ဒေါ်နယ်ထရမ့်၏ စီးပွားရေးမိတ်ဖက် ဟာရီ တာနိုးက အင်ဒိုနီးရှားတွင် အရှေ့တောင်အာရှ၏ အကြီးမားဆုံး အပန်းဖြေကစားကွင်းကြီး တစ်ခုကို ကန်ဒေါ်လာ သန်း ၅၀၀ အကုန်အကျခံဆောက်လုပ်ရန် စီစဉ်

နိုင်ငံတကာသတင်းမီဒီယာများတွင် အမေရိကန်သမ္မတ ဒေါ်နယ်ထရမ့်၏ စီးပွားရေးမိတ်ဖက်ဟု ရည်ညွှန်းရေးသားခြင်း ခံရလေ့ရှိသူ ဟာရီ တာနိုးသည် အင်ဒိုနီးရှားနိုင်ငံတွင် အရှေ့တောင်အာရှ၏ အကြီးမားဆုံး အပန်းဖြေကစားကွင်းကြီး တစ်ခုကို ကန်ဒေါ်လာ သန်း ၅၀၀ အကုန်အကျခံဆောက်လုပ်ရန် စီစဉ်လျက်ရှိသည်။

ဟာရီတာနိုးသည် အင်ဒိုနီးရှား အိမ်ခြံမြေ developer ၊ မီဒီယာလုပ်ငန်းရှင်၊ နိုင်ငံရေးသမားတစ်ဦးဖြစ်ပြီး နာမည်အပြည့်အစုံမှာ ဟာရီ တာနိုးဆိုဒစ်ဘ်ဂျိုဖြစ်သည်။

ဟာရီတာနိုးသည် အင်ဒိုနီးရှားသမ္မတရွေးကောက်ပွဲတွင် ဝင်ရောက်ယှဉ်ပြိုင်လိမ့်မည်ဟု ၂၀၁၇ ခုနှစ်အတွင်းက ခန့်မှန်းချက်များ ထွက်ပေါ်ခဲ့ဖူးသေးသည်။

လက်ရှိအားဖြင့်လည်း တာနိုးသည် အင်ဒိုနီးရှားတွင် ကြီးမားသည့်စီမံကိန်းကြီးများ ဖော်ဆောင်ရန် စီစဉ်လျက်ရှိရာ အင်ဒိုနီးရှားနိုင်ငံ အတွင်းမှာသာမက အရှေ့တောင်အာရှ ဒေသတွင်းတစ်ခွင်လုံးတွင်ပါ အကြီးမားဆုံးဖြစ်သော အပန်းဖြေကစားကွင်းကြီး ဆောက်လုပ်ရန် ရည်မှန်းနေခြင်း ဖြစ်သည်။

တာနိုး၏ အိမ်ခြံမြေဆောက်လုပ်ရေးပင်မကုမ္ပဏီတစ်ခုဖြစ်သော PT MNC Land မှ ကိုယ်စားလှယ်တစ်ဦးမှ မကြာသေးမီက ထုတ်ဖော်ပြောကြားချက်အရ မြေဟက်တာ ၃၀၀၀ အကျယ်အဝန်းပေါ်တွင် အပန်းဖြေကစားကွင်းကြီးတစ်ခုကို အင်ဒိုနီးရှားငွေ ၇ ထရီလီယံ (ကန်ဒေါ်လာ သန်း ၅၀၀) အကုန်အကျခံ ဆောက်လုပ်ရန် စီစဉ်နေကြောင်း၊ MNC Lido City ဟု အမည်ပေးထားပြီး အနောက် ဂျာဗားမှ ဘိုဂေါအရပ်တွင်တည်ရှိကာ ဂျကာတာမြို့တော်နှင့် အလှမ်းမဝေးလှကြောင်း ပြောကြားသည်။

"ဒါဟာ အရှေ့တောင်အာရှမှာ အကြီးမားဆုံးနဲ့ ပထမဆုံး နိုင်ငံတကာ စံချိန်မီကစားကွင်းတစ်ခု ဖြစ်လာမှာပါ။ စင်္ကာပူမှာရှိတဲ့ Universal Studios ထက် ၂ ဆ လောက် ကျယ်ဝန်းမှာဖြစ်ပါတယ်" ဟု MNC Land မှ လက်ထောက် မန်နေးဂျင်း ဒါရိုက်တာ အေ ဒရီယန် ဘူဒီ အူတာမာက ပြောကြားသည်။

သို့သော် အဆိုပါအချက်မှာ မူလက ရည်ရွယ်ထားခဲ့သည်နှင့် များစွာ ခြားနားနေသည်။

MNC Land ၏ Lido City စီမံကိန်းသည် ရည်ရွယ်ထားသည်မှာ ကြာမြင့်ခဲ့ပြီဖြစ်သော စီမံကိန်းတစ်ရပ်ဖြစ်ပြီး အစောပိုင်းကာလများက ကောလာဟလများ ထွက်ပေါ်ခဲ့ရာတွင် Disneyland ကစားကွင်းတစ်ခုအဖြစ် ဆောက်လုပ်မည်ဟု သတင်းများ ထွက်ပေါ်ခဲ့သည်။

ထို သတင်းများထွက်ပေါ်ရခြင်းအား အထောက်အပံ့ပေးနေသည့် အချက်မှာ Lido City စီမံကိန်းတွင် ဒေါ်နယ်ထရမ့် (ယခု အမေရိကန် သမ္မတ) နှင့် Trump Hotel Group တို့ ပါဝင်လက်တွဲ အကောင်အထည်ဖော်နေသည့်အချက် ဖြစ်သည်။

ထို့အပြင် ဘာလီကျွန်းတွင် MNC Land က အကောင်အထည်ဖော်နေသည့် အခြားအပန်းဖြေစခန်းစီမံကိန်းတွင်လည်း Trump Hotel Group က ပါဝင်အကောင်အထည်ဖော်မှုများ ရှိနေသည်။

ဟာရီတာနိုးသည် ယခုလအတွင်းတွင်ပင် နိုင်ငံတကာသတင်းစာမျက်နှာပေါ်သို့ တက်လာခဲ့သေးသည်။

လော့စ်အိန်ဂျလိမြို့ ၊ ဘီဗာလီဟေးလ်အရပ်တွင် ဒေါ်နယ်ထရမ့်ပိုင်ဆိုင်ထားသည့် နေအိမ်တစ်လုံးကို ပေါက်ဈေးထက် များစွာပိုပေးကာ ဝယ်ယူလိုက်သည့်သတင်းကို ဝါရှင်တန်ပို့စ်သတင်းစာက ဖော်ပြလိုက်ခြင်း ဖြစ်သည်။

ဟာရီတာနိုးသည် ထရမ့်၏ မျက်နှာပေးမှုကို ဝယ်ယူရန်ကြိုးစားခြင်းဖြစ်သည်ဟု အချို့ က ခန့်မှန်းကြသည်။

Credit: iMyanmarHouse.com (iMyanmarHouse.com Team မှ ရေးသား ဖော်ပြသည်။)