အိမ်ခြံမြေနှင့် ဆောက်လုပ်ရေးလုပ်ငန်းများ ငွေစတင်ကျပ်

ရန်ကုန်မြို့ကောင်းကင်တွင် မီးခိုးလည်းမထွက်၊ ဖုန်လည်းမတွေ့ရခြင်းက စီးပွားရေးတိုးတက်မှုမှာ ယုံကြည်စရာမရှိကြောင်း မြန်မာနိုင်ငံ၏ နာမည်ကျော်သူဌေးတစ်ဦးဖြစ်သူ ဦးတေဇက သတင်းစာ ရှင်းလင်းပွဲ၌ ပြောခဲ့သည်။ မီးခိုးများကို တွေ့မြင်ရခြင်းသည် စက်ရုံအလုပ်ရုံများစွာပေါ်လာသည့် သင်္ကေတဖြစ်ပြီး လမ်းမများတွင် ဖုန်တထောင်းထောင်း ထနေခြင်းမှာ ဆောက်လုပ်ရေးလုပ်ငန်းများ အပြိုင်အဆိုင်လုပ်ကိုင်မှု၏ သင်္ကေတဖြစ်ကြောင်း ၎င်းက သတင်းထောက်များအား လွန်ခဲ့သော ဇန်န၀ါရီ ၁၉ ရက် ညနေက ရှင်းပြသည်။

၂၀၁၅ သည် မြန်မာနိုင်ငံတွင် ရွေးကောက်ပွဲကျင်းပရန်ရှိနေခြင်း၊ ဆန္ဒပြပွဲများနှင့် နိုင်ငံရေးမတည်ငြိမ်မှုများကြောင့် နိုင်ငံခြားရင်းနှီးမြှုပ်နှံမှုများ ၀င်ရောက်ရန် စောင့်ကြည့်နေသည့် အချိန်ဖြစ်နေခြင်း၊ မြန်မာနိုင်ငံအိမ်ခြံမြေဈေးကွက်တွင် ကစားနေသော တရုတ်နိုင်ငံမှ ငွေများ ထိန်းချုပ်ခံရခြင်းတို့ကြောင့် ပြည်တွင်းစီးပွားရေးလုပ်ငန်းများမှ ငွေကြေးကျပ်တည်းမှုများနှင့် ကြုံတွေ့လာသည်။

ငွေကြေးလည်ပတ်မှု နှေးကွေးလာခြင်းသည် အခြားသော စီးပွားရေးလုပ်ငန်းများထက် ဆောက်လုပ်ရေးလုပ်ငန်းများပေါ်တွင် သိသာစွာရိုက်ခတ်လာသည်။

‘‘ငွေဖြူ၊ ငွေမည်းပြဿနာက စီးပွားရေးတစ်ခုလုံးကို ထိုင်းမှိုင်းစေတယ်’’ဟု မြမြင့်မိုရ်ဆောက်လုပ်ရေးလုပ်ငန်းရှင်ကပြောသည်။

၂၀၁၄ နှစ်ကုန်တွင် တရုတ်အစိုးရက တရုတ်နိုင်ငံ၌ လာဘ်ပေးလာဘ်ယူတိုက်ဖျက်ရေးကို အရှိန်မြှင့်ဆောင်ရွက်ခဲ့ပြီး မြန်မာနိုင်ငံနှင့် ချိတ်ဆက်နေသော ဘဏ်စာရင်းများစွာကိုပိတ်ပစ်ခဲ့သည်။ ထို့အပြင် တရုတ်နိုင်ငံမှ လာဘ်ပေးလာဘ်ယူ တိုက်ဖျက်ရေးစီမံကိန်းကြောင့် ၂၀၁၄မှ စတင်ကာ ကျောက်စိမ်း အရောင်းအ၀ယ်မှာ အေးစက်သွားသည်။ အကျိုးဆက်အနေဖြင့် မြန်မာနိုင်ငံ အိမ်ခြံမြေဈေးကွက်တွင် ငွေလည်ပတ်မှုနှေးကွေးသွားပြီး အရောင်းအ၀ယ်များအေး၍ ဈေးနှုန်းပါကျဆင်းလာသည်။

