အိမ်ခြံမြေပူဖောင်း ပေါက်၊ မပေါက်

စီးပွားရေးလုပ်ငန်းရှင်များ ငွေမည်းများကို ငွေဖြူပြုလုပ်ရန် အိမ်ခြံမြေပိုင်ဆိုင်မှု ဖန်တီးပေးချိန်တွင် မြေဈေးနှုန်းများမှာ မြန်မာနိုင်ငံသည် အာရှတိုက်၌ စံချိန်တင်အမြင့်ဆုံးသို့ ရောက်ရှိလာသည်။ ဦးသိန်းစိန် အစိုးရလက်ထက်တွင် နိုင်ငံစီးပွားရေးဖွံ့ဖြိုးမှုအတွက် တွန်းအားတစ်ခုဖြစ်မည့် ပြည်ပရင်းနှီးမြှုပ်နှံမှုများမှာလည်း မြေဈေးကြီးလွန်းမှုက ကြီးမားသည့် အတားအဆီးကြီးတစ်ခု ဖြစ်နေသည်။

နိုင်ငံရေးရှုပ်ထွေးမှုများ၊ ပဋိပက္ခများကြားထဲတွင် အစိုးရသစ် ဖြေရှင်းနေရချိန် မြန်မာ့စီးပွားရေးမှာ ဈေးကစားသူများ ငွေဖြူ၊ ငွေမည်း လုပ်ကိုင်သူများကြောင့် အိမ်ခြံမြေဈေး မိုးထောင်တက်နေမှုကို အစိုးရက ယခုအချိန်အထိ မထိန်းချုပ်နိုင်သေးပေ။

‘‘အစိုးရအနေနဲ့ အိမ်ခြံမြေကို ၀င်ထိန်းဖို့မလွယ်ဘူး’’ဟု နိုင်ငံတော်သမ္မတရုံး ပြည်ထောင်စုဝန်ကြီးဦးစိုးသိန်းက ပြောကြားထားသည်။

၂၀၁၁ ခုနှစ်က လှိုင်မြို့နယ် ပြည်လမ်းမပေါ်ရှိ မြေတစ်ပေပတ်လည်တန်ဖိုးမှာ ကျပ်ငါးသိန်းဝန်းကျင်ရှိရာမှ ၂၀၁၄ ခုနှစ်တွင် တစ်ပေပတ်လည်လျှင် ကျပ် ၁၂ သိန်းကျော်အထိ နှစ်ဆကျော်မြင့်တက်လာသည်။ နှစ်များစွာ အကျမရှိဘဲ ဈေး ဆက်တိုက် မြင့်တက်နေပြီး ပြည်တွင်းငွေကြေး အများစုမှာလည်း အိမ်ခြံမြေရောင်းဝယ်မှုအတွင်း၌သာ ရောက်နေပြီး လုပ်ငန်းရှင်များကြား ငွေလည်ပတ်မှုနည်းလာခြင်းမှာ အိမ်ခြံမြေပူစီဖောင်း ပေါက်တော့မည်လားဟု စီးပွားရေးအသိုင်းအ၀ိုင်းက စိုးရိမ်နေသူများရှိသည်။

အိမ်ခြံမြေဈေးကွက်မှာ ယခင်ကဲ့သို့ မြို့နယ်နေရာဒေသတစ်ခုအလိုက် မြင့်တက်ခြင်းမျိုး မဟုတ်တော့ဘဲ တစ်နိုင်ငံလုံးတွင် ဈေးနှုန်းများ မြင့်တက်လာခြင်းဖြစ်သည်။ တရားမ၀င် ငွေကြေးဝင်ရောက်မှု လွန်စွာများပြားနေပြီး စတော့အိတ်ချိန်းဈေးကွက် မရှိသေးခြင်း၊ အစိုးရသစ်လက်ထက် မူဝါဒအပြောင်းအလဲကြောင့် ကားဈေးကွက်ပျက်သွားခြင်း၊ ရွှေနှင့် ဒေါ်လာ ဈေးကွက်ပျက်သွားခြင်းနှင့် အခြားစီးပွားရေးလုပ်ငန်းများ အားမကောင်းခြင်းတို့ကြောင့် အခြားလုပ်ငန်းမျိုးစုံမှ အိမ်ခြံမြေဘက်သို့ အင်နှင့်အားနှင့် ၀င်ရောက်ရင်းနှီးမြှုပ်နှံလာကြသည်။

