အရပ်ထဲက ရောင်းပေါင်စာချုပ် ခိုင်မာမှုနည်းလို့ သတိပြုသင့်

အိမ်ခြံမြေဈေးကွက်ထဲမှာ အရောင်းဈေးကွက်အေးနေတာကြောင့် တချို့ကငွေပေါ်အောင် ရောင်းပေါင်စာချုပ်ချူပ်ပြီး ပေါင်နှံကြတာတွေရှိပြီး ဥပဒေအရခိုင်မာမှုမရှိတာကြောင့် သေချာစိစစ်ပြီးမှ လုပ်သင့်တယ်လို့ သိရပါတယ်။

ဘဏ်တွေမှာတရားဝင် အပေါင်ထားဖို့က လုံးချင်းအိမ်တွေလောက်သာရရှိတာကြောင့် တချို့အရပ်ထဲမှာပဲ တိုက်ခန်းတွေတန်ဖိုးနည်းမြေကွက်တွေကို အပေါင်ထားကြတယ်။ အပေါင်ထားတဲ့အခါမှာလည်း ရောင်းပေါင်စာချုပ်နဲ့ ချုပ်ဆိုရတာကြောင့် တချို့က ပြန်မရွှေးနိုင်ဘဲ ထိုးအပ်လိုက်ရတာတွေလည်းရှိတယ်လို့ သိရပါတယ်။

• 

မြေကွက်တွေကို အပေါင်ထားတဲ့သူတွေရှိသလို တိုက်ခန်းအပေါင်ထားတဲ့သူတွေလည်းရှိပါတယ် ။ စီးပွားရေးကျွမ်းကျင်သူတချို့နဲ့ ဥပဒေပညာရှင်တချို့က တိုက်ခန်းတွေကို ဘဏ်မှာတရားဝင်အပေါင်ထားနိုင်ဖို့ အာမခံချက်နည်းပါးတာတွေကို လုပ်ဆောင်ပေးဖို့ လိုအပ်နေတယ်လို့လည်း ပြောပါတယ်။

အကျိုးဆောင်ရှေ့နေဦးကျော်စွာက ‘ဥပဒေအရ တရားဝင်ပြင်ပမှာပါ ပေါင်နှံခွင့်ပေးလိုက်မယ်ဆို အပေါင်နဲ့ပတ်သက်တဲ့ အိမ်ခြံမြေ ပြဿသာနာတွေလဲ ရှင်းသွားနိုင်မယ် ၊ အခုတွေ့နေရတာတွေက အပေါင်ထားတဲ့အိမ်တွေကို ရောင်းစားတာနဲ့ ပတ်သက်ပြီး ဖြစ်နေကြတာတွေပါ ၊ အရပ်ထဲမှာအပေါင်ထားရင် စာချုပ်ကအစ တိတိကျကျလုပ်မှပဲ အဆင်ပြေနိုင်မယ်လို့’ ရှင်းပြပါတယ်။

အရပ်ထဲမှာ အပေါင်ထားတဲ့အခါ တချို့ကတန်ဖိုးရဲ့သုံးပုံတစ်ပုံငွေယူလို့ရတယ်။ အချို့က တန်ဖိုးရဲ့တစ်ဝက်လောက်အထိပေးတယ်လို့ သိရပါတယ်။ အတိုးနှုန်းက သုံးကျပ်ကနေ ခုနှစ်ကျပ်ဝန်းကျင်လောက်အထိပေးပြီး စာချုပ်ကိုခြောက်လချုပ်တာများတယ်လို့ အကျိုးဆောင်တချို့ကပြောပါတယ်။

အရပ်ထဲမှာ တိုက်ခန်းအပေါင်ထားတဲ့အခါ တချို့ကအခန်းကနေ ထွက်ပေးရသလို အရောင်းအဝယ်စာချုပ်ချုပ်ရပြီး သော့အပ်ရတယ် ။ အပေါင်ထားသူရဲ့အမည်ပေါက်ဖြစ်ရပြီး အတိုးကို သုံးကျပ်ကနေ ငါးကျပ်အထိပေးရတယ် ။ တချို့က ငွေရှင်တွေက အတိုးကို တိုးတောင်းတာတွေလည်းရှိတယ်လို့ သိရတယ်။

ဒဂုံသီးသန့်အကျိုးဆောင် မကေသီက ‘အရပ်ထဲမှာက နားလည်မှုနဲ့အပေါင်ခံကြတာ ၊ တချို့ဆို အတိုးပေါ်အတိုးဆင့်သွားပြီး မြေကွက်ကို အပ်လိုက်ရတာတွေရှိတယ် ၊ တချို့ဆို အကွက်တွေက ရောင်းမထွက် ငွေလိုနေတော့ အပေါင်ထားပြီး ပြန်မရွှေးတော့ဘဲ အဆုံးခံလိုက်တဲ့သူတွေလဲ ရှိတယ်’ လို့ပြောပါတယ်။

Credit: The Modern