[သတို့သား ရောင်းရန်ရှိသည်] အိန္ဒိယနိုင်ငံ ဘီဟာပြည်နယ်က သတို့သား ဝယ်လို့ရတဲ့ ထူးထူးဆန်းဆန်း ဈေးတစ်ခုအကြောင်း

အိန္ဒိယနိုင်ငံ၊ ဘီဟာပြည်နယ်၊ မာဒူးဘာနီးခရိုင်တွင် ထူးဆန်းသော ဈေးတစ်ခုရှိနေသည်။

ထိုဈေးထဲတွင် အမျိုးသားတို့သည် သတို့သားလောင်းများအဖြစ် တန်းစီရပ်ပြနေကြကာ မိန်းကလေးတို့က ၎င်းတို့အား ခင်ပွန်းလောင်းအဖြစ် စိတ်ကြိုက်ရွေးချယ် ဝယ်ယူကြသည်။

ထိုဈေးကို ဒေသခံတို့က ဆူရာ့သ် ဆဘား (သတို့သားဈေး) ဟု ခေါ်ကြသည်။

ထိုဈေးသို့ မိန်းကလေးများက ၎င်းတို့၏ မိဘညီအစ်ကိုမောင်နှမများကို ခေါ်ယူလာကာ သတို့သားလောင်းကို စိတ်ကြိုက်ရွေးချယ်ကြသည်။

ဆူရာ့သ် ဆဘားဈေးသည် နှစ်ပေါင်း ၇၀၀ သက်တမ်းရှိပြီဟု ဆိုသည်။

(▲ စက်ရုံတစ်ခုတွင် မန်နေဂျာအဖြစ် လုပ်ကိုင်နေသူ နီဘွေး ချန်ဒရ ချာ အမည်ရှိ အမျိုးသားမှာ အိမ်ထောင်ဖက် ရှာဖွေသည့်အနေဖြင့် ဆူရာ့သ်ဆဘားဈေးသို့ လာရောက်ခဲ့ပြီး သတို့သမီးလောင်းကို မျှော်လင့်စောင့်စား နေသည်။ ဓာတ်ပုံ-Ismat Ara/Al Jazeera)

သတို့သားလောင်းကို မရွေးချယ်မီတွင် မိန်းကလေး၏ မိသားစုဝင်တို့က အဆိုပါအမျိုးသား၏ ပညာအရည်အချင်း၊ မိသားစုနောက်ကြောင်းအပြင် အသက်အရွယ်အထောက်အထားနှင့် အခြားစာရွက်စာတမ်းများကို စစ်ဆေးကြည့်ရှုကြသည်။

အကယ်၍ မိန်းကလေးတစ်ဦးက ဆူရာ့သ် ဆဘားဈေးရှိ သတို့သားလောင်း အမျိုးသားတစ်ဦးကို နှစ်သက်သဘောကျပြီး ရွေးချယ်ခဲ့ပါက သတို့သားလောင်း၏ မိသားစုနှင့် ဆက်လက်ဆွေးနွေးမှုများ ပြုလုပ်ရမည် ဖြစ်သည်။

ဆူရာ့သ် ဆဘားဈေးသို့ လာရောက်သည့် သတို့သားလောင်းတို့မှာ အိန္ဒိယရိုးရာ ဒိုတီနှင့် ကာတာ (ဒူးအထိရောက်သော အင်္ကျိရှည်) (သို့မဟုတ်) ဂျင်းဘောင်းဘီနှင့် ရှပ်အင်္ကျီများ ဝတ်ဆင်လာကြသည်။

ဈေးနှုန်းမှာ ၎င်းတို့၏ ပညာအရည်အချင်းနှင့် အဆင့်အတန်းတို့အပေါ် မူတည်သည်။

ဒေသခံအချို့၏ ပြောပြချက်များအရ ထိုဓလေ့မှာ ဒိုဂရာ မင်းဆက်ခေတ် မဟာရာဇာ ဟာရီဆင်း (မွေး ၁၈၉၅-ကွယ်လွန် ၁၉၆၁) က စတင်ခဲ့ခြင်း ဖြစ်သည်ဟု ဆိုသည်။

ယခုဓလေ့၏ ရည်ရွယ်ချက်မှာ မျိုးနွှယ်မတူသူများအကြား လက်ဆက်ကြစေရန် ဖြစ်သည်ဟု ဆိုသည်။

အဆိုပါဒေသတွင် နှစ်ဘက်မိဘ၏ ဆွေစဉ်မျိုးဆက် ၇ ဆက်အထိ သွေးသားတော်စပ်မှု ရှိ၊ မရှိနှင့် သွေးအုပ်စုတို့ကို စစ်ဆေးကာ သွေးသားတော်စပ်သူများ လက်ထပ်ခြင်းကို ခွင့်မပြုချေ။