‘‘အိမ်ခြံမြေ၀ယ်ထားရင် ထမင်းမကျွေး၊ ရေမတိုက်ရဘူး။ ၀န်ထမ်းစရိတ်လည်း ကုန်စရာမလို၊ အိပ်နေရုံနဲ့တင် ဈေးက ဘိုးဘိုးအောင်မ,သလို နှစ်ဆတက်နေတော့ လုပ်ကြတာပေါ့’’ဟု Farmer ဖိုးရာဇာအထွေထွေဝန်ဆောင်မှု ကုမ္ပဏီလီမိတက် မန်နေဂျင်းဒါရိုက်တာ ဒေါက်တာစိုးထွန်းကပြောသည်။

စစ်အစိုးရလက်ထက် ၂၀၀၇ ခုနှစ် သြဂုတ်လမှစတင်ပြီး အိမ်ခြံမြေ၀ယ်ယူရာတွင် ငွေမည်း (တရားမ၀င်ငွေကြေး)ဖြင့် ၀ယ်ယူပါက အမည်ပေါက်ပြုလုပ်လျှင် အခွန်နှုန်းထားများကို ၁၅ ရာခိုင်နှုန်းသတ်မှတ်ပေးခဲ့သည်။ ယခင်က တရားမ၀င်ငွေကြေးဖြင့် အိမ်ခြံမြေ၀ယ်ယူပါက အမည်ပေါက်ပြုလုပ်လျှင် ၅၀ ရာခိုင်နှုန်းအထိ အခွန်ပေးဆောင်ခဲ့ရသည်။ ထို့ကြောင့် လျှော့ချလိုက်သည့် ယင်းအခွင့်အရေးကိုရယူ၍ ငွေမည်းမှ ငွေဖြူပြုလုပ်သူများသည် အိမ်ခြံမြေများ ၀ယ်ယူစုဆောင်းကြတော့သည်။

• 

အစိုးရသစ်လက်ထက် အပြောင်းအလဲများကြောင့် ပြည်ပရင်းနှီးမြှုပ်နှံမှုများ ၀င်ရောက်ရန်ရှိနေသဖြင့် ပြည်တွင်းလုပ်ငန်းရှင်ကြီးများက ၎င်းတို့နှင့်ယှဉ်ပြိုင်ရန် ထိတ်လန့်ပြီး အခက်အခဲဖြစ်စေရန် အိမ်ခြံမြေဈေးနှုန်းများ မြင့်မားရေးကို ပြုလုပ်ခဲ့ကြသည်ဟု လုပ်ငန်းရှင်အချို့က ဆိုပါသည်။ ထို့အပြင် အိမ်နီးချင်းတရုတ်နိုင်ငံကလည်း အမေရိကန်၊ အီးယူ စသော အနောက်နိုင်ငံများနှင့် ဂျပန်၊ ကိုရီးယား စသောနိုင်ငံများ လာရောက်ရင်းနှီးမြှုပ်နှံမှုများ မပြုလုပ်နိုင်ရန် ပြည်တွင်း၌ ငွေထုပ်ပိုက် ၀င်ရောက်ဝယ်ယူမှုများကြောင့် အိမ်ခြံမြေဈေးနှုန်း လွန်ကဲစွာမြင့်တက်ခဲ့ခြင်းဖြစ်ကြောင်း အကျိုးဆောင်များကဆိုသည်။

‘‘ဈေးကွက်ထဲမှာ အရောင်းအ၀ယ်အများဆုံးဖြစ်နေတာက ဈေးကစားသူအချင်းချင်းတွေပဲ ဖြစ်နေတာများတယ်’’ဟု အိမ်ခြံမြေ၀န်ဆောင်မှု လုပ်ငန်းရှင်များအသင်း အတွင်းရေးမှူးက ပြောကြားသည်။

