ရန်ကုန်မြို့၌ ယာဉ်ကြောကျပ်တည်းမှု ပြဿနာများဖြေရှင်းရန် အတွင်းပတ်လမ်း၊ အပြင်ပတ်လမ်းနှင့် မိုးပျံရထားလမ်းကို အကောင်အထည်ဖော်မည်

ရန်ကုန်မြို့၌ ယာဉ်ကြောကျပ်တည်းမှု ပြဿနာများ ဖြေရှင်းရန် အတွင်းပတ်လမ်း၊ အပြင်ပတ်လမ်းနှင့် မိုးပျံရထားလမ်းကို အကောင်အထည်ဖော်မည် ဖြစ်ကြောင်း ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက ဇန်နဝါရီ ၁၆ ရက်တွင် ပြုလုပ်သည့် YBS စနစ် စတင်ခြင်း နှစ်နှစ်ပြည့် အခမ်းအနားအပြီး မီဒီယာများနှင့် တွေ့ဆုံစဉ် ပြောကြားခဲ့သည်။

ရန်ကုန်တိုင်း ဒေသကြီးအတွင်း သယ်ယူပို့ဆောင်ရေး ကဏ္ဍများအတွက် အဆောက်အအုံများကို တိုးမြှင့်ဆောင်ရွက်မည် ဖြစ်ကြောင်း ဝန်ကြီးချုပ်က ပြောကြားသည်။

“သယ်ယူပို့ဆောင်ရေးကဏ္ဍ နယ်ပယ်နဲ့ ပတ်သက်ပြီး Infrastructure တွေကို တိုးမြှင့်ဖို့အတွက် ပြင်ဆင်ဆောင်ရွက် နေပါတယ်။ ဒီကိစ္စတွေက Traffic ပြဿနာရပ်တွေနဲ့ ပတ်သက်ပြီးတော့ ဖြစ်ပါတယ်။ ကျွန်တော်တို့ အတွင်းပတ်လမ်းလုပ်ဖို့ ရှိပါတယ်။ နောက်တစ်ချက်က အပြင်ပတ်လမ်းလုပ်ဖို့ ရှိပါတယ်။ ဒါဟာ၂၀၄၀ JICA ရဲ့ Master Plan ကို ကျွန်တော်တို့ ဆောင်ရွက်ဖို့ ရှိပါတယ်” ဟု ဝန်ကြီးချုပ် ဦးဖြိုးမင်းသိန်းက ပြောကြားသည်။အတွင်းပတ်လမ်းနှင့် ပတ်သက်၍ ပထမအဆင့်တင်ဒါ အောင်မြင်ထားသည့် ကုမ္ပဏီ ၁၀ ခုရှိပြီး အပြင်ပတ်လမ်းနှင့် ပတ်သက်ပြီး စိတ်ဝင်စားသူများအား ခေါ်ယူရန်ရှိကြောင်း ဝန်ကြီးချုပ်က ပြောကြားသည်။

“အပြင်ပတ်လမ်း ဆိုတာကတော့ ရန်ကုန်မြို့ကြီးကို အပြင်ကနေ ပတ်လမ်းတစ်ခု တည်ဆောက်ဖို့ ဖြစ်ပါတယ်။ အတွင်းပတ်လမ်းကတော့ ရန်ကုန်မြို့ရဲ့ အတွင်းပိုင်း ဝေဇယန္တာလမ်းလို နေရာမျိုးကပတ်ဖို့ ဖြစ်ပါတယ်။ ဒီဘက်ကတော့ ဘုရင့်နောင်လမ်းဘက် ဖြစ်ပါတယ်” ဟုဦးဖြိုးမင်းသိန်းက ပြောကြားသည်။

ထို့ပြင် မိုးပျံရထားလမ်းနှင့် ပတ်သက်၍ မြေပြင်အခြေအနေ လေ့လာဆောင်ရွက်မှုများ ရရှိပါက ဆောင်ရွက်သွားမည် ဖြစ်ကြောင်း သိရသည်။

ပြီးခဲ့သည့် ဇန်နဝါရီ ၁၄ ရက်က ဒေါ်လာ ၁ ဒသမ ၅ ဘီလျံ ရင်းနှီးမြှုပ်နှံမည့် ရန်ကုန်မြို့တွင်း မိုးပျံရထားလမ်း စီမံကိန်းအတွက် အမှတ် (၂) တရုတ်နိုင်ငံ မီးရထားအင်ဂျင်နီယာ ကုမ္ပဏီ (CREEC) က မိုးပျံရထားလမ်း ဆောင်ရွက်မည့် အကြောင်းအရာများကို လွှတ်တော်ကိုယ်စားလှယ်များအား ပထမအကြိမ် လာရောက် ရှင်းလင်းခြင်း ဖြစ်ကြောင်း ပန်းဘဲတန်းမြို့နယ် မဲဆန္ဒနယ်အမှတ် (၁) တိုင်းဒေသကြီး လွှတ်တော်ကိုယ်စားလှယ် ဦးသန်းနိုင်ဦးက ပြောကြားသည်။

ထို့ပြင် မိုးပျံရထားလမ်း၏ ခရီးအကွာ အဝေးမှာ ၃၇ ဒသမ ၉ ကီလိုမီတာ ရှိမည်ဖြစ်ပြီး ပထမလမ်းကြောင်း အနေဖြင့် ကြည့်မြင်တိုင်မြို့နယ်မှ မင်္ဂလာဒုံမြို့နယ်နှင့် ဒုတိယလမ်းကြောင်းသည် မြောက်ဥက္ကလာပမြို့နယ် ကျောက်ရေတွင်းမှ ရန်ကုန်အပြည်ပြည်ဆိုင်ရာ လေဆိပ်ဖြစ်ကြောင်း၊ ရထားအမြန်နှုန်း အနေဖြင့် တစ်နာရီကီလို ၈၀ နှုန်းမောင်းနှင်နိုင်ပြီး အသံဆူညံမှု မရှိဘဲ ရန်ကုန်မြို့နှင့် ကိုက်ညီသည့်ဒီဇိုင်း တည်ဆောက်ပေးမည် ဖြစ်ကြောင်း၊ ရထားခအနေဖြင့် တစ်ဦးကို ပျှမ်းမျှ ကျပ် ၅၀၀ သတ်မှတ်ထားပြီး သံဃာတော်များ၊ သက်ကြီးရွယ်အိုများနှင့် မသန်စွမ်းများကို အခမဲ့ စီးနင်းခွင့်ပြုမည် ဖြစ်ကြောင်းနှင့် စီမံကိန်း ဆောင်ရွက်ခွင့်ရပါက နှစ်နှစ်သုံးနှစ်အတွင်း အပြီးဆောင်ရွက်နိုင်သည်ဟု ကုမ္ပဏီဘက်က ရှင်းလင်းခဲ့ကြောင်း တိုင်းဒေသကြီး လွှတ်တော်ကိုယ်စားလှယ် ဦးသန်းနိုင်ဦးက ပြောကြားသည်။

Credit: Eleven Media Group