ရန်ကုန်မြို့ ဒဂုံမြို့သစ်တောင်ပိုင်း အငှားအိမ်ရာ စီမံကိန်းအတွက် ငှားရမ်းမည့်နှုန်းထားများ ညှိနှိုင်းနေ

ရန်ကုန်မြို့၌ နေထိုင်သည့် အိမ်ရာမ၀ယ်နိုင်သူများအတွက် ရည်ရွယ်သည့် အငှားအိမ်ရာ စီမံကိန်း၌ အခန်းပေါင်း ၂၀၀၀ ခန့် ပါဝင်မည်ဖြစ်ဖြစ်ကြောင်း ရန်ကုန်တိုင်းဒေသကြီး အစိုးရအဖွဲ့မှ သိရသည်။

အဆိုပါအိမ်ရာကို ဒဂုံမြို့သစ် တောင်ပိုင်းမြို့နယ် အမှတ် (၂) လမ်းမကြီးနှင့် မဟာဗန္ဓုလလမ်းထောင့်ရှိ မြေ ၁၂ ဧကကျော်တွင် အကောင်အထည်ဖော်မည်ဖြစ်ကြောင်း၊ ယင်းအိမ်ရာစီမံကိန်း အကောင်အထည်ဖော်ရန်အတွက် ယခုဘဏ္ဍာနှစ်အတွက် ပြည်ထောင်စုအစိုးရအဖွဲ့က ကျပ် ဘီလျံ ၂၀ ထောက်ပံ့ခဲ့ပြီး ရန်ကုန်တိုင်းဒေသကြီး အစိုးရအဖွဲ့က အကောင်အထည်ဖော်မည်ဖြစ်ကာ ရန်ကုန်တိုင်းဒေသကြီးအတွင်း ပထမဆုံး အကောင်အထည်ဖော်မည့် အငှားအိမ်ရာ စီမံကိန်းဖြစ်ကြောင်း သိရသည်။

• 
• 

“၄၈ ခန်းတွဲပါဝင်တဲ့ တိုက်ပေါင်း အလုံး ၄၀ လောက်ဆောက်မှာပါ။ အခန်းအနေနဲ့ကတော့ ၂၀၀၀ ၀န်းကျင်လောက် ရှိမယ်။ အဓိက အိမ်မ၀ယ်နိုင်တဲ့သူတွေအတွက် ရည်ရွယ်ပါတယ်” ဟု ရန်ကုန်တိုင်းဒေသကြီး အစိုးရအဖွဲ့မှ တာဝန်ရှိသူတစ်ဦးက ဆိုသည်။
ယင်းအိမ်ရာစီမံကိန်းကို ပုဂ္ဂလိက ကုမ္ပဏီများကို ဆောက်လုပ်ခွင့်ပေးရန် တင်ဒါစတင် ခေါ်ယူထားပြီး အိမ်ရာအား ငှားရမ်းမည့် စည်းမျဉ်းစည်းကမ်းများနှင့် မည်သည့်နှုန်းထားဖြင့် ငှားရမ်းပေးမည် ဆိုသည်ကို ညှိနှိုင်းနေကြောင်း၊ သို့သော် ငှားရမ်းနေထိုင်သူများ ၀န်ထုပ်ဝန်ပိုး မဖြစ်စေရန် တစ်လတစ်ခါ အိမ်ငှားခပေးသွင်းသည့် စနစ်ဖြင့် ငှားရမ်းနေထိုင်ခွင့် ပေးသွားမည်ဟု သိရသည်။

ယင်းအိမ်ရာစီမံကိန်း အကောင်အထည်ဖော်မည့် မြေနေရာကို ဆောက်လုပ်ရေးဝန်ကြီးဌာန၊ မြို့ရွာနှင့်အိုးအိမ် ဖွံ့ဖြိုးမှု ဦးစီးဌာနမှ ရန်ကုန်တိုင်းဒေသကြီး အစိုးရအဖွဲ့သို့ လွှဲပြောင်းပေးခဲ့ခြင်းဖြစ်ကြောင်း၊ ယင်းနေရာတွင် လက်ရှိကျူးကျော်အိမ်ခြေ အနည်းငယ်ရှိနေပြီး ၎င်းတို့ကို ရှင်းလင်းသွားမည်ဟု သိရသည်။

“ဒီနေရာက အိမ်ရာစီမံကိန်းဖော်ဆောင်မယ့် နေရာလို့တော့ ပြောတယ်။ အစ်ကိုတို့က ဒီမှာနေတာ ၁၅ နှစ်ကျော်နေပါပြီ။ အခုထိတော့ ဒီနေရာကဖယ်ဖို့ မပြောသေးဘူး။ ဒါပေမဲ့ စာရင်းတော့ ကောက်ခိုင်းထားတယ်။ နေစရာ မရှိတဲ့အတွက် ဖယ်ခိုင်းရင်တော့ အစ်ကိုတို့ကို အခြားမှာ နေရာလေးပြန်ပေးပါလို့ သက်ဆိုင်ရာကို ပြောချင်ပါတယ်” ဟု အဆိုပါနေရာတွင် ကျူးကျော်နေထိုင်သူ တစ်ဦးက ပြောကြားသည်။

ရန်ကုန်မြို့သို့ အခြေအနေ အမျိုးမျိုးကြောင့် နယ်မှ ပြောင်းရွှေ့အခြေချ နေထိုင်သူဦးရေ မြင့်တက်လာပြီး အိမ်ရာဈေးနှုန်းများ မြင့်တက်မှုကြောင့် အိမ်ရာပိုင်ဆိုင်ရန် များစွာအလှမ်းဝေးနေကြောင်း၊ ထို့ပြင် အခြေခံပြည်သူများအတွက် ရည်ရွယ်သည့် တန်ဖိုးနည်းအိမ်ရာများမှာ ဈေးနှုန်းကြီးမြင့်နေသည့်အတွက် မ၀ယ်နိုင်ကြသေးဘဲ အငှားအိမ်ရာ စီမံကိန်းများ အကောင်အထည်ဖော်နိုင်မှသာ အဆင်ပြေမည်ဖြစ်ကြောင်း သုံးသပ်မှုများ ရှိနေသည်။


Credit: eleven media group