ယင်းကဲ့သို့ အိမ်ခြံမြေဈေးကွက် ဆက်တိုက်မြင့်တက်လာမှုများကြောင့် အိမ်ခြံမြေပူဖောင်း ပေါက်တော့မည်လားဟု စိုးရိမ်သူများရှိနေသကဲ့သို့ လက်ရှိအခြေအနေအရ ပူဖောင်းမပေါက်နိုင်ဟု ထင်မြင်နေသူများလည်းရှိသည်။

စီးပွားရေးလုပ်ငန်းရှင်အများစုက ၎င်းတို့ရှိသည့် ငွေကြေးအမြောက်အမြားကို မြေ၀ယ်ယူခြင်း ဆောက်လုပ်ရေးလုပ်ငန်းများတွင် ရင်းနှီးမြှုပ်နှံထားခြင်းတို့ကြောင့် ကာလကြာရှည်လာပါက ငွေကြေးလည်ပတ်မှု နည်းပါးလာနိုင်ကြောင်း စီးပွားရေးပညာရှင်ဦးလှမောင်က သုံးသပ်သည်။

‘‘လက်ထဲမှာ ငွေလည်ပတ်မှုနည်းလာရင် အိမ်ခြံမြေပူဖောင်း မပေါက်ဘူးလို့ ဘယ်သူမှ အာမ မခံနိုင်ဘူး’’ဟု ၎င်းကပြောသည်။

အရှေ့အာရှတွင် ၁၉၉၇ ခုနှစ်က ဟောင်ကောင်၌ အိမ်ခြံမြေဈေးနှုန်းများ လွန်ကဲစွာမြင့်မားခဲ့ပြီးနောက် ရုတ်တရက် ဈေးနှုန်းများ ပြန်လည်ကျဆင်းရာမှ အိမ်ခြံမြေပူဖောင်းပေါက်ခဲ့သည့်အတွက် အာရှတစ်တိုက်လုံး စီးပွားရေးပျက်ကပ်ဆိုက်ခဲ့သည်။ တရုတ်နိုင်ငံတွင်လည်း အိမ်ခြံမြေဈေးနှုန်းများ လွန်စွာမြင့်မားလာမှုကြောင့် အခက်အခဲများစွာနှင့် ကြုံတွေ့ခဲ့ရသည်။

လက်ရှိအချိန်တွင် မြန်မာနိုင်ငံတွင် စီးပွားရေးလုပ်ငန်းများစွာ လည်ပတ်နိုင်မှု အားနည်းပြီး ငွေကြေးစီးဆင်းမှုကျပ်တည်းနေချိန်တွင် အိမ်ခြံမြေဈေးနှုန်းများ မြင့်မားသော်လည်း ပြိုကျနိုင်ခြင်းမရှိကြောင်း စီးပွားရေးလုပ်ငန်းရှင်အချို့က သုံးသပ်ကြသည်။

‘‘ငွေကျပ်တာက အလည်အလတ်လုပ်ငန်းရှင်တွေပဲ။ အိမ်ခြံမြေကစားနေတာက လုပ်ငန်းရှင်အကြီးကြီးတွေဆိုတော့ ပူဖောင်းပေါက်မှာ စိုးရိမ်စရာမရှိဘူး’’ဟု စီးပွားရေးလုပ်ငန်းရှင် ဒေါက်တာစိုးထွန်းကသုံးသပ်သည်။

လက်ရှိအချိန်၌ မြန်မာနိုင်ငံတွင် အိမ်ခြံမြေအခွန်များကို ထပ်မံလျှော့ချပေးခြင်း၊ အိမ်ခြံမြေများဝယ်ယူပါက အကျိုးအမြတ်ဆုံးရှုံးနိုင်မှုမရှိခြင်းကို လုပ်ငန်းရှင်အများစုက ယုံကြည်ထားခြင်းကြောင့် ဈေးကွက်ပျက်ရန် မဖြစ်နိုင်ကြောင်း ၎င်းကရှင်းပြသည်။

