ရန်ကုန်မြို့သစ်နှင့် မြို့ဟောင်းကြားတွင် ရေအောက်ဥမင်လိုဏ်ခေါင်း ထည့်သွင်းတည်ဆောက်မည်

ရန်ကုန်မြို့သစ်ဖွံ့ဖြိုးရေးကုမ္ပဏီလီမိတက် (NYDC) မှ အကောင်အထည် ဖော်မည့် ရန်ကုန်အနောက်တောင်မြို့သစ်စီမံကိန်း (ရန်ကုန်မြို့သစ်) နှင့် ရန်ကုန်မြို့ ဟောင်းအကြား ရေအောက်ဥမင်လိုဏ်ခေါင်း ထည့်သွင်းတည်ဆောက်သွားမည် ဖြစ်ကြောင်း ရန်ကုန်တိုင်းဒေသကြီး အစိုးရအဖွဲ့ရုံး၊ မင်္ဂလာခန်းမတွင် ဇွန်လ ၃ ရက်ကပြုလုပ်သော ရန်ကုန်မြို့၏ အနာဂတ်ဖွံ့ဖြိုးတိုးတက်မှုကို ဦးတည်သွားမည့် Yangon Project Bank အကြောင်း ရှင်းလင်းသည့်အခမ်းအနားမှ သိရသည်။

ရန်ကုန်မြို့ ဟောင်းနှင့် မြို့သစ်ကြား လမ်းပန်းဆက်သွယ်မှု လွယ်ကူချောမွေ့ စေရန်အတွက် လှိုင်သာယာမြို့နယ် နှင့် ဒလမြို့နယ် တို့တွင် ၆ လမ်းသွား သံကူ ကွန်ကရစ်တံတား၊ ကြည့်မြင်တိုင်မြို့နယ် တွင် ကေဘယ်တံတား၊ အလုံမြို့နယ် သို့ ရေအောက်ဥမင်လိုဏ်ခေါင်းတည်ဆောက်၍ ဆက်သွယ်သွားလာနိုင်ရန်စီစဉ် ထားကြောင်း ယင်းအခမ်းအနားတွင် Video ဖြင့် ရှင်းပြခဲ့ခြင်းဖြစ်သည်။

မြို့သစ်စီမံကိန်းအတွင်း မိုးပျံလမ်းများအပါအဝင် ခေတ်မီအဆင့်မြင့် လူနေအဆောက်အအုံများလည်းပါဝင်မည်ဖြစ်ရာ ပြည်သူလူထုသွားလာရေးလွယ်ကူစေရန် လိုရာခရီးကို မိနစ် ၃၀ နှင့်ရောက်မည့် ဒီဇိုင်းများကိုလည်း စဉ်းစားထားကြောင်း၊ မြို့၏အဓိကနေရာများကို ရေကြောင်းခရီး ဖြင့် အဓိကသွားလာနိုင်မည်ဖြစ်ကြောင်း အဆိုပါ Video တွင်ပါရှိသည်။

ရန်ကုန်အနောက်တောင်မြို့သစ်စီမံကိန်းကို အကောင်အထည်ဖော်မည့် ရန်ကုန်မြို့သစ်ဖွံ့ဖြိုးရေးကုမ္ပဏီလီမိတက် (NYDC) မှာ ရန်ကုန်တိုင်းဒေသကြီး အစိုးရမှ ၁၀၀ ရာခိုင်နှုန်း ပိုင်ဆိုင်သည့် ကုမ္ပဏီတစ်ခုဖြစ်ကြောင်း၊ မြို့သစ်ကို စီးပွားရေးမြို့တော်နှင့် လူနေထိုင်ရန်ကောင်းသည့် မြို့တော်ဖြစ်ရန် Road Map ရေး ဆွဲပြီး အကောင်အထည်ဖော်ဆောင်ရွက်သွားမည်ဖြစ်ကြောင်း ရန်ကုန်တိုင်းဒေသကြီးအစိုးရအဖွဲ့က မီဒီယာများအား ပြောကြားထားသည်။

အဆိုပါ အနောက်တောင်မြို့သစ်စီမံကိန်းကို အပိုင်းနှစ်ပိုင်းခွဲ၍ လုပ်ဆောင်သွားမည်ဖြစ်ကြောင်း၊ အပိုင်း (၁) တွင် ဧကနှစ်သောင်းကျော်ပါဝင်ပြီး ဖွံ့ဖြိုးရေး လုပ်ငန်းများဆောင်ရွက်ရန် ရန်ကုန်တိုင်းဒေသကြီးအစိုးရအဖွဲ့မှ NYDC ကို ဖွဲ့ စည်းခဲ့ခြင်းဖြစ်ကြောင်းလည်း သိရသည်။

Credit: Pyi Myanmar