အိမ်ခြံမြေဈေးကွက်နှင့် ဆက်စပ်၍ တည်ဆောက်ရေးလုပ်ငန်းများတွင်လည်း ငွေကြေးကျပ်တည်းမှုဖြစ်လာသည်။ တည်ဆောက်ရေးလုပ်ငန်းများတွင်လည်း ငွေကြေးအရင်းအနှီးလိုအပ်ခြင်း၊ အခန်းကြိုတင်ဝယ်ယူထားသူများမှာလည်း အရောင်းအ၀ယ်အေး၍ ငွေလည်ပတ်မှုနှေးသွားပြီဖြစ်သည်။

‘‘ကန်ထရိုက်တချို့ဆို စာချုပ်ချုပ်ခါနီးမှ ငွေမရှိလို့စာချုပ် မချုပ်ဖြစ်တာတွေအများကြီးဖြစ်လာပြီ’’ဟု အကယ်ဒမီဆောက်လုပ်ရေးမှ လုပ်ငန်းရှင်ဦးမြင့်ကြိုင်က သူ၏အမြင်ကို ပြောကြားသည်။

ယခင်စစ်အစိုးရလက်ထက်မှစတင်၍ အရောင်းအ၀ယ်ကောင်းပြီိး ဈေးတက်ခဲ့သော အိမ်ခြံမြေဈေးကွက်မှာ အစိုးရသစ်သက်တမ်း နောက်ဆုံးနှစ်မရောက်မီထိ ဆက်တိုက်အလုပ်ကောင်းခဲ့သည်။ သို့သော် ယခုလပိုင်းအတွင်း အိမ်ခြံမြေဈေးကွက်ငွေလည်ပတ်မှု နှေးကွေးလာခြင်းကြောင့် အိမ်ခြံမြေကစားသူအချို့သည် ဘဏ်၌ အပေါင်ထားငွေချေးပြီး ထပ်မံရင်းနှီးမြှုပ်နှံမှုများ ပြုလုပ်ကြသည်။ အိမ်ခြံမြေဈေးကွက်ပြိုဆင်းပါက ဘဏ်များထိခိုက်နိုင်မည်ကို စီးပွားရေးလုပ်ငန်းရှင်များက စိုးရိမ်နေသည်။ အကြောင်းမှာ အိမ်ခြံမြေဈေးကစားသူ အများစုသည် ဘဏ်တွင် အိမ်မြေကိုအပေါင်ထားပြီး ငွေချေးနေကြ၍ဖြစ်သည်။

• 
• 

အိမ်ခြံမြေဈေးကွက်ပြိုလဲသည်အထိ ဖြစ်လာပါက တိုင်းပြည်စီးပွားရေး ထိခိုက်လာနိုင်သည်။ ၂၀၀၈ အမေရိကန်အိမ်ခြံမြေဈေးကွက်ပြိုလဲမှုကြောင့် နိုင်ငံအတွင်းမှ ဘဏ်ကြီးများဒေ၀ါလီခံခဲ့ရပြီး ကမ္ဘာ့စီးပွားရေးပျက်ကပ်ဖြစ်ခဲ့သည်။ အမေရိကန်အစိုးရက ကြားဝင်ထိန်းပေးသော်လည်း ယနေ့ထိ ကောင်းစွာနာလန်မထူနိုင်သေးပေ။ ယင်းကြောင့် တရုတ်နိုင်ငံမှောင်ခိုငွေများဝင်ရောက်မှု တုံ့နှေးသွားချိန်တွင် အိမ်ခြံမြေဈေးပြိုနိုင်သည်ကို သတိပြုရန်လိုနေသည်။

တရုတ်နိုင်ငံမှ ငွေကြေးစီးဆင်းမှုသည် အိမ်ခြံမြေဈေးကွက်တစ်ခုသာမက အခြားသောကဏ္ဍများသို့လည်း စီးဆင်းသောကြောင့် အကျိုးသက်ရောက်မှုရှိကြောင်း စီးပွားရေး သမားများက ပြောနေကြသည်။ နှစ်နိုင်ငံကုန်သွယ်ရေးတွင် နယ်စပ်ကုန်သွယ်ရေးက ပိုများနေပြီး တရားမ၀င်ဟွန်ဒီမှ ငွေလွှဲမှုများမှာလည်း တရုတ်နိုင်ငံမှ ၀င်ရောက်မှုမှာ အများဆုံး ဖြစ်နေကြောင်း ငွေလွဲဝန်ဆောင်မှုလုပ်ကိုင်သူတစ်ဦးက ရှင်းပြသည်။ လက်ရှိ တရုတ်နိုင်ငံမှ တရားမ၀င် ငွေဝင်ရောက်မှုများမှာ များစွာလျော့နည်းသွားသည်။ ၂၀၁၄ နှစ်လယ်အထိ တရုတ်နိုင်ငံမှ
ဟွန်ဒီဖြင့် တရားမ၀င်ငွေလွှဲမှုမှာ တစ်ရက်လျှင် ကန်ဒေါ်လာတစ်သန်းမှ နှစ်သန်းကြားရှိခဲ့ကြောင်း ငွေကြေးဈေးကွက်ကျွမ်းကျင်သူများက သုံးသပ်ပြောကြားသည်။