နှစ်စဉ်၊ လစဉ် အိမ်ခြံမြေဈေးနှုန်းများ မြင့်တက်လာမှုမှာ အစိုးရ၏ မူဝါဒအပြောင်းအလဲအချို့တွင်သာ ဈေးကွက်အေးသွားခြင်း၊ အရောင်းအ၀ယ်ရပ်တန့်ခြင်းမျိုးသာ ဖြစ်ဖူးပြီး ကျန်ကာလများတွင်မူ အရောင်းအ၀ယ်မှာ အမြင့်ဈေးဖြင့်ပင် ပုံမှန်ဖြစ်နေကြောင်း ကြယ်စင်မြေအိမ်ခြံမြေ အကျိုးဆောင်လုပ်ငန်းမှ အုပ်ချုပ်မှုဒါရိုက်တာကဆိုသည်။

‘‘အဓိက အရောင်းအ၀ယ်က ပုံမှန်ဖြစ်နေလို့ ၀ယ်မယ့်သူမရှိမှ ဈေးပြန်ကျမယ်။ ဒါမှ ပူဖောင်းပေါက်တယ်လို့ ပြောလို့ရမှာ။ ဒါကြောင့် ပူဖောင်းပေါက်ဖို့ဆိုတာ အခုချိန်မှာ မဖြစ်နိုင်သေးဘူး’’ဟု အထက်ပါ ဒါရိုက်တာကဆိုသည်။

ဖွံ့ဖြိုးမှုနိမ့်ကျနေသည့် မြန်မာနိုင်ငံကို ကမ္ဘာ့နိုင်ငံများက တံခါးဖွင့်စီးပွားရေးလုပ်ငန်းများအကြား အကူအညီပေးရန် ပြင်ဆင်နေချိန်တွင် မြန်မာ့အိမ်ခြံမြေဈေးနှုန်း ကြီးမြင့်လာမှုများကြောင့် ရင်းနှီးမြှုပ်နှံသူများကို အခက်အခဲဖြစ်စေပြီး ယင်းအိမ်ခြံမြေဂယက်ကြောင့်ပင် မြန်မာ့စီးပွားရေး အထနှေးနိုင်သေးကြောင်း ဂျာမနီနိုင်ငံ ကိုလုံးတက္ကသိုလ်ပါမောက္ခက သူ၏ မြန်မာ့အရေးနှင့်ပတ်သက်သော စာတမ်းတစ်စောင်တွင် ရေးသားဖော်ပြထားသည်။

အိမ်ခြံမြေဈေးနှုန်းများ လွန်ကဲစွာမြင့်မားပြီး ပြိုကျမှုများမဖြစ်စေရန် ပိုင်ဆိုင်မှုအခွန်ကို နိုင်ငံတော်အစိုးရအနေဖြင့် ဥပဒေတစ်ရပ်ပြဋ္ဌာန်းပြီး ကောက်ယူသင့်ကြောင်း၊ ဖွံ့ဖြိုးမှုအားကောင်းသည့် နိုင်ငံများမှာလည်း ယင်းအခွန်ကို ပြဋ္ဌာန်းထားရှိကြောင်း ပြည်ပသို့ ဆန်တင်ပို့နေသည့် လုပ်ငန်းရှင် ဦးမျိုးသူရအေးက အကြံပြုသည်။

တစ်နိုင်ငံလုံးအတိုင်းအတာဖြင့် ဈေးနှုန်းများမြင့်တက်လာသည့် မြန်မာ့အိမ်ခြံမြေဈေးကွက်ကို အစိုးရက ၀င်ရောက်ထိန်းသိမ်းရန် လျော့ရဲနေချိန်တွင် ငွေဖြူ၊ ငွေမည်း ဈေးကစားသူများနှင့် ငွေရှိလျှင် မြေ၀ယ်စုနေသူများကြောင့် မြန်မာ့အိမ်ခြံမြေ မည်သည့်အချိန်တွင် ပူဖောင်းပေါက်လာမည်လဲဆိုသည်ကို အမြင်မျိုးစုံ ရှုမြင်လာကြသည်။

Credit: 7 Days News