လာမည့်မတ်လတွင် မလေးရှား၌ ရင်းဂစ် ၂၂ ဒသမ ၅ ဘီလီယံတန်ကြေးရှိ အိမ်ခြံမြေများ ရောင်းထုတ်ရန် စီစဉ်လျက်ရှိ

မလေးရှားနိုင်ငံတွင် ရောင်းမထွက်ဘဲရှိနေသာ ရင်းဂစ် ၂၂ ဒသမ ၅ ဘီလီယံတန်ကြေးရှိ အိမ်ခြံမြေများကို လာမည့် မတ်လအတွင်း ရောင်းထုတ်ရန် စီစဉ်နေကြောင်း အိုးအိမ်နှင့် ဒေသတွင်းအစိုးရဝန်ကြီး ဇူရိုင်ဒါကာမာရူဒင်က ပြောကြားသည်။

“ပြည်သူတွေအတွက် ဖြစ်နိုင်သမျှ အဆုံးစွန်လျှော့ဈေးနဲ့ ရောင်းချပေးသွားဖို့ ကျွန်မတို့ ရည်မှန်းထားပါတယ်”ဟု ဇူရိုင်ဒါက ပြောကြားခဲ့ကြောင်း ဘဏ္ဍာရေးသတင်းဝက်ဘ်ဆိုက်တစ်ခုဖြစ်သည့် Bloomberg တွင် ဖော်ပြသည်။

အဆိုပါအိမ်ခြံမြေများကို မတ်လ ၁ ရက်မှ ၃ ရက်အထိကျင်းပမည့် အိမ်ခြံမြေပြပွဲတွင် ရောင်းထုတ်သွားရန် စီစဉ်ထားပြီး developer ပေါင်း၁၈၀ ခန့်က လူနေခန်းပေါင်း ၂၂၀၀၀ ခန့်ကို လျှော့ဈေးဖြင့် ရောင်းချသွားမည်ဟု ဆိုသည်။

ရောင်းမထွက်ဘဲဖြစ်နေသော အိမ်ခြံမြေတို့၏ ဈေးနှုန်းကို မလေးရှားနိုင်ငံသားအများစု ဝယ်ယူနိုင်မည့် တန်ဖိုးသင့်ဈေးနှုန်းများအဖြစ် လျှော့ချပေးနိုင်ရန်ရည်ရွယ်သည်ဟုလည်း ဆိုသည်။

ရောင်းလိုအားများပြားနေခြင်းနှင့် ပြည်တွင်းအိမ်ခြံမြေဈေးကွက်တည်ငြိမ်မှုရှိစေရန် လုပ်ဆောင်မှုများကြောင့် အိမ်ခြံမြေဈေးကွက် ရောင်းအားမှာ နှေးကွေးနေခဲ့သည်။

မလေးရှားဗဟိုဘဏ်ဖြစ်သော Bank Negara Malaysia မှ ထုတ်ပြန်ခဲ့သော အချက်အလက်များတွင် ဖော်ပြထားသည်မျာ နိုင်ငံတကာ စံနှုန်းများအရ မလေးရှားအိမ်ခြံမြေဈေးနှုန်းများမှာ ဆိုးဆိုးရွားရွား တန်ဖိုးသင့်မဟုတ်သည့် အခြေအနေဖြစ်နေကြောင်း၊ မလေးရှားလူလတ်တန်းစားအိမ်ထောင်စုတို့၏ နှစ်စဉ်ဝင်ငွေ ၅ ဆခန့်ဖြစ်နေကြောင်း ဖော်ပြထားသည်။ ကမ္ဘာ့စံနှုန်းမှာ အလယ်အလတ်ဝင်ငွေရှိသူတို့၏ တစ်နှစ်တာဝင်ငွေ ၃ ဆဖြစ်သည်ဟု ဆိုသည်။

ဗဟိုဘဏ်၏ ခန့်မှန်းချက်အရ ပျှမ်းမျှအားဖြင့် မလေးရှားအိမ်ထောင်စုတို့ အမြင့်ဆုံးတတ်နိုင်သည့် ဈေးနှုန်းမှာ ရင်းဂစ် ၂၈၂၀၀၀ ဖြစ်ကြောင်း၊ လက်ရှိဈေးနှုန်းများမှာ ပျှမ်းမျှပမာဏထက် ၁၁ ရာခိုင်နှုန်း များပြားနေကြောင်း ခန့်မှန်းထားသည်။

အနာဂတ်တွင် လူနေအိမ်ရာစီမံကိန်းများကို အတည်ပြုချက်မပေးမီ ဒေသတွင်း ဝင်ငွေအဆင့်ကို မိမိတို့ဝန်ကြီးဌာနအနေဖြင့် ထည့်သွင်းစဉ်းစားသွားမည်ဖြစ်ကြောင်း ဇူရိုင်ဒါက ပြောကြားသည်။

Credit: iMyanmarHouse.com (iMyanmarHouse.com Team မှ ရေးသား ဖော်ပြသည်။)