ရပ်ဆိုင်းထားသော ထားဝယ်အထူးစီးပွားရေးဇုန် စီမံကိန်းလုပ်ငန်းများ အောက်တိုဘာလတွင် ပြန်လည်စတင်မည်

ထားဝယ်အထူးစီးပွားရေးဇုန် စီမံကိန်းအတွက် လမ်းဖောက်လုပ်နေသည်ကို တွေ့ရစဉ်။ ထားဝယ်အထူးစီးပွားရေးဇုန် စီမံကိန်းတွင် ပါဝင်သည့် စီမံကိန်းခုနစ်ခုအတွက် ကန်ဒေါ်လာ ရှစ်ဘီလျံကုန်ကျမည်ဖြစ်သည်။ ဓာတ်ပုံ – မဇ္ဈိမ

ရပ်ဆိုင်းထားသော ထားဝယ်အထူးစီးပွားရေးဇုန် လုပ်ငန်းစီမံကိန်းများကို အောက်တိုဘာလတွင် ပြန်လည် စတင်နိုင်ရန် ဆောင်ရွက်သွားမည်ဖြစ်သည်ဟု ထားဝယ်အထူးစီးပွားရေးဇုန် စီမံခန့်ခွဲမှုကော်မတီ ဥက္ကဋ္ဌ ရထားပို့ဆောင်ရေးဝန်ကြီးဌာန ဒုတိယ၀န်ကြီး ဦးဟန်စိန်က သြဂုတ် ၁၈ ရက်တွင် မီဒီယာအချို့ကို ထုတ်ဖော်ပြောကြားလိုက်သည်။

ထိုသို့ဆောင်ရွက်နိုင်ရေးအတွက် လက်ရှိလုပ်ကိုင်နေသည့် ထိုင်းနိုင်ငံမှ အီတာလျံထိုင်း အများပိုင်ကုမ္ပဏီလီမိတက် ITD နှင့် ဂျပန်နိုင်ငံမှ ကုမ္ပဏီ တစ်ခုတို့ကို ရွေးချယ်ကာ တင်ဒါခေါ်ယူထားပြီး (Selective Tender) လုပ်ကိုင်ခွင့်ရွေးချယ်မှုအဆင့် ပြီးဆုံးသွားပါက လုပ်ငန်းများကို ပြန်လည်စတင်မည်ဟု ပြောသည်။

ဒုတိယ၀န်ကြီး ဦးဟန်စိန်က “ထားဝယ်အထူးစီးပွားရေးဇုန်ရဲ့ ရပ်ထားတဲ့ စီမံကိန်းတွေကို ပြန်စဖို့အတွက် ကုမ္ပဏီတွေကို တင်ဒါခေါ်ထားတယ်။ ကုမ္ပဏီ နှစ်ခုကိုပဲ ရွေးချယ်ပြီး တင်ဒါခေါ်ထားတယ်။ အဲဒါတွေကိုလည်း ပွင့်လင်းရာသီဖြစ်တဲ့ အောက်တိုဘာ၊ နိုဝင်ဘာထဲမှာ ပြန်စနိုင်အောင် လုပ်သွားမှာပါ။ အမြန်ဆုံး ပြန်စနိုင်တာကတော့ အကောင်းဆုံးပေါ့။ အဲဒါမှ ၀င်လုပ်တဲ့သူတွေအတွက် အချိန်များများရမှာ” ဟု ပြောသည်။

အဆိုပါ တင်ဒါမှာမူ ခေါ်ယူထားသည့် တင်ဒါပြိုင်ကုမ္ပဏီနှစ်ခု၏ ဆုံးဖြတ်ချက်ပေါ်မူတည်ကာ လုပ်ကိုင်ခွင့်ပေးသွားမည်ဖြစ်ပြီး ကုမ္ပဏီတစ်ခုတည်းဖြင့် လုပ်ကိုင်ခြင်း သို့မဟုတ် ကုမ္ပဏီ နှစ်ခုပူးပေါင်း လုပ်ကိုင်ခြင်း နှစ်မျိုးစလုံး ဖြစ်နိုင်ဖွယ်ရှိသည်ဟု ၎င်းက ဆက်လက်ပြောသည်။

ဒုတိယ၀န်ကြီး ဦးဟန်စိန်က “ထားဝယ်အထူးစီးပွားရေးဇုန်ထဲမှာပဲ လုပ်ရမယ့် စီမံကိန်းက ခုနစ်မျိုးတောင် ရှိတယ်”ဟု ပြောသည်။

လက်ရှိတွင် ထားဝယ်အထူးစီးပွားရေးဇုန်စီမံကိန်းသည် အီတာလျံထိုင်းကုမ္ပဏီက ခွဲခြမ်းလေ့လာသုံးသပ်မှုလုပ်ငန်းစဉ် Due Diligence Assessment လုပ်ဆောင်နိုင်ရန် လုပ်ငန်းများကို ရပ်နားထားခြင်းဖြစ်သည်ဟု ဆိုသည်။ ထို့အတူ အီတာလျံထိုင်းကုမ္ပဏီကမူ ကနဦး ရင်းနှီးမြှုပ်နှံထားသော ငွေကြေးများကို ပြန်လည်ပေးလျော်သွားရန် တွက်ချက်မှုဆိုင်ရာများကို လုပ်ဆောင်နိုင်ရန်လည်း ပါဝင်သည်ဟု ဆက်လက်ပြောသည်။

ထားဝယ်အထူးစီးပွားရေးဇုန်စီမံကိန်းတွင် ကနဦး အခြေခံအဆောက်အအုံဆောက်လုပ်ခြင်း စီမံကိန်းနှင့် ဆက်လက်အကောင်အထည်ဖော်မည့် စီမံကိန်းဟူ၍ နှစ်ပိုင်းခွဲခြားထားခြင်းဖြစ်ကာ ကနဦးစီမံကိန်းကိုမူ လုပ်ငန်းစီမံကိန်း ခုနစ်ခုဖြင့် ၂၀၁၅ ခုနှစ် နှစ်ကုန်ပိုင်းပြီးစီးရန် လျာထားခြင်းဖြစ်သည်ဟု ဇုန်တည်ဆောက်ရေး အထူးလုပ်ငန်းအဖွဲ့ ဥက္ကဋ္ဌဖြစ်သူ အလုပ်သမား၊ အလုပ်အကိုင်နှင့် လူမှုဖူလုံရေးဝန်ကြီးဌာန ပြည်ထောင်စုဝန်ကြီး ဦးအေးမြင့်က မီဒီယာများကို ပြောထားသည်။

ကနဦး အကောင်အထည်ဖော် စီမံကိန်းတွင် နှစ်လမ်းသွား ကားလမ်း၊ ဆိပ်ကမ်းငယ်၊ ကနဦး စက်မှုဇုန်၊ လျှပ်စစ်ဓာတ်အားပေး စက်ရုံ၊ လူနေအဆောက်အအုံနှင့် မြို့ပြစီမံကိန်း၊ ရေပေးဝေရေးနှင့် ဆက်သွယ်ရေးလိုင်းစသဖြင့် စီမံကိန်း ခုနစ်ခု ပါဝင်ကာ ကုန်ကျစရိတ် အကြမ်းဖျင်းတန်ဖိုးမှာ ကန်ဒေါ်လာ ၈ ဘီလံယံကုန်ကျမည်ဟု ၎င်းက ပြောထားသည်။

Credit: Mizzima