အုတ်ကို ရေစိမ်ဆောက်ရန် တိုက်တွန်း

အဆောက်အဦနံရံများ ပြိုကျအက်ကွဲခြင်း မရှိစေရန် အုတ်များကို ရေစိမ်ဆောက်လုပ်ဖို့ ဧရာဝတီတိုင်း ဒေသကြီး လမ်းဦးစီးဌာန ညွှန်ကြားရေးမှူး ဦးမြင့်ကြည်က တိုက်တွန်း ပြောကြားလိုက်သည်။

အောက်တိုဘာလ (၁၇) ရက်နေ့က ပုသိမ်မြို့ ဧရာရွှေဝါခန်းမတွင် ပြုလုပ်သော ဆောက်လုပ်ရေး ကုမ္ပဏီပိုင်ရှင်များနှင့် တွေ့ဆုံပွဲတွင် အထက်ပါအတိုင်း တိုက်တွန်း ပြောကြားခဲ့ခြင်း ဖြစ်သည်။

• 

“ရေစိမ်ပြီး ဆောင်ရွက် ပေးသင့်ပါတယ်။ အဓိကအုတ်ကို ရေစိမ်ရတဲ့ အကြောင်းရင်းကတော့ အုတ်ကိုစိမ်ရင် အုတ်ရေ၀နေမယ်၊ ရေ၀ရင် မဆလာမှာရှိတဲ့ ရေနဲ့ အုတ်မှာရှိတဲ့ ရေအတူတူဖြစ်နေတဲ့ အတွက်ကြောင့် ပိုကောင်းလာမယ်”ဟု ၎င်းက ပြောသည်။

အုတ်ကို ရေမစိမ်ဘဲ ဆောက်လုပ်ပါက မဆလာဖျော်သည့်ရေကို စုပ်ထုပ်ယူပြီး အုတ်နံရံများ ကွဲအက်မှုများ ဖြစ်ပေါ်လာနိုင်သည်ဟု ဦးမြင့်ကြည်က ဆိုသည်။

ကွန်ကရစ်လောင်းရာတွင် သတ်မှတ်နှုန်းထား အရည်အသွေးများ ပြည့်မီအောင် ဆောင်ရွက်ရန်၊ မျက်နှာကြက်၊ ကြမ်းခင်း အမိုးတို့ကိုလည်း စံချိန်စံနှုန်းနှင့်အညီ ဆောင်ရွက်ရန်လည်း ဦးမြင့်ကြည်က တိုက်တွန်းပြောကြားလိုက်သည်။

စံချိန်စံညွှန်းနှင့်အညီ တည်ဆောက်ခြင်း မရှိသည့် ကုမ္ပဏီများကို နာမည်ပျက်စာရင်း (Black List) သွင်း ဆောင်ရွက်သွားမည်ဟု ဧရာဝတီတိုင်း ဒေသကြီး အစိုးရအဖွဲ့က ယင်းနေ့ကပင် ပြောကြားလိုက်သည်။

ယမန်နေ့က ပြုလုပ်သော တွေ့ဆုံပွဲသို့ ဧရာဝတီတိုင်း ဒေသကြီးအတွင်း တင်ဒါ ခေါ်ယူထားသည့် ဆောက်လုပ်ရေး ကုမ္ပဏီ ပိုင်ရှင်နှင့် မန်နေဂျာ စုစုပေါင်း (၆၀၀) ခန့် တက်ရောက်ခဲ့သည်။

Credit: messenger