အာဆီယံ Smart Cities Network မှာ မြို့ပေါင်း ၂၆ မြို့ ပါဝင်စမ်းသပ်လုပ်ဆောင်မည်

ASEAN Smart Cities Network နည်းပညာမြင့် မြို့များစီမံကိန်းကွန်ရက်မှာ ပါဝင်စမ်းသပ်လုပ်ဆောင်မယ့် အာဆီယံဆယ်နိုင်ငံက မြို့ပေါင်း ၂၆ မြို့ရဲ့ အမည်တွေကို အာဆီယံအဖွဲ့ကြီးက ထုတ်ပြန်လိုက်တယ်လို့ သတင်းတစ်ရပ်မှာဖော်ပြထားပါတယ်။

အဆိုပါ Smart Cities Network ကွန်ရက်မှာ ပါဝင်စမ်းသပ်မယ့် မြို့တွေအမည်ကိုတော့ ယခုသီတင်းပတ်အတွင်းစင်ကာပူမှာ ပြုလုပ်တဲ့ ၃၂ ကြိမ်မြောက် အာဆီယံ ထိပ်သီးအစည်းအဝေးမှာ ထုတ်ဖော်လိုက်တာဖြစ်ပါတယ်။

စင်ကာပူနိုင်ငံက ကြီးမှူး လုပ်ဆောင်တဲ့ အဆိုပါ အစီအစဉ်အရ ASEAN Smart Cities Network ကွန်ရက်ကိုဆိုရင် အာဆီယံ နိုင်ငံတစ်နိုင်ငံချင်းစီက အများဆုံး မြို့ကြီး သုံးမြို့အထိ ပါဝင် ပူးပေါင်းထားတဲ့ ပလက်ဖောင်းတစ်ခု အဖြစ်ဖော်ဆောင်မှာဖြစ်ပါတယ်။

ယင်း မြို့တွေနဲ့အတူ နည်းပညာမြင့်၊ ရေရှည် တည်တံ့နိုင်တဲ့ အဆင့်မြင့် မြို့ပြတွေဖော်ဆောင်မှု ဘုံရည်မှန်းချက်ပန်းတိုင်ကို ဖော်ဆောင်သွားကြမှာဖြစ်ပါတယ်။

ယခု ထုတ်ဖော်လိုက်တဲ့ မြို့ပေါင်း ၂၆ မြို့မှာ ဆိုရင် စင်ကာပူ၊ ဂျဟိုး ဘားရူး၊ ဖူးခက်၊ ရန်ကုန်၊ ဖနွမ်ပင်နဲ့ ဗီယန်ကျင်းတို့လို အထင်ကရ မြို့ကြီးတွေ ပါဝင်နေလျက်ရှိပါတယ်။

ယခုလိုကွန်ရက်ဖော်ဆောင်ရာမှာတော့ ကြုံတွေ့ရမယ့် စိန်ခေါ်မှုတွေ အဖြစ် အရှိန်ပြင်းစွာ ပြောင်းလဲနေသည့်မြို့ပြဖွံ့ဖြိုးမှု၊ မြို့တွင်း ထူထပ်ကျပ်သိပ်မှု၊ ရေနဲ့ လေထု အရည်အသွေး စတာတွေ ရှိနေပေမယ့် နည်းပညာနဲ့ ဒစ်ဂျစ်တယ် ဖြေရှင်းမှု နည်းလမ်းတွေနဲ့အတူ ယင်းတို့ကိုဖြေရှင်းသွားနိုင်မှာဖြစ်ကြောင်း အာဆီယံအဖွဲ့ကြီးကပြောသွားပါတယ်။

ယခု ASEAN Smart Cities Network ကတော့ လက်ရှိ အားထုတ်ကြိုးပမ်းမှုတွေကို ခွန်အားဖြည့်ပေးနိုင်ပြီး smart cities တွေကို တစ်စုတစ်စည်းတည်း ဖြစ်စေကာ ယင်းကနေတဆင့် ASEAN Community-building ကိုဖြစ်စေမယ်လို့ သိရပါတယ်။

Credit: CNA