အိမ်၊ခြံ၊မြေ အရောင်းအ၀ယ်ပြုလုပ်ပါက တစ်လအတွင်း အခွန်ဆောင်ရမည်

အိမ်၊ခြံ၊မြေ ဂဏ္ဍအတွင်းရှိ မြေ၊ အဆောက်အအုံ၊ တိုက်ခန်းစသည့် ပစ္စည်းတစ်ခုခုကို ရောင်းချခြင်း၊ လဲလှယ်ခြင်းနှင့် အခြားတစ်နည်းနည်းနှင့် လွှဲပြောင်းရယူသူများမှာ တစ်လအတွင်း ကာလတန်ဖိုးစိစစ်ခြင်း၊ ၀င်ငွေကြေငြာလွှာတင်ခြင်း၊ ကျသင့်အခွန်ပေးဆောင်ခြင်းတို့ ပြုလုပ်ရမည်ဖြစ်ကြောင်း ပြည်တွင်းအခွန်များဦးစီးဌာနထံမှ သိရသည်။

ဝယ်သူရော၊ ရောင်းချသူပါ အခွန်ပေးဆောင်ရမည်ဖြစ်ပြီး ၀ယ်ယူသည့်ငွေကြေးအတွက် မိမိမည်ကဲ့သို့ရရှိခဲ့သည်ကို အတိအကျ ရှင်းလင်းတင်ပြရမည်ဖြစ်ကာ တင်ပြနိုင်ခြင်းမရှိပါက စည်းကြပ်မှုမှ ကင်းလွတ်နေသော ၀င်ငွေအပေါ် ကျသင့်ဝင်ငွေခွန်ထပ်မံ ပေးဆောင်ရမည်ဖြစ်ကြောင်း အဆိုပါဌာနထံမှသိရသည်။

“အခွန်နှုန်းထားကတော့ အခုအသစ်ပြင်ဆင်ပြဋ္ဌာန်းလိုက်သည့် နှုန်းထားအတိုင်းပါပဲ။ မဆောင်တဲ့သူတွေကိုတော့ အခွန်ဥပဒေပါအတိုင်း အရေးယူဆောင်ရွက်သွားမှာပါ”ဟု အဆိုပါဌာနမှ အကြီးတန်းအရာရှိတစ်ဦးက ပြောဆိုသည်။

သို့သော်အခွန်မဆောင်သူများနှင့် အခွန်ရှောင်သူများ အိမ်၊ခြံ၊မြေ ဈေးကွက်အတွင်း များပြားနေဆဲဖြစ်ကြောင်း အိမ်၊ခြံ၊မြေ အကျိုးဆောင်များက ပြောကြားသည်။

“သူတို့တွေက ဒီလိုထုတ်ပြန်နေပေမယ့် တချို့ကျတော့ အခွန်ဆောင်ရမယ်ဆိုတာ လုံးလုံးမသိလို့ မဆောင်ကြဘူး။ တချို့ကျတော့ မသိချင်ယောင်ဆောင်ပြီး နေလိုက်ကြသည်။ တချို့ကျတော့ SP/GP (Special Power/ General Power) ကိုင်ပြီး နေနေကြတာများတယ်”ဟု အိမ်၊ခြံ၊မြေအကျိုးဆောင် ဦးဟိန်းမိုးမြင့်လွင်က ရှင်းပြသည်။

Credit : The Voice Daily