‘နိုင်ငံခြားငွေဝင်လာရင် ပြည်တွင်းမှာ ငွေကျပ်မှာပဲ။ ငွေလည်ပတ်မှုကျပ်ရင်တော့ စီးပွားရေးယိမ်းယိုင်သွားမှာ စိုးရိမ်ရတယ်’’ဟု ကမ္ဘောဇဘဏ်အကြီးတန်းအကြံပေး ဦးသန်းလွင်ကပြောသည်။

နိုင်ငံခြားမှ တရားမ၀င်ငွေကြေးများ၊ ရင်းနှီးမြှုပ်နှံမှုငွေကြေးများ ၀င်ရောက်လာလျှင်လည်း ပြည်တွင်း၌ ကျပ်ငွေဖြင့် ပြန်လည်လဲလှယ်အသုံးပြုရသောကြောင့် ငွေကျပ်မှုများဖြစ်ပွားနိုင်သည်။ သို့သော် မြန်မာနိုင်ငံ၏ အခြေအနေသည် ယင်းသို့မဟုတ်ဘဲ နိုင်ငံခြားငွေဈေးတက်ချိန်တွင် ဗဟိုဘဏ်က အမေရိကန်ဒေါ်လာကို ဈေးကွက်တွင်းထည့်၍ ကျပ်ငွေပြန်သိမ်းယူသည့်ပုံစံမျိုး ပြုလုပ်ခြင်းကလည်း လှည့်လည်သုံးစွဲနေသော ငွေကြေးနည်းသွားစေကြောင်း ၎င်းကပြောကြားသည်။

ငွေကြေးကျပ်တည်းမှုသည် နိုင်ငံသားများသာမက အစိုးရမှာလည်း ကြုံတွေ့နေရသည်။ နိုင်ငံတော်ဘတ်ဂျက်တွင် လိုငွေကြီးမားနေခြင်း၊ လွှတ်တော်ကိုယ်စားလှယ်များ ရုတ်တရက်လစာတိုးပေးရခြင်း၊ အစိုးရ၀န်ထမ်းများကို လစာတိုးပေးရန်ရှိနေခြင်း၊ နိုင်ငံတော်၏ စီးပွားရေးတစ်ခုဖြစ်သော ပြည်ပသို့ သဘာဝဓာတ်ငွေ့တင်ပို့မှုမှာ ဈေးနှုန်းကျဆင်းခြင်းကြောင့် ၀င်ငွေနည်းခြင်း၊ ဆက်သွယ်ရေးလုပ်ငန်းများမှ ရငွေနည်းပါးခြင်းစသော အခက်အခဲများ ရှိနေကြောင်း နိုင်ငံတော်သမ္မတဦးသိန်းစိန်က အတိအလင်းပြောကြားထားသည်။

အစိုးရကလိုအပ်နေသော ငွေများရရှိရန် ပြည်သူများထံမှ ငွေချေးသောစနစ်တစ်ခုဖြစ်သည့် ငွေတိုက်စာချုပ်များကို လေလံစနစ်ဖြင့် အများပြည်သူအားရောင်းချလာခြင်း၊ အခွန်ငွေများစွာကိုဖန်တီးကောက်ယူလာခြင်းတို့ ပြုလုပ်လာသည်။

