အကိုင်းအဖျားလောက်သာ လုပ်ကိုင်ပြီး ကျန်တဲ့ အပိုင်းတွေကို ယုံကြည်ရတဲ့ လူတွေကို ပြန်ပြီးဆပ်ကွန်းပြချပေးပြီး လုပ်ကိုင်ပါတယ် ၊ ဆပ်ကွန်ရထားတဲ့ လူကလည်း အဆင့်ဆင့် ပြန်ပြီး ဆပ်ကွန်းပြန်ပြန် ပေးရင်းနဲ့ နောက်ဆုံးမှာ အလုပ်သမားခေါင်းဆီမှာ ဇတ်လမ်းက အဆုံးသတ်ပြီး ဆပ်ကွန်းသံသရာလည်ပတ်နေဆဲဖြစ်ပါတယ် ။

ဖြစ်သင့်တာကတော့ အမှန်တကယ် အလုပ်လုပ်မယ့် ကုမ္မဏီ လက်ထဲတင်ဒါတွေ ရောက်ဖို့လိုသလို ၊ ငွေကြေးအင်အား ကြိုတင်စိုက်ထုတ်လုပ်ရတဲ့ စနစ်ဟောင်း အစား တင်ဒါရတဲ့ လုပ်ငန်းရှင်လည်း အကျိုးရှိ ၊ နိုင်ငံတော်အတွက်လည်း အကျိုးရှိမယ့် တင်ဒါစနစ်သစ်တစ်ခုကို ဖော်ဆောင်ဖို့လိုပါတယ် ၊ ဒါ့အပြင် ငွေကြေးအင်အားတောင့်တင်းမှု မရှိလို့ ဆပ်ကွန်းယူ အလုပ်လုပ်နေတဲ့ တစ်နိုင်တစ်ပိုင် ကန်ထရိုက်တာတွေ ၊ ကုမ္မဏီ တွေ ရှင်သန်ခွင့်ရအောင် စနစ်တကျ ပြုစုပျိုးထောင်ရမယ့် စနစ်သစ်တစ်ခု လိုပါတယ် ၊ ဖွံ့ဖြိုးပြီးနိုင်ငံတွေမှာတောင် ဆပ်ကွန်ဆိုတဲ့ ကုမ္မဏီ ငယ်လေးတွေ ရှိပေမယ့် စနစ်တကျ ဖြစ်အောင် လုပ်တဲ့ နည်းစနစ်ကလေးတွေကို ကျနော်တို့ ဆီမှာလည်းကျင့်သုံးကြဖို့ လိုပါပြီ ။

ကိုချစ်ခင် မှ iMyanmarHouse.com အတွက် အထူးရေးသားဖော်ပြသည်။
Credit: iMyanmarHouse.com