ပထမအိမ်ထောင်မှ သားသမီးများအား အမွေခွဲမပေးရသေးသည့် မြေနှင့်အိမ်ကို ၀ယ်လျှင်
'ကျွန်တော်ကို မိတ်ဆွေတစ်ဦးက မြေနဲ့အိမ် ဝယ်ဖို့ကိစ္စအတွက် လာဆွေးနွေးတယ် ဆရာ''
စာရေးသူ၏ တပည့်တစ်ဦးက စာရေးသူထံ ရောက်ရှိလာပြီး ဆွေးနွေးခြင်းဖြစ်သည်။
''အဲဒီတော့ ငါ့တပည့်က ဘာတွေလုပ်ပေးလိုက်သလဲ''
''ပထမဦးဆုံး ကန့်ကွက်ရန် ရှိ၊မရှိကို သတင်းစာထဲ ထည့်ကြေညာသင့်ကြောင်း ပြောလိုက်တယ် ဆရာ''
''အေး ... မှန်တာပေါ့၊ အရောင်း အဝယ် ပြုလုပ်ရာမှာ ကန့်ကွက်သူ မရှိဘူးဆိုရင် ရှေ့ဆက်လုပ်ရတာတွေ အဆင်ပြေတာပေါ့၊ ကန့်ကွက်တဲ့သူရှိလာရင်လည်း ကန့်ကွက်သူက ရပိုင်ခွင့်ရှိမရှိ၊ အရောင်းအဝယ်ပြုမယ့် မြေနဲ့အိမ်အပေါ် အမှန်တကယ် အကျိုးခံစားခွင့်ရှိသူ ဟုတ်မဟုတ် ကြိုတင်သိထားတော့ ဖြေရှင်းရတာ လွယ်သွားတာပေါ့''
''သတင်းစာထဲ ထည့်လိုက်တော့ ကန့်ကွက်သူ ပေါ်လာတယ် ဆရာ''
''ကဲ- ပြောပါဦး၊ ဇာတ်လမ်းက စပြီပေါ့''
''အချင်းဖြစ် မြေနဲ့အိမ်က ကန့်ကွက်သူတို့ရဲ့ ဖခင်ပိုင် အိမ်နဲ့မြေဖြစ်လို့ သူတို့ရဲ့ သဘောတူညီချက်မရဘဲ ရောင်းချခြင်းမပြုဖို့ ကန့်ကွက်လာတယ် ဆရာ''
''ကန့်ကွက်သူတို့ရဲ့ ဖခင်ပိုင် ဆိုတော့ အခုရောင်းမယ်ဆိုတဲ့ သူက နောက်အိမ်ထောင်ဖြစ်နေလို့လား''
''ဟုတ်တယ် ဆရာ၊ အစကတော့ နောက်အိမ်ထောင်လို့ မပြောဘူးဆရာ၊ အဘိုးကြီးနဲ့ သူတို့ လင်မယားနှစ်ယောက် အမည်ပေါက်မြေနဲ့ အိမ်လို့ပဲ ပြောတယ်''
''ဒါဆိုရင် မိထွေးနဲ့ ပထမ အိမ်ထောင်က မွေးဖွားတဲ့ သားသမီးတွေရဲ့ ကိစ္စ ဖြစ်သွားမယ်''
''ဟုတ်ကဲ့ ဆရာ''
''အခုရောင်းတဲ့ သူတွေက ဘာပြောသလဲ''
''သူတို့က သူ့ယောက်ျား မသေမီကတည်းက ပထမအိမ်ထောင်က သားသမီးတွေကို အမွေခွဲဝေပေးပြီးသားလို့ ပြောတယ် ဆရာ၊ သူကတော့ ယုံယုံကြည်ကြည်ဝယ်ပါ၊ အမည်ပြောင်းတဲ့အထိ အပြည့်အဝတာဝန်ယူ ဆောင်ရွက်ပေးမယ်လို့ ပြောတယ်ဆရာ''
''ကန့်ကွက်တဲ့သူတွေကလည်း ရန်ကုန်မြို့တော် စည်ပင်သာယာရေးကော်မတီထံ မြေပုံ ကူးမပေးဖို့၊ အမည်ပြောင်း မပေးဖို့ ကန့်ကွက်ထားမှာပေါ့''
''ဟုတ်ကဲ့ ဆရာ၊ ဒါကြောင့် ဝယ်သူအနေနဲ့ ဆက်ပြီး ဝယ်သင့်၊ မဝယ်သင့်၊ ဝယ်မယ်ဆိုရင်လည်း ဘယ်လို ဆောင်ရွက်ရမယ်ဆိုတာ ဆရာ့ဆီလာပြီး ဆွေးနွေးတာ ဆရာ။ ကျွန်တော့်ကို အကြံဉာဏ် ပေးပါဦး''
