ပြည်တွင်း အိမ်ခြံမြေ သတင်း | Posted by ဇာနည်ကျော်
မန္တလေးမြို့တော်၏ မြို့နယ်သုံးခုအတွင်းရှိ လမ်းနှင့် ပလက်ဖောင်းများပေါ်တွင် ပုံစံမျိုးစုံဖြင့် ကျုးကျော်နေမှုများကို မတ်လ ၁၅ ရက်နေ့ နောက်ပိုင်းမှစတင်၍ စီမံချက်ဖြင့် ဖယ်ရှားရှင်းလင်းမည်ဖြစ်ကြောင်း မန္တလေးမြို့တော် စည်ပင်သာယာရေးကော်မတီထံမှ သိရသည်။
အောင်မြေသာစံ၊ ချမ်းအေးသာစံနှင့် မဟာအောင်မြေမြို့နယ်တို့ရှိ လမ်းနှင့် ပလက်ဖောင်းများပေါ်တွင် ပန်းအိုးများ၊ မီးစက်များချထားခြင်း၊ အိမ်ရှေ့ အမိုးအကာအဖီချ၍ ကျူးထားခြင်းနှင့် ဈေးဆိုင်ခန်းတိုးချဲ့ ထားခြင်းအစရှိသော ပုံစံမျိုးစုံဖြင့် ကျုးကျော်နေမှုများကို ဖျက်သိမ်းရန် ယခုလ ၁ ရက်နေ့မှစတင်ကာ အကြောင်းကြားစာများပေးပို့ထားကြောင်း မန္တလေးမြို့တော် စည်ပင်သာယာရေးကော်မတီဝင် ဦးကျော်ဇောအောင်က ပြောကြားသည်။
“တဖြည်းဖြည်းများပြားလာတယ်။ အခုလို မဖြစ်သင့်တဲ့ အနေအထားတွေကြောင့် မြို့နေလူထုနဲ့ ရဟန်းသံဃာတော်တွေက မြို့ရဲ့ ပလက်ဖောင်းပေါ် လျှောက်လို့မရတော့ဘဲ လမ်းမတန်းပေါ်မှာ ဆင်းလျှောက်ရတော့ ယာဉ်အန္တရာယ်တွေ ထိခိုက်မှုရှိလာမယ်။ မြို့ရဲ့ သာယာလှပမှုကိုလည်း ထိခိုက်စေတယ် ” ဟု ၎င်းက ပြောကြားသည်။
လမ်းနှင့် ပလက်ဖောင်းကျုးများကို ရှင်းလင်းမည်ဆိုပါက မြို့နယ်၏ အဓိကနေရာများသာမက အခြားသော နေရာများရှိ လမ်းများကိုလည်း စနစ်တကျရှင်းလင်းသင့်ကြောင်း၊ နောင်တွင်လည်း ဆက်လက်မကျူးကျော်စေရန် စီမံချက်ဖြင့် စဉ်ဆက်မပြတ် လုပ်ဆောင်သင့်ကြောင်း မန္တလေးမြို့ မဟာအောင်မြေမြို့နယ်တွင် နေထိုင်သည့် ကိုလင်းလင်းက ပြောကြားသည်။
“ စမတ်စီးတီးဆိုတာ အခုလို စည်ကမ်းမဲ့လုပ်ရပ်တွေကို စနစ်တကျနဲ့ စည်းကမ်းရှိဖို့ အဓိကထား စီမံဆောင်ရွက်ရမှာ။ လမ်းကျူးဆိုရင် ပိုက်ဆံရှိတဲ့သူက ပိုဆိုးတယ်။ ပြီးတော့ အောက်ခြေဝန်ထမ်းတွေရဲ့ အရင်က စရိုက်တွေလည်း ထိန်းကျောင်း ပြုပြင်ပေးနိုင်မှ အဆင်ပြေမှာ။ သူတို့ ပါမလာရင် ဒီကိစ္စတွေက ဆက်ဖြစ်နေဦးမှာပဲ”ဟု ၎င်းက ပြောဆိုသည်။
မန္တလေးမြို့၏ စည်ပင်ပိုင်ဧရိယာနှင့် လမ်းများပေါ်တွင် ပုံသဏ္ဍာန်မျိုးစုံဖြင့် ကျူးကျော်နေမှုများကို မြင်တွေ့ရမည်ဖြစ်ပြီး မြို့နေလူထုကလည်း မြို့တော်စည်ပင်၏ စီမံချက်ဖြင့် ဖယ်ရှားရှင်းလင်းမည့် လုပ်ဆောင်ချက်ကို ထောက်ခံကြိုဆိုကြသည်။
ယခုမြို့နယ် ၃ ခုတွင် ဖယ်ရှားရှင်းလင်းရေးလုပ်ငန်းများ ဆောင်ရွက်ပြီးစီးပါက ပြည်ကြီးတံခွန်၊ ချမ်းမြသာစည်နှင့် အမရပူရမြို့နယ်များအတွင်းရှိ လမ်းနှင့် ပလက်ဖောင်းများကို ကျူးကျော်သူများအား ဆက်လက် ဖယ်ရှားရှင်းလင်းမည်ဖြစ်ကြောင်း မန္တလေးမြို့တော်စည်ပင်သာယာရေးကော်မတီထံမှ သိရသည်။
Credit: The Voice