(မှတ်ချက်။ သွေးအုပ်စုကို စစ်ဆေးခြင်းမှာ မွေးဖွားလာမည့် ရင်သွေးအတွက် မျှော်တွေးခြင်း ဖြစ်နိုင်သည်။ ပေါင်းစပ်၍ မရနိုင်သော သွေးအုပ်စုရှိသည့် မိဘနှစ်ဦးမှ မွေးဖွားသော ကလေးငယ်တို့တွင် ကျန်းမာရေးပြဿနာများရှိလာနိုင်သည်။ ဥပမာ - မိခင်မှာ Rh-negative (O-, A-, B-, AB-) ဖြစ်ပြီး ဖခင်မှာ Rh-positive ဖြစ်နေပါက ကလေးမွေးဖွားချိန်တွင် မိခင်၏ ကိုယ်ခံအားစနစ်က anti-Rh antibodies များ ထုတ်လုပ်ကာ ကလေးငယ်၏ သွေးနီဆဲလ်တို့ကို တိုက်ခိုက်လေ့ရှိသည်။ ထို့ကြောင့် ပြင်းထန်သော သွေးအားနည်းရောဂါ၊ အသားဝါ၊ ဦးနှောက်ထိခိုက်ခြင်း၊ မျိုးဗီဇ ဖောက်လွဲဖောက်ပြန်ဖြစ်ခြင်းနှင့် လျှောမွေးတို့ ဖြစ်နိုင်သည်။ ထို့အပြင် ABO သွေးတို့ သဟဇာတမဖြစ်မှုလည်း ရှိသေးသည်။ မိခင်မှာ အိုသွေးဖြစ်ပြီး ကလေးငယ်မှာ ဖခင်ထံမှ A သို့မဟုတ် B သွေး အမွေဆက်ခံရပါက သွေးနီဥပေါက်ကွဲသည့် အပျော့စား သွေးအားနည်းရောဂါ ဖြစ်နိုင်သည်။ ထိုမှတဆင့် မွေးကင်းစ ကလေးငယ်ကို အသားဝါရောဂါ ဖြစ်စေနိုင်သည်။ A+A, B+B နှင့် O+O တို့မှာ ဘေးကင်းမှုရှိသည်။ အန္တရာယ်များသည်မှာ Rh- (မိခင်) နှင့် Rh+ (ဖခင်) ပေါင်းစည်းမှု ဖြစ်သည်။)

(▲ ပန်ဂျီကာ (သို့မဟုတ်) ဆွေစဉ်မျိုးဆက် မှတ်တမ်းများ သိမ်းဆည်းသူက မိသားစုတို့၏ ရာစုနှစ်ချီသော ဆွေစဉ်မျိုးဆက် စာရင်းကို ဖတ်ပြနေပုံ။ ဓာတ်ပုံ-Ismat Ara/Al Jazeera])

ဆူရာ့သ်ဆဘားဈေးကြောင့် မိန်းကလေးတို့မှာ ခင်ပွန်းကောင်းရှာဖွေရန် ပိုမိုလွယ်ကူလာပြီး ရွေးချယ်စရာ များပြားလာသည်။

ဤဓလေ့မှာ အိန္ဒိယတွင် မိန်းကလေးက ယောက်ျားလေးဘက်ကို တင်တောင်းငွေ ပေးရသည့်ဓလေ့ ပျောက်ကွယ်စေရန် ရည်ရွယ်ခြင်းဖြစ်သော်လည်း သတင်းများစွာအရ ယခုကဲ့သို့ လက်ထပ်ပွဲများတွင်ပင်လျှင် တင်တောင်းငွေများ ပေးနေရဆဲ ဖြစ်သည်ဟု ဆိုသည်။

ဆူရာ့သ်ဆဘားဈေးသို့ သတို့သားလောင်း အမျိုးသားများက အုပ်ထိန်းသူများနှင့်အတူ ရောက်လာကာ ဗောဓိညောင်ပင်များအောက်တွင် စုဝေးကြပြီး ခင်ပွန်းလောင်းရွေးချယ်မည့် မိန်းကလေးတို့ကို စောင့်မျှော်ကြသည်။

(▲ ပန်ဂျီကာတို့ ထိန်းသိမ်းထားလေ့ရှိသော မိသားစုရာဇဝင် စာအုပ်တစ်ခုကို တွေ့ရပုံ။ ဓာတ်ပုံ-Ismat Ara/Al Jazeera)

ဆူရာ့သ် ဆဘားဈေးမှာ ၁၀ ရက်တစ်ဈေးဖြစ်ပြီး မိုင်သိလိ ဗြဟ္ခဏ မျိုးနွှယ်တို့က သမီးများကို ခေါ်ယူကာ သတို့သားလောင်း လာရောက်ရွေးချယ်ကြသည်။

(▲ သတို့သားဈေးသို့ လာရောက်သူများကို ကြိုဆိုသည့် ဆိုင်းဘုတ်။ ဓာတ်ပုံ-Ismat Ara/Al Jazeera)

သမီးအတွက် သင့်တော်သည့်အိမ်ထောင်ဖက်ကို တွေ့လျှင် လက်ထပ်ရန်အတွက် ဆက်လက်လုပ်ဆောင်ကြသည်။

(▲ မီဟက် ပန်ဒေးအမည်ရှိ မိန်းကလေး (ယာစွန်) ကို သတို့သားဈေးတွင် မောင်ငယ်၊ မိခင်တို့နှင့်အတူ တွေ့ရပုံ။ ဓာတ်ပုံ-Ismat Ara/Al Jazeera)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Inside a 700-year-old ‘groom market’ in India’s Bihar state Photo Credit- Ismat Ara/Al Jazeera