''စရန်တစ်စိတ်တစ်ပိုင်းတော့ ပေးပြီးပြီမဟုတ်လား''
''ဟုတ်ကဲ့ ဆရာ၊ ဒါကြောင့် ဝယ်သူတွေက စိတ်ပူပင်နေလို့ ဆရာ''
''အကောင်းဆုံးကတော့ ရောင်းသူပြောသလို ပထမအိမ်ထောင်က သားသမီးတွေကို တရားဝင် အမွေခွဲပေးပြီး ဟုတ်မဟုတ် စိစစ်ဖို့ လိုတယ်။ ပထမ အိမ်ထောင်က သားသမီးတွေက ဖခင် နောက်အိမ်ထောင်ပြုလိုက်တာနဲ့ မိခင်ဝေစုကို တောင်းပိုင်ခွင့်ရှိလာမှာ ဖြစ်တယ်။ အဲဒီတုန်းက မတောင်းဆိုခဲ့ဘူးဆိုရင်လည်း ဖခင်ကွယ်လွန်ရင် မိထွေးဆီကနေ တောင်းပိုင်ခွင့် ရှိမှာဖြစ်တယ်''
''အမွေခွဲဝေပြီးကြောင်း ကတိ စာချုပ်ဆိုရင် အကျုံးဝင်လား ဆရာ''
''ဥပဒေအရဆိုရင်တော့ မြန်မာ့ဓလေ့ထုံးတမ်းအရ ဗုဒ္ဓဘာသာဝင်တွေဟာ နှုတ်အားဖြင့်လည်း ပစ္စည်းလက်ရောက်ပေးပြီး အမွေခွဲလို့ ရတာပဲ၊ ဒါပေမယ့် မိသားစု စီမံမှုစာချုပ် ချုပ်ဆိုပြီး အမွေခွဲဝေကြရင်တော့ ပိုကောင်းတာပေါ့''
''စာချုပ်စာတမ်းမရှိခဲ့ဘူးဆိုရင် ဘယ်လိုလုပ်မလဲ ဆရာ''
''အထောက်အထားတစ်ခုတော့ ရှာရမှာပေါ့၊ တရားရုံးမှာ အမှုဖြစ်ပြီဆိုရင် နှုတ်သက်သေခံချက်ပေးနိုင်တဲ့ သိရှိသူတွေကို သက်သေအဖြစ် ခေါ်ပြရမှာပေါ့''
''စာချုပ်စာတမ်း အထောက်အထားမရှိရင်တော့ အမှုရင်ဆိုင်တာကို စောင့်ပြီးမှကို ဝယ်ရမလို ဖြစ်နေတာပေါ့နော် ဆရာ''
''နှစ်ဘက်ညှိနှိုင်းပြီး ရောင်းရင်လည်း ဖြစ်တာပဲ''
''ခက်တာက ဒီဘက် အဲ ဆရာပြောသလို ဆိုရင် မိထွေးပေါ့၊ သူက တစ်ပြားမှ မပေးချင်တာ''
''ဒီလိုတော့ မရဘူးလေ။ ပထမအိမ်ထောင်က အမွေလုံးဝမရသေးဘူးဆိုရင် ပေးကိုပေးရမှာ ဖြစ်တယ်''
''အဲဒီလို မူလက အမွေခွဲပေးပြီးရင် မိထွေးထံက လုံးဝမရတော့ဘူးလား ဆရာ''
''အဲ- အဲဒါ အဓိက ပြဿနာပဲ။ အမွေခွဲပေးတာက မိခင်ရဲ့ ဝေစု ဖြစ်တယ်။
ဒါပေမယ့် ဖခင်က နောက်အိမ်ထောင်ပြုလို့ သားသမီး ထွန်းကားသည်ဖြစ်စေ၊ မထွန်းကားသည်ဖြစ်စေ၊ ပေါင်းသင်းနေစဉ် လက်ထက်ပွားပစ္စည်းပေါ်မှာလည်း ရခွင့်ရှိတယ်လို့ ဆိုပြီး တောင်းနေကြတယ်။ ''အမှန်တော့ မိဘတစ်ဦးဦး ကွယ်လွန်ပြီး ကျန်ရစ်သူ မိဘ နောက်အိမ်ထောင်ပြုတဲ့အခါ ကွယ်လွန်သူနဲ့ ရခဲ့တဲ့ သားသမီးတွေက ကွယ်လွန်သူ မိဘရဲ့ဝေစုကို ကျန်ရစ်သူ မိဘထံကနေ ရခွင့်ရှိပါတယ်။ ကွယ်လွန်သူ မိဘရဲ့ ဝေစုကို အမွေရယူခဲ့ပြီးရင်တော့ ကျန်ရစ်သူ မိဘကွယ်လွန်တဲ့အခါ ထပ်မံ အမွေတောင်းခံခွင့် မရှိတော့ပါဘူး''
