မြန်မာနိုင်ငံ၏ နံပါတ်တစ် အိမ်ခြံမြေရောင်းဝယ်ငှားဝဘ်ဆိုက်ဖြစ်သော iMyanmmarHouse.com မှကြီးမှူး၍ ၂၀၁၇ ခုနှစ် ဖေဖော်ဝါရီလ ၂၅ ၊ ၂၆ ရက် များတွင် စင်္ကာပူနိုင်ငံ မြန်မာရပ်ကွက် Peninsula Plaza အနီးရှိ Peninsula Excelsior Hotel တွင် စင်္ကာပူနိုင်ငံရှိ မြန်မာ့အကြီးဆုံး အိမ်ခြံမြေ အရောင်းပြပွဲကြီးကို တတိယအကြိမ်မြောက် အောင်မြင်စွာ ကျင်းပပြုလုပ်ခဲ့ကြောင်း သတင်းရရှိသည်။ ထိုသို့ အရောင်းပြပွဲပြုလုပ်ရခြင်းမှာ စင်္ကာပူနိုင်ငံသို့ ရောက်ရှိ၍ အလုပ်လုပ်ကိုင်နေသော မြန်မာနိုင်ငံသားများ အလွယ်တကူဖြင့် အိမ်ခြံမြေများကို ဝယ်ယူခွင့်ရရှိစေရန် ရည်ရွယ်၍ ပြုလုပ်ခြင်းဖြစ်ကြောင်း iMyanmarHouse.com မှ မန်နေးဂျင်းဒါရိုက်တာဖြစ်သူ ဦးနေမင်းသူမှ ပြောကြားခဲ့သည်။
အဆိုပါပွဲတွင် မြန်မာနိုင်ငံမှ ဆောက်လုပ်ရေး ကုမ္ပဏီ(၁၀) ခုကျော်မှ တိုက်ခန်း၊ ကွန်ဒိုနှင့် မြေကွက်များကို အထူးဈေးနှုန်းများ၊ အရစ်ကျစနစ်များဖြင့် ပါဝင်ပြသ ရောင်းချခဲ့ရာ လာရောက်ကြည့်ရှု လေ့လာဝယ်ယူသူများ များပြားခဲ့ကြောင်း သိရှိရသည်။ ပြပွဲ (၂) ရက်အတွင်း ကျပ်ငွေ (၈) ဘီလီယံကျော်တန်ဖိုးရှိသော အိမ်ခြံမြေများကို ရောင်းချနိုင်ခဲ့ကြောင်းလည်း သိရသည်။
“ကျွန်တော်တို့ iMyanmarHouse.com ကနေ စင်္ကာပူနိုင်ငံမှာ အိမ်ခြံမြေ အရောင်းပြပွဲပြုလုပ်တာ ဒီပွဲနဲ့ဆိုရင် တတိယအကြိမ်ရှိပါပြီ။ တစ်ပွဲထက်တစ်ပွဲ ပိုပိုပြီး အောင်မြင်တာကို တွေ့ရပါတယ်။ စင်္ကာပူနိုင်ငံရောက်နေတဲ့ မြန်မာနိုင်ငံသားပေါင်း (၃) သိန်းကျော်ရှိပါတယ်။ သူတို့တွေက စင်္ကာပူမှာ အလုပ်လုပ်ကြတယ်။ ငွေစုကြတယ်။ ပြီးတော့ မြန်မာပြည်မှာ ကိုယ်တိုင်နေထိုင်ဖို့ဖြစ်စေ၊ ရင်းနှီးမြှုပ်နှံဖို့ ဖြစ်စေ အိမ်ခြံမြေကို ဝယ်ယူကြတယ်။ အဲဒီအတွက် မြန်မာပြည်ကို ပြန်လာစရာမလိုဘဲ စင်္ကာပူမှာတင် အိမ်ခြံမြေကို အလွယ်တကူ ဝယ်ယူလို့ရအောင် ဒီလိုပွဲမျိုးကို စီစဉ်ရခြင်းဖြစ်ပါတယ်။ ယခုပွဲမှာတော့ ထူးထူးခြားခြားအဖြစ် ကျပ်သိန်း (၁၀၀) ကျော်မှစတဲ့ တိုက်ခန်းတွေ၊ သိန်း (၁၅၀) ကျော်မှစတဲ့ မြေကွက်တွေ၊ သိန်း (၉၀၀) ကျော်မှစတဲ့ ကွန်ဒိုတွေကို ထည့်သွင်းရောင်းချပေးခဲ့တာပါ။” ဟု ဦးနေမင်းသူမှ ရှင်းလင်းပြောကြားခဲ့သည်။
ပွဲကျင်းပသည့် ရက်များအတွင်း ပွဲသို့လာရောက် တက်ရောက်သူမှာ စုစုပေါင်းမှာ လူ (၃၀၀၀) ကျော် အထိရှိခဲ့ကြောင်း သိရသည်။