ထို့အပြင် အစိုးရ၏ အခွန်အကောက်များ တစ်နှစ်ထက်တစ်နှစ် တိုးတက် လာမှုသည် ပြည်တွင်းလုပ်ငန်းရှင်များအတွက် ၀န်ထုပ်ဝန်ပိုးဖြစ်လာသည်ဟု လုပ်ငန်းရှင်များကဆိုသည်။ အစိုးရအနေဖြင့် ပြည်တွင်းလုပ်ငန်းရှင်များ ကူညီပံ့ပိုးမှုမပေးဘဲ အခွန် တိုးကောက်ကာ ဖိစီးမှုသာ များစေသည်ဟုဆိုသည်။ လုပ်ငန်းအမြတ်ငွေမှာ တစ်နှစ်ထက်တစ်နှစ် မတက်လာသော်လည်း အခွန်ပေးဆောင်ရသည့် ပမာဏမှာ တစ်နှစ်ထက်တစ်နှစ် များလာသဖြင့် ငွေကြေးကျပ်တည်းမှုများ ကြုံလာသည်။ လုပ်ငန်းတစ်ခုကို နှစ်စဉ်မတိုးချဲ့နိုင်သော်လည်း အခွန်နှုန်းထားများမှာ တစ်နှစ်ထက်တစ်နှစ် ၁၀ ရာခိုင်နှုန်းခန့် ပိုပေးနေရကြောင်း လှိုင်သာယာစက်မှုဇုန်(၁)မှ ကြာဆံလုပ်ငန်းရှင်တစ်ဦးက သူ၏အခက်အခဲကို ပြောလာသည်။

‘‘အခုအခက်အခဲက အေအီးစီ (အာဆီယံလွတ်လပ်စွာကုန်သွယ်မှုနယ်မြေ) ထူထောင်မှုကို မြန်မာစ၀င်ရင် ဒီကလူတွေ ပိုင်ဆိုင်မှုတွေစွန့်ရမှာပဲ။ ဈေးကွက်မရှိ၊ နည်းပညာမရှိ၊ အရင်းအနှီးနည်းပြီး အခွန်မျိုးစုံနဲ့ ဖိထားတော့ ရုန်းထဖို့မလွယ်ဘူး’’ဟု လှိုင်သာယာစက်မှုဇုန်စီမံခန့်ခွဲမှုကော်မတီဥက္ကဋ္ဌ ဦးမြတ်သင်းအောင်ကပြောကြားသည်။

လူအများဘဏ်ကို ယုံကြည်မှုတိုးတက်လာသကဲ့သို့ ပုဂ္ဂလိကဘဏ်များဘက်ကလည်း အပ်ငွေအပေါ် အတိုးနှုန်းကို အပြိုင်အဆိုင် မြှင့်တင်လာသည်။ နိုင်ငံတစ်ခုတွင် ငွေကြေးဖောင်းပွပါက ဘဏ်တိုးနှုန်းမြှင့်ပေးပြီး ငွေစုရန် တွန်းအားပေးသောနည်းကို အသုံးပြုကြသည်။ ယင်းမှာ စီးပွားရေးပညာအရ ငွေကြေးဖောင်းပွဲမှုကို ထိန်းချုပ်သော သီအိုရီတစ်ခုဖြစ်သည်။ သို့သော် မြန်မာနိုင်ငံတွင် ငွေကြေးဖောင်းပွမှုသည် ၂၀၁၄ နှစ်ကုန်တွင် အမေရိကန်ဒေါ်လာတန်ဖိုးမြင့်တက်မှသာ ပြည်တွင်း၌ စတင်ခံစားလာရသည်။ ယင်းအချိန်မတိုင်မီက ဘဏ်အပ်ငွေ အတိုးနှုန်းများကို မြှင့်ခဲ့သဖြင့် ဘဏ်တွင်သာ ငွေများ သွားစုနေသောကြောင့် ငွေလည်ပတ်စီးဆင်းမှု နှေးကွေးရခြင်း အကြောင်းရင်းတစ်ခု ဖြစ်လာသည်။

ငွေကြေးကျပ်တည်းမှုသည် စီးပွားရေးဖွံ့ဖြိုးမှုကို ဆွဲထားသော အကန့််အသတ်အတားအဆီးတစ်ခု ဖြစ်သောကြောင့် ယင်းကိုအစိုးရ၏ ငွေကြေးဆိုင်ရာအဖွဲ့အစည်းများမှ ဖြေလျှော့ရန် စဉ်းစားဆောင်ရွက်သင့်ကြောင်း ဦးသန်းလွင်က အကြံပြုသည်။ ငွေကြေး ကျပ်တည်းမှုကြောင့် ၀ယ်နိုင်အား လျော့နည်းပြီး ထုတ်ကုန်များ ဈေးလျှော့ရောင်းရမှုများဖြစ်လာပြီး ကုန်ပစ္စည်းဈေးနှုန်းများ ကျဆင်းကာ ငွေကြေးဖောင်းပွမှု လျော့နည်းသွားနိုင်ကြောင်း ပညာရှင်များက ပြောသည်။