''ဒါကြောင့် အခုကိစ္စမှာ ရောင်းသူက သူ့ခင်ပွန်း မကွယ်လွန်မီ ပထမအိမ်ထောင်က သားသမီးတွေကို မိခင်ဝေစုခွဲဝေပေးပြီးသားလို့ ပြောနေတာပေါ့နော် ဆရာ''
''အေး- ဟုတ်တယ်၊ ပထမ အိမ်ထောင်က သားသမီးတွေကို ဖခင်မကွယ်လွန်မီက အမွေခွဲပေးပြီးကြောင်း အထောက်အထားခိုင်လုံရင်တော့ အရောင်းအဝယ်ဆက်လုပ်လို့ပဲ ဆရာအကြုံပြုချင်ပါတယ်''
''ဒါနဲ့ ဆရာ ဗဟုသုတအနေနဲ့ မေးပါရစေ ဆရာ၊ တကယ်လို့များ ပထမ အိမ်ထောင်က သားသမီးတွေက မိဘတစ်ဦး ကွယ်လွန်စဉ်မှာ အမွေမတောင်းခဲ့ဘူးဆိုရင် ကျန်ရစ်တဲ့ မိဘ ကွယ်လွန်တဲ့အခါ မိထွေးပထွေးထံက အမွေတောင်းခံခွင့် ရှိပါသလား ဆရာ''
''အေး- ဒါနဲ့ ပတ်သက်လို့ တရားရုံးချုပ် အထူးအယူခံ တရားရုံးက ဆုံးဖြတ်ထားတဲ့ ဦးမြတ်စိုးပါ လေးဦးနှင့် ဒေါ်တင်ကြည် ၂ဝဝ၅ ခုနှစ် (တရားမအထူးအယူခံ) မြန်မာနိုင်ငံ တရားစီရင်ထုံး စာမျက် နှာ ၄၂ အမှုတွင် အယူခံ တရားလို ဦးမြတ်စိုးပါ လေးဦးသည် မိခင် ရင်း ဒေါ်ကြည်လှ ကွယ်လွန်စဉ် အမွေတောင်းခံခဲ့ခြင်းမရှိသဖြင့် ၎င်းတို့၏ ဖခင် ဦးချစ်ထွေး ကွယ်လွန်သောအခါ မိခင်ထံမှ ရရှိသည့် ဝေစုအပြင် ကွယ်လွန်သူ ဖခင်၏ ဝေစုကိုလည်း မိထွေးထံမှ ရရှိခွင့် ရှိသည်လို့ ဆုံးဖြတ်ခဲ့တယ်''
''ဒါဆိုရင် မိဘတစ်ဦးဦး ကွယ်လွန်စဉ်က အမွေမတောင်းခဲ့ဘူးဆိုရင် ပထမအိမ်ထောင်က သားသမီးတွေဟာ ကျန်မိဘ ကွယ်လွန်ရင် ပထမ ကွယ်လွန်သွားတဲ့ မိဘရဲ့ ဝေစုအပြင် ကျန်မိဘ မကွယ်လွန်မီ လက်ထက်ပွား ပစ္စည်းများကိုလည်း မိထွေး ပထွေး ထံက အချိုးကျ အမွေရခွင့်ရှိတဲ့ သဘောလားဆရာ၊ နှစ်ထပ်ကွမ်း ရတဲ့သဘောဆိုရင် ဟုတ်ပါသလား ဆရာ''
''အဲဒီလို ကိစ္စတွေမှာတော့ ဖြေရှင်းရတာ ခက်တဲ့အတွက် အမှုတွေဖြစ်ကြပြီးမှ ပြီးပြတ်တတ်တာမို့ ဝယ်ဖို့ သိပ်မတိုက်တွန်းချင်ဘူး'' လို့သာ အကြံပေးလိုက်မိပါသည်။
Credit : ဈေးကွက်ဂျာနယ်
