တီးတိန်မြို့ရှိ ချင်းရိုးရာနေအိမ်နှင့် လူနေမှုဘဝများ ပြသထားသည့် ဥယျာဉ်သို့ လာရောက်လေ့လာသူ များပြား

ချင်းပြည်နယ်မြောက်ပိုင်း တီးတိန်မြို့ ရှောင်စောန်းစံပြကျေးရွာရှိ ချင်းရိုးရာနေအိမ်နှင့် လူနေမှုဘဝအား ပြသထားသည့်ဥယျာဉ်သို့ ပြည်တွင်းပြည်ပမှ နှစ်စဉ် လာရောက်လေ့လာသူဦးရေ ၅ဝဝ ခန့်ရှိနေပြီး စိတ်ဝင်စားလေ့လာသူ ပိုမိုများပြားလာကြောင်း ပေါင်ကျင့်ဟောက်ပါရှန်း ရှောင်စောန်းအသင်းတော်မှ သိရသည်။

အဆိုပါကျေးရွာကို ၂ဝ၁၄ ခုနှစ်က စတင်တည်ထောင်ခဲ့ခြင်းဖြစ်ပြီး စုစုပေါင်းအိမ်ခြေ ၆ဝ ရှိကာ လာရောက်လည်ပတ်သူများ လေ့လာနိုင်ရန် ချင်းရိုးရာနေထိုင်မှုဘဝတွင် နေ့စဉ် အသုံးပြုလေ့ရှိသည့် ပစ္စည်းများ စုံလင်စွာထည့်သွင်းထားသည့် ရိုးရာအိမ်တစ်လုံးကိုလည်း တည်ဆောက်ထားကြောင်း သိရသည်။

''ဒီရှောင်စောန်းစံပြကျေးရွာဥယျာဉ်မှာ လာရောက်လေ့လာသူတွေကို ကျွန်တော်တို့ ချင်းလူမျိုး ဘိုးဘွားတွေ ဘယ်လိုနေထိုင်ခဲ့ကြတယ်ဆိုတာ ပြသနိုင်ဖို့ ရိုးရာပစ္စည်းတွေ အစုံအလင် ထည့်သွင်းပြီး ရှေးခေတ်အိမ်တွေပုံစံအတိုင်း ဆောက်လုပ်ထားပါတယ်၊ ဒီရိုးရာအိမ်တွေကို ပေါင်ကျင့်ဟောက် ပါရှန်း ရှောင်စောန်းအသင်းတော်ကပဲ ထိန်းသိမ်းစောင့်ရှောက်ထားပါတယ်၊ ဒီကိုလာလည်တဲ့ ဧည့်သည်တွေ လေ့လာနိုင်ဖို့လုပ်ထားတာပါ၊ လာရောက်ကြတဲ့ ဧည့်သည်တွေကို အသင်းတော်ရဲ့ အမှုတော်ဆောင်တွေက လိုက်လံရှင်းပြပေးပါတယ်၊ ဝင်ကြေးကောက်ခံတာတွေ မရှိပါဘူး၊ နှစ်စဉ် လာရောက်လေ့လာသူ ပျမ်းမျှအယောက် ၅ဝဝ လောက်ရှိပါတယ်၊ ပြည်တွင်းအနယ်နယ်အရပ်ရပ်ကလာတဲ့သူနဲ့ ပြည်ပနိုင်ငံခြားသားတွေများတယ်၊ ဒီရွာမှာ စုစုပေါင်း အိမ်ခြေ ၆ဝ ကျော်လောက်ပဲရှိပါတယ်၊ အားလုံးက ပေါင်ကျင့်ဟောက်ပါရှန်း ရှောင်စောန်းဘာသာကို ယုံကြည်ကိုးကွယ်သူတွေဖြစ်ကြပါတယ်''ဟု ပေါင်ကျင့်ဟောက်ပါရှန်း ရှောင်စောန်းအသင်းတော်အမှုဆောင် ဒိမ်းဆွင်းပေါင် က ပြောသည်။

ရှောင်စောန်းစံပြကျေးရွာ၏ ထူးခြားချက်မှာ ဗြိတိသျှကိုလိုနီလက်ထက် မတိုင်မီက တီးတိန်မြို့မှ ချင်းစာပေ(ZotualLai)တီထွင်သူတစ်ဦးဖြစ်သည့် ပေါင်ကျင့်ဟောက်၏ ဘာသာရေးကို ယုံကြည်သက်ဝင်သူများ နေထိုင်ကြ ကြောင်း၊ ပေါင်ကျင့်ဟောက်အား ယင်း၏စာပေတီထွင်မှုနှင့် ဘာသာရေးအတွက် အိန္ဒိယဘုရင်ခံချုပ်Sr.Chemsfort က ၁၉၁၇ ခုနှစ် ဇန်နဝါရီ ၁ ရက်တွင် စာပေတီထွင်သူနှင့် တမန်တော်မြတ်ကြီးအဖြစ် အသိအမှတ်ပြုဂုဏ်ပြုစလွယ် ချီးမြှင့်ခဲ့ကြောင်း၊ ရှောင်စောန်းစံပြကျေးရွာတွင် ရိုးရာအိမ်အပြင် ရိုးရာရက်ကန်း လုပ်ငန်း၊ ရိုးရာဝတ်စုံများ ပြောင်းလဲလာမှုကို အဆင့်ဆင့် ပြသထားသည့် ပြခန်းများလည်းရှိပြီး ပေါင်ကျင့်ဟောက်ပါရှန်း ရှောင်စောန်းဘာသာရေး အရ ဝတ်ပြုဆုတောင်းမှုများကို စိတ်ဝင်တစားလေ့လာသူများလည်း ရှိကြကြောင်း သိရသည်။

Credit: The Mirror