မြောက်ကိုရီးယား နယ်စပ်ဒေသများတွင် တရုတ်နှင့် တောင်ကိုရီးယားတို့ အိမ်ခြံမြေဝယ်ယူမှုများ တဟုန်ထိုးမြင့်တက်

မြောက်ကိုရီးယား နယ်စပ်ဒေသများတွင် တရုတ်နှင့် တောင်ကိုရီးယားတို့ အိမ်ခြံမြေဝယ်ယူမှုများ တဟုန်ထိုးမြင့်တက်လာလျက်ရှိနေသည်။

အထူးသဖြင့် အိမ်နီးချင်းဖြစ်သည့် တရုတ်အိမ်ခြံမြေရင်းနှီးမြှုပ်နှံသူများအတွက် စောစောအိပ်ယာထသည့်ငှက် အစာရသည် early birds that get the worm ဟူသည့် စကားပုံကို ကြုံကြိုက်နေရခြင်းလည်း ဖြစ်သည်။

ကမ္ဘာ့နိုင်ငံကြီးများနှင့် သမိုင်းတစ်လျှောက်တင်းမာခဲ့မှုများကို သံတမန်ရေးကြိုးပမ်းမှုများဖြင့် ပြန်လည်နွေးထွေးလာခဲ့ပြီးနောက်ပိုင်း မြောက်ကိုရီးယားနှင့် ထိစပ်လျက်ရှိသော တရုတ်နိုင်ငံမှ တန်ဒေါင်းမြို့တွင် အိမ်ခြံမြေဈေးနှုန်းများ တဟုန်ထိုးမြင့်တက်လာလျက်ရှိနေသည်။

တန်ဒေါင်း၏ အိမ်ခြံမြေဈေးနှုန်းများမှာ ၂ ရာခိုင်နှုန်းအထိ မြင့်တက်လာလျက်ရှိရာ တရုတ်ပြည်အတွင်း ထိပ်တန်း မြို့ကြီး ၇၀ နှင့် နှိုင်းယှဉ်လျှင် အကြီးမားဆုံးမြင့်တက်မှုဖြစ်ကြောင်း တရုတ်အမျိုးသားစာရင်းအင်းဗျူရိုက မေလ ၁၆ ရက်တွင် ထုတ်ပြန်ခဲ့သည့် အချက်အလက်များတွင် ဖော်ပြသည်။

ပြီးခဲ့သောလအတွင်း တန်ဒေါင်းတွင် ကြမ်းခင်းဧရိယာစုစုပေါင်း ၂၉၀၀၀၀ စတုရန်းမီတာ ရောင်းချခဲ့ရရာ ယခင်နှစ်နှင့် နှိုင်းယှဉ်လျှင် နှစ်ဆနီးပါးမြင့်တက်ခဲ့ခြင်းဖြစ်သည်ဟု ဆိုသည်။

ယခုရက်သတ္တပတ်အတွင်း တန်ဒေါင်းရှိ အာဏာပိုင်တို့က အိမ်ခြံမြေအရောင်းအဝယ်ကဏ္ဍနှင့် စပ်လျဉ်း၍ စည်းမျဉ်းသစ်များ ထုတ်ပြန်ခဲ့သည်။

တန်ဒေါင်း အာဏာပိုင်တို့ သတင်းထုတ်ပြန်ခဲ့ပုံအား တရုတ်အခြေစိုက် သတင်းဝက်ဘ်ဆိုက်တစ်ခုက ဖော်ပြခဲ့ပုံကို https://bit.ly/2s8ro3Z အင်တာနက်လင့်ခ်တွင် ကြည့်ရှုနိုင်ပါသည်။

အဆိုပါစည်းမျဉ်းအရ လက်ငင်းပေးချေရမည့်ငွေပမာဏမှာ ယခင်ကထက်မြင့်တက်သွားပြီး ဝယ်ယူပြီးနေအိမ်များကို ပြန်လည်ရောင်းချမှုအပေါ်တွင်လည်း ကန့်သတ်ချက်များ ချမှတ်လာခဲ့သည့်အပြင် အခြားအချက်အလက်များစွာလည်း တင်းကျပ်ထားသည်။

ယင်းသို့တင်းကျပ်ရခြင်း၏ အကြောင်းရင်းမှာ ဒေသတွင်း အိမ်ခြံမြေဈေးကွက် အေးနေစေရန် ဖြစ်သည်ဟု ဆိုသည်။

“အိမ်တွေဟာ နေဖို့ပါ။ အကျိုးအမြတ် မျှော်ကိုးတွက်ချက်နေဖို့မဟုတ်ပါဘူး” ဟု တန်ဒေါင်းမြို့အုပ်ချုပ်ရေးအဖွဲ့က ထုတ်ပြန်သည်။

အဆိုပါစကားမှာ တရုတ်သမ္မတ ရှီကျင့်ဖျင် ပြောကြားခဲ့ဖူးသည့် စကားလည်း ဖြစ်သည်။

တောင်ကိုရီးယား ရင်းနှီးမြှုပ်နှံသူတို့သည်လည်း နယ်စပ်အနီးရှိ စစ်ကင်းမဲ့ဇုန်အနီးတွင် အိမ်ခြံမြေများ အလုံးအရင်း ဝယ်ယူလာကြလျက်ရှိနေသည်။

စစ်ကင်းမဲ့ဇုန်၏ တောင်ဘက်တွင် ကပ်လျက်တည်ရှိသော ပါဂျူးအမည်ရှိ မြို့ကလေးတွင် တစ်လတာအတွင်း အိမ်ခြံမြေအရောင်းအဝယ် ၄၆၀၀ ခန့် ဖြစ်ပေါ်ခဲ့ကြောင်း ရိုက်တာသတင်းတစ်ရပ်တွင်လည်း ဖော်ပြထားသည်။

သို့ရာတွင် အမေရိကန်နှင့် တောင်ကိုရီးယားတို့ ပြုလုပ်ခဲ့သော ပူးတွဲစစ်ရေးလေ့ကျင့်မှုအပေါ် မကျေနပ်သောကြောင့် တောင်ကိုရီးယားနှင့် ထိပ်တန်းအဆင့် တွေ့ဆုံဆွေးနွေးရန် စီစဉ်ထားမှုတစ်ခုကို နောက်ဆုံးအချိန်ရောက်မှ မြောက်ကိုရီးယားဘက်မှ ယခုရက်သတ္တပတ်အတွင်း ဖျက်သိမ်းခဲ့သည်။

ယင်းဖြစ်ရပ်မှာ လာမည့်ဇွန်လ ၁၂ ရက်တွင် ကျင်းပရန် စီစဉ်ထားသော အမေရိကန်သမ္မတ ဒေါ်နယ်ထရမ့်နှင့် မြောက်ကိုရီးယားခေါင်းဆောင် ကင်ဂျုံအန်တို့၏ ထိပ်သီးဆွေးနွေးပွဲ ပျက်ပြားဖွယ်ရှိသည်ဟုပင် ခန့်မှန်းနေကြရာ ဝယ်လက်တို့ သတိထားရမည့်အချက်လည်း ဖြစ်သည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။ )