စတော့အိတ်ချိန်းတွင် မြန်မာနိုင်ငံသားများ ဘဏ်၏အမြတ်လျော့ကျ

ရန်ကုန်စတော့အိတ်ချိန်းတွင် ဝင်ရောက်ထားသည့် အများပိုင်ဘဏ်တစ်ခုဖြစ်သည့် မြန်မာနိုင်ငံသားများ ဘဏ်၏ ၂၀၁၇-၁၈ ဘဏ္ဍာနှစ်အတွက် အမြတ်ရရှိမှုမှာ ယခင်နှစ်ထက် ကျပ် ၃ ဒသမ ၈ ဘီလီယံကျော် လျော့ကျခဲ့ကြောင်း သိရသည်။

၂၀၁၆-၁၇ ဘဏ္ဍာနှစ်က အခွန်မဆောင်မီ အမြတ်ငွေ ပမာဏမှာ ကျပ် ၇ ဒသမ ၈၁၇ ဘီလီယံရရှိခဲ့ရာမှ ၂၀၁၇-၁၈ ဘဏ္ဍာနှစ်တွင် ၃ ဒသမ ၉၅၈ ဘီလီယံသို့ လျော့ကျခဲ့ကြောင်း မြန်မာနိုင်ငံသားများဘဏ်၏ နှစ်ပတ်လည် အစီရင်ခံစာတွင် ဖော်ပြထားသည်။

ပြီးခဲ့သည့် ဘဏ္ဍာနှစ်အတွင်း အပ်ငွေပမာဏများ တိုးတက်လာသော်လည်း ချေးငွေများကို စည်းစနစ်ကျအောင် ပြုလုပ်၍ ထုတ်ချေးမှု နှေးကွေးသွားခဲ့သောကြောင့် အမြတ်ဝေစုပမာဏ အနည်းငယ်လျော့ကျခဲ့ခြင်းဖြစ်ကြောင်း မြန်မာနိုင်ငံသားများဘဏ်၏ အမှုဆောင်အရာရှိချုပ် ဒေါက်တာ သောင်းဟန်က ရှင်းပြသည်။

"အဲလိုပြင်လိုက်တော့ Process အသစ်နဲ့ Run တာဖြစ်တဲ့အတွက်ကြောင့် ချေးငွေထုတ်ချေးခြင်းတွေ နှေးသွား တယ်။ အပ်ငွေက ထိုးတက်လာတယ်။ချေးငွေက လိုက်မထိုးတက်လာတဲ့အတွက် အဲ့ကြားမှာ Gap ဖြစ်သွားပြီး တော့ အဲဒါကအမြတ်ငွေ တော်တော်များများဖြစ်သင့်တယ်ဟာကို ယူသွားတာဖြစ်တယ် "ဟု အမှုဆောင်အရာရှိ ချုပ် ဒေါက်တာသောင်းဟန်က ရှင်းပြသည်။

ဘဏ်၏ ချေးငွေများအတွက် စည်းစနစ်ကျအောင်ပြုလုပ်၍ ထုတ်ချေးခြင်းမှာ ၂၀၁၈ ဇူလိုင်လမှ ဒီဇင်ဘာလ အထိဖြစ်ကြောင်း သိရသည်။

" ပြီးခဲ့တဲ့ ဇူလိုင်ကနေ ဒီဇင်ဘာအထိကို Safe Side ကစားတာလွန်သွားတယ်။ ဇန်နဝါရီရောက်မှ ပြန်ပြီးဖွင့်ကစားရတာဖြစ်လာတဲ့အတွက် ဒီခြောက်လမှာတော့ ပြန်ပြီးထိုးတက်လာတော့ပေါ့ " ဟု ဒေါက်တာသောင်းဟန်က ရှင်းပြသည်။

ထို့အတူ ဘဏ်၏ အမြတ်ဝေစုခွဲဝေပေးမှုပမာဏအဖြစ် ကျပ်သန်း ၂၀၈၀ ကျော်ကို ပြန်လည်ခွဲဝေပေးမည် ဖြစ်ပြီး အစုရှယ်ယာတစ်စုလျှင် အမြတ်ဝေစု ကျပ် ၂၀၀ ရရှိမည်ဖြစ်သည်။

သို့သော် ယင်းအမြတ်ဝေစုခွဲမှုပမာဏသည် ယခင်နှစ်က ခွဲဝေပေးမှုထက် လျော့ကျခဲ့ပြီး ယခင်နှစ်ကမူ အစုရှယ်ယာတစ်စုလျှင် အမြတ်ဝေစု ကျပ် ၃၀၀ ခွဲဝေပေးခဲ့ကြောင်း သိရသည်။

ရန်ကုန်စတော့အိတ်ချိန်းသို့ဝင်ရောက်ထားသည် မြန်မာနိုင်ငံသားများဘဏ်သည် အစုရှယ်ယာရှင်ပေါင်း ၁၈၆၇ ဦးအထိရှိပြီး Capital Financial Holding လီမိတက်က ရှယ်ယာအများဆုံးပိုင်ဆိုင်ပြီး စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ရှယ်ယာ ၉ ရာခိုင်နှုန်းကျော်ပိုင်ဆိုင်သည်။

နေးရှင်းမြန်မာ ( iMyanmarHouse.com အိုင်မြန်မာဟောက်စ်ဒေါ့ကွန်း) မှ အထူးရေးသားဖော်ပြသည်။ Credit: iMyanmarHouse.com