ကမ္ဘာ့ရွှေဈေး မြင့်တက်မှုနှင့်အတူ ပြည်တွင်းရွှေဈေးနှုန်း ကျပ် ၈၈၀၀၀၀ အထက် ရောက်ရှိလာပြီး တစ်လအတွင်း ကျပ်၃၅၀၀၀ ခန့် ပြန်လည်မြင့်တက်

ဖေဖော်ဝါရီလဆန်းရက်များတွင် ကမ္ဘာ့ရွှေဈေး မြင့်တက်မှုများကြောင့် ဖေဖော်ဝါရီ ၄ ရက်၌ ပြည်တွင်းရွှေဈေးနှုန်း ကျပ် ၈၈၀၀၀၀ အထက် ရောက်ရှိလာပြီး တစ်လအတွင်း ကျပ် ၃၅၀၀၀ ခန့်အထိ မြင့်တက်လာကြောင်း ဈေးကွက်အတွင်း ရွှေရောင်းဝယ်သူများထံမှ သိရသည်။

ဇန်န၀ါရီ ၃၀ ရက်တွင် ၁၁၈၉ ဒေါ်လာဝန်းကျင် ရှိသော ကမ္ဘာ့ရွှေဈေးနှုန်းသည် ဇန်န၀ါရီ ၃၁ ရက်တွင် ၁၂၁၄ ဒေါ်လာအထိ ရောက်ရှိခဲ့ပြီး ဖေဖော်ဝါရီ ၁ ရက်တွင် ၁၂၀၅ ဒေါ်လာအထိ ပြန်လည်ကျဆင်းခဲ့သည်။ ထို့နောက် ဖေဖော်ဝါရီ ၂ ရက်တွင် ၁၂၁၆ ဒေါ်လာအထိ မြင့်တက်သွားပြီး ဖေဖော်ဝါရီ ၃ ရက်တွင် ၁၂၂၀ ဒေါ်လာအထိ ဆက်လက် မြင့်တက်ခဲ့ကာ ဖေဖော်ဝါရီ ၆ ရက်တွင် တစ်ပတ်တာ ဈေးကွက်ပြန်လည် စတင်မည်ဖြစ်သည်။

• 

ကမ္ဘာ့ရွှေဈေးသည် ၂၀၁၇ ခုနှစ် ဇန်န၀ါရီလဆန်းမှ စတင်ကာ ဈေးနှုန်းပြန်လည် မြင့်တက်လာရာ ဇန်န၀ါရီ ၁၂ ရက်ကစပြီး ၁၂၀၀ ဒေါ်လာအထိ ရောက်ရှိခဲ့သည်။ ဇန်န၀ါရီ ၁၇ ရက်တွင် ၁၂၁၇ ဒေါ်လာအထိ မြင့်တက်ခဲ့ပြီးနောက် ဇန်န၀ါရီ ၂၄ ရက်တွင် ၁၂၁၈ ဒေါ်လာအထိ ရောက်ရှိခဲ့သည်။ ဇန်န၀ါရီ ၂၅ ရက်တွင် ၁၁၉၇ ဒေါ်လာ၊ ဇန်န၀ါရီ ၂၆ ရက်တွင် ၁၁၈၉ ဒေါ်လာ၊ ဇန်န၀ါရီ ၂၇ ရက်တွင် ၁၁၈၃ ဒေါ်လာအထိ ကျဆင်းခဲ့ပြီးနောက် ဇန်န၀ါရီလကုန်ပိုင်းမှ စတင်ကာ ဈေးနှုန်းပြန်လည် မြင့်တက်လာခြင်း ဖြစ်သည်။

