ကမ္ဘောဒီးယားတွင် လုပ်ငန်းအကောင်အထည်မဖော်သည့် ကျွန်းပေါင်း ၃၀ မှ မြေကွက်များ ပြန်လည်သိမ်းယူတော့မည်ဟု ဝန်ကြီးချုပ်ဟွန်ဆန် ကြေညာ

ကမ္ဘောဒီးယားအစိုးရသည် ပုဂ္ဂလိက ကုမ္ပဏီများမှ ဆောက်လုပ်ရေးစီမံကိန်းများ အကောင်အထည်ဖော်ရန် ရယူထားသော ကျွန်းပေါင်း ၃၀ ခန့်ပေါ်မှ မြေကွက်များတွင် လုပ်ငန်းအကောင်အထည်ဖော်မှုများ တိုးတက်မှုမရှိသောကြောင့် ပြန်လည်သိမ်းယူသွားမည်ဖြစ်ကြောင်း ဝန်ကြီးချုပ် ဟွန်ဆန်က မိန့်ခွန်းတစ်ရပ်တွင် ထည့်သွင်းပြောကြားခဲ့သည်ဟု ကမ္ဘောဒီးယားအခြေစိုက် အိမ်ခြံမြေသတင်းဝက်ဘ်ဆိုက် တစ်ခုတွင် ဖော်ပြသည်။

သီဟာနုဗီးလီပြည်နယ်၊ ခိုရောင်ကျွန်းရှိ Royal Sands ဟိုတယ်တွင် ပြောကြားသောမိန့်ခွန်း၌ ဝန်ကြီးချုပ်ဟွန်ဆန်က ထည့်သွင်းပြောကြားခဲ့ခြင်းဖြစ်ပြီး မြေယာပြန်လည်သိမ်းဆည်းမှုလုပ်ငန်းများ စတင်ရန် ကမ္ဘောဒီးယားဖွံ့ဖြိုးရေးကောင်စီအား ညွှန်ကြားချက်ပေးခဲ့သည်ဟု ဆိုသည်။

ခိုရောင်ကျွန်းသည် ကမ်းခြေမှ ၁၆ မိုင်ဝေးကွာသည့် ကမ်းလွန်ပင်လယ်ပြင်အတွင်း တည်ရှိပြီး ထိုင်းပင်လယ်ကွေ့အတွင်းတည်ရှိခြင်း ဖြစ်သည်။

“ဒါတွေအကုန်လုံး ပြန်သိမ်းပါ။ အာမခံပေးသွင်းငွေတွေကို ပြန်ပေးမှာ မဟုတ်ဘူး” ဟု ဝန်ကြီးချုပ်ဟွန်ဆန်က ပြောကြားခဲ့သည်။

“ဒီမြေနေရာတွေကို ကျွန်တော်တို့ ပြန်သိမ်းဖို