မြို့သစ်များ အကောင်အထည်ဖော်ရန် မြေယာသိမ်းဆည်းထားမှု ကျပ်ဘီလျံ ၃၀ မှ ၄၀ အထိ တန်ဖိုးရှိနေပြီး မြေများ ပြန်လည်ရောင်းချပြီးမှ လျော်ကြေးပေးနိုင်မည် ဖြစ်ကြောင်း ရန်ကုန်တိုင်းဝန်ကြီးချုပ် ပြောကြား

ရန်ကုန်တိုင်း ဒေသကြီးအတွင်း မြို့သစ်များ အကောင်အထည်ဖော်ရန် မြေယာ သိမ်းဆည်းထားမှု ကျပ်ဘီလျံ ၃ဝ မှ ၄၀ အထိရှိနေပြီး မြေများ ပြန်လည်ရောင်းချပြီးမှ လျော်ကြေးပေးနိုင်မည် ဖြစ်ကြောင်း ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက ပြောကြားသည်။

ဇွန် ၃ ရက်က ပြုလုပ်သည့် အနာဂတ်ရန်ကုန် စီမံကိန်းအတွက် Yangon Project Bank အကြောင်းနှင့် ပတ်သက်၍ ရှင်းလင်းပွဲ၌ အဖွင့်အမှာစကား ပြောရာတွင် ဝန်ကြီးချုပ် ဦးဖြိုးမင်းသိန်းက ပြောကြားခဲ့ခြင်း ဖြစ်သည်။

“ကျွန်တော်တို့ မြို့သစ်တွေကို တည်ဆောက်ခဲ့တဲ့ မြေတွေကို လျော်ကြေးပေးရမှာ ဖြစ်ပါတယ်။ ကျွန်တော်တို့ တွက်ချက်ထားမှုအရ ၃၀ ဘီလျံကျော်၊ ၄၀ ဘီလျံလောက် မြေတွေကို သိမ်းဆည်းခဲ့တဲ့အတွက် လျော်ကြေးပေးဖို့ ပြင်ဆင်ရပါတယ်။ ဒါကြောင့် လက်ကျန်မြေတွေကို ရောင်းဖို့ ပြင်ဆင်နေရပါတယ်” ဟု ဝန်ကြီးချုပ် ဦးဖြိုးမင်းသိန်းက ပြောကြားသည်။

လက်ကျန် မြေများအား လယ်သမားများမှ ဈေးပေါပေါဖြင့် ပေးရန် တင်ပြမှုများ ရှိကြောင်း၊ လက်ကျန် မြေများအား ဈေးပေါပေါဖြင့် မပေးနိုင်မှုသည် မြေသိမ်းဆည်းခဲ့စဉ်က လယ်ကွင်းများကို သိမ်းယူခဲ့ခြင်း ဖြစ်ကြောင်း၊ လယ်ကွင်းများ ဖွံ့ဖြိုးတိုးတက်ရန် နှစ်စဉ် ဘတ်ဂျက် ထည့်ဝင်ရကြောင်း ဝန်ကြီးချုပ် ဦးဖြိုးမင်းသိန်းက ပြောကြားသည်။

“ ဒဂုံ လေးမြို့နယ်ဆိုရင် ပိုက်ဆံ တောက်လျှောက် တောင်းနေတာ ဖြစ်ပါတယ်။ ပြည်သူ့ ဘဏ္ဍာငွေတွေနဲ့ ဖွံ့ဖြိုးတိုးတက်အောင် လုပ်ရတာ ဖြစ်ပါတယ်။ ဖွံ့ဖြိုးတိုးတက်ဖို့အတွက် တစ်ဧကကို သိန်းတစ်ထောင် ထည့်မလား၊ တစ်ဧကကို သိန်းနှစ်ထောင် ထည့်မလား မြေရဲ့ တန်ဖိုးက တက်လာတာ ဖြစ်ပါတယ်။ အခုတက်လာတဲ့ မြေရဲ့ တန်ဖိုးကို လယ်ယာမြေကို သိမ်းခဲ့စဉ်ကလိုမျိုး ပြန်ပေးပါ ဆိုတာမျိုး ပေးလို့ မရနိုင်ပါဘူး။ ဒါပေမဲ့ ရောင်းလို့ ရနိုင်ပါတယ်။ သူတို့ လိုချင်တယ်ဆိုရင် ထိုက်တန်တဲ့ ဈေးနှုန်း တစ်ခုနဲ့ ရောင်းဖို့ ပြင်ဆင်ပါမယ်” ဟု ဝန်ကြီးချုပ် ဦးဖြိုးမင်းသိန်းက ပြောကြားသည်။

မြေများအား အောက်ဈေးဖြင့်ရရန် မဖြစ်နိုင်ကြောင်း၊ သွင်းလိုက်သည့် ကုန်ကျငွေအား ပြန်လည် လိုချင်ကြောင်း၊ သို့မှသာ အသိမ်းခံခဲ့ရသည့် လယ်သမားများအား မြေလျော်ကြေး ပြန်လည်ပေးအပ်နိုင်မည် ဖြစ်ကြောင်း ဝန်ကြီးချုပ် ဦးဖြိုးမင်းသိန်းက ပြောကြားသည်။

“ကျွန်တော်တို့က မြေယာတွေကို စနစ်တကျ လျော်ကြေးပေးနိုင်ဖို့အတွက် ကျွန်တော်တို့ တိုင်းမှာ တိုင်ကြားစာပေါင်း ပြီးခဲ့တဲ့ လွှတ်တော်မှာ စစ်ဆေးခဲ့တဲ့ အပိုင်းတွေ ရှိပါတယ်။ ဒီအပိုင်းနဲ့ ပေါင်းလိုက်ရင် အမှုတွဲပေါင်း ၅၀၀၀ ကျော် ရှိပါတယ်။ အခု စစ်ဆေးပြီးတာ အမှုတွဲပေါင်း ၂၀၀ ကျော်လောက်ပဲ ရှိပါတော့တယ်။ လျော်ကြေးအတွက် အောက်တိုဘာ မတိုင်ခင်မှာ ဖြည့်စွက်ငွေ တောင်းခံဖို့ ရှိပါတယ်” ဟု ဝန်ကြီးချုပ် ဦးဖြိုးမင်းသိန်းက ဆိုသည်။

Credit: Eleven Media Group