ဖေဖော်ဝါရီ ၂ ရက်က ကမ္ဘာ့ရွှေဈေး မြင့်တက်မှုနှင့်အတူ ပြည်တွင်းရွှေဈေး ကျပ် ၈၈၀၂၀၀ အထိ မြင့်တက်သွားပြီး ဖေဖော်ဝါရီ ၃ ရက်တွင် ကျပ် ၈၇၆၇၀၀ ၀န်းကျင် ဈေးနှုန်းရှိခဲ့သည်။ ဖေဖော်ဝါရီ ၄ ရက်တွင် ကျပ် ၈၇၉၃၀၀ ဖြင့် ဈေးဖွင့်ခဲ့ပြီး မွန်းလွဲပိုင်းတွင် ကျပ် ၈၈၀၃၀၀ အထိ ဆက်လက်မြင့်တက်ခဲ့ခြင်း ဖြစ်သည်။ ပြည်တွင်းဈေးကွက်တွင် ဒေါ်လာဈေး ကျပ် ၁၃၅၈-၁၃၆၀ ၀န်းကျင်ဖြင့် ငြိမ်နေပြီး ကမ္ဘာ့ရွှေဈေး မြင့်တက်မှုကြောင့် ပြည်တွင်းရွှေဈေးနှုန်း တက်ရိပ်ပြနေခြင်း ဖြစ်သည်။

ပြည်တွင်းရွှေဈေးနှုန်းသည် ဇန်န၀ါရီ ၂၈ နှင့် ၂၉ ရက်တို့တွင် ကျပ် ၈၆၆၀၀၀ မှ ၈၆၇၅၀၀ ၀န်းကျင် ဖြစ်ပေါ်ခဲ့ပြီး ဇန်န၀ါရီ ၃၀ ရက် နံနက်ပိုင်းတွင် ၈၇၁၄၀၀ ၀န်းကျင်အထိ ရောက်ရှိခဲ့ကာ ဇန်န၀ါရီ ၃၁ ရက်တွင် ကျပ် ၈၇၃၀၀၀ ကျော်အထိ ဆက်လက်မြင့်တက်ခဲ့ကြောင်း သိရသည်။ တစ်လအတွင်း ဖြစ်ပေါ်ခဲ့သော ရွှေဈေးနှုန်းကို နှိုင်းယှဉ်ပါက ဇန်န၀ါရီ ၄ ရက်တွင် ပြည်တွင်းရွှေဈေးနှုန်းသည် ကျပ် ၈၄၅၉၀၀ ဖြင့် စဖွင့်ခဲ့ပြီး လက်ရှိ ဖေဖော်ဝါရီ ၄ ရက်ဈေးနှုန်း ကျပ် ၈၈၀၃၀၀ နှင့် ဆိုပါက တစ်လအတွင်း ကျပ် ၃၄၄၀၀ မြင့်တက်ခဲ့ခြင်း ဖြစ်သည်။ ဇန်န၀ါရီလအတွင်း အမြင့်ဆုံးဖြစ်ပေါ်သော ရွှေဈေးနှုန်းမှာ ကျပ် ၈၇၈၁၀၀ ဖြစ်ပြီး အနိမ့်ဆုံးဖြစ်ပေါ်သော ရွှေဈေးနှုန်းမှာ ကျပ် ၈၄၁၆၀၀ ဖြစ်ကာ ဇန်န၀ါရီ လကုန်ပိုင်းမှ စတင်ကာ ဈေးနှုန်း သိသိသာသာ ပြန်လည်မြင့်တက်လာခြင်း ဖြစ်သည်။

၂၀၁၆ ခုနှစ်အတွင်း ကမ္ဘာ့ရွှေဈေး မြင့်တက်မှုနှင့် နိုင်ငံခြားငွေလဲနှုန်း မြင့်တက်ခဲ့ခြင်းကြောင့် ပြည်တွင်းရွှေဈေးနှုန်းသည် အောက်တိုဘာ ၄ ရက်က ကျပ် ၉၀၀၂၀၀ အထိ မြင့်တက်ခဲ့ကာ ဒီဇင်ဘာ ၂၂ ရက်နောက်ပိုင်း နိုင်ငံခြားငွေလဲနှုန်း ပြန်လည်ကျဆင်းမှုကြောင့် ရွှေဈေးပြန်ကျလာပြီး ဒီဇင်ဘာ ၂၄ ရက်တွင် ၂၀၁၆ ဇူလိုင်လကုန်ပိုင်း နောက်ပိုင်း အနိမ့်ဆုံးနှုန်းအဖြစ် ကျပ် ၈၄၀၀၀၀ အောက် ပြန်ရောက်ခဲ့ကြောင်း ရွှေရောင်းဝယ်သူများထံမှ သိရသည်။

Credit: Eleven Media Group