‘‘ဒါက အစိုးရက လုပ်တာပဲလေ။ လစာတိုးရင်ကုန်ဈေးနှုန်းတက်မှာစိုးလို့ ထိန်းတဲ့ပုံစံမျိုးပဲ’’ဟု စီးပွားရေးပညာရှင်ဦးလှမောင်ကမူ သူ့အမြင်ကိုပြောသည်။

နိုင်ငံတော်အစိုးရသည် ၂၀၁၅ ဧပြီတွင် လွှတ်တော်ကိုယ်စားလှယ်များအား လစာတိုးပေးရန်ရှိနေပြီး၊ ၀န်ထမ်းများအား လစာတိုးပေးရန် စီစဉ်နေသည်။ သို့သော် လစာတိုးပေးလျင် ကျွဲကူးရေပါသကဲ့သို့ ကုန်ဈေးနှုန်းလည်း အမြဲမြင့်တက်လေ့ရှိသည်။ ယခုနှစ်တွင် ယင်းဖြစ်စဉ်ကိုထိန်းရန် အစိုးရက လက်ရှိအချိန်တွင် ငွေကြေးကျပ်တည်းမှုကို ပြုလုပ်ခြင်းဟု ဦးလှမောင်က သုံးသပ်သည်။ လက်ရှိ ငွေကြေးကျပ်တည်းမှုသည် ၀န်ထမ်းများ လစာတိုးပြီးချိန်တွင် တစ်စိတ်တစ်ပိုင်း ပြေလည်သွားနိုင်ကြောင်း ၎င်းကပြောလာသည်။

ငွေကြေးလည်ပတ်စီးဆင်းမှုနှေးကွေးပြီး ငွေကျပ်တည်းမှုဖြစ်ရခြင်းကို ဖြေရှင်းမှုသည် ဗဟိုဘဏ်က ဦးဆောင်ပြီး ပြည်တွင်းမှ ဘဏ်များနှင့် ပူးပေါင်းဆောင်ရွက်ရန်လိုကြောင်း စီးပွားရေးပညာရှင်များက သုံးသပ်သည်။ ငွေကြေးကျပ်တည်းမှုကို လေ့လာရာတွင်လည်း ရေရှည်ကြုံတွေ့နေရခြင်းမျိုးလား၊ ရေတိုပဲကြုံတွေ့နိုင်မည့်အခြေအနေမျိုးလား ဆိုသည့်အချက်ကို သတိထားသင့်ကြောင်း နိုင်ငံတော်သမ္မတ စီးပွားရေးအကြံပေး ဒေါက်တာအောင်ထွန်းသက်က ပြောကြားသည်။

လက်ရှိ မြန်မာနိုင်ငံကို နိုင်ငံခြားရင်းနှီးမြှုပ်နှံမှု ၀င်ရောက်မှုသည် မြန်မာနိုင်ငံရင်းနှီးမြှုပ်နှံမှုကော်မရှင်စာရင်းတွင် တစ်နှစ်ထက်တစ်နှစ် ပိုမိုတိုးတက်လာသော်လည်း လုပ်ငန်း အကောင်အထည်ဖော်မှုမှာ နှေးကွေးနေသည်။

၂၀၁၅ သည် မြန်မာနိုင်ငံတွင် နိုင်ငံရေးအရ ကြီးမားသောစမ်းသပ်မှုကြီးဖြစ်သည့် ရွေးကောက်ပွဲကြီးရှိနေသည်။

လက်ရှိအချိန်တွင် ပြည်တွင်း ပြည်ပမှ စီးပွားရေးလုပ်ငန်းရှင်များက ယင်းရွေးကောက်ပွဲကို စောင့်ကြည့်နေရသဖြင့် စီးပွားရေးတုံ့နှေးသော နှစ်တစ်နှစ်ဖြစ်နေသည်။

Credit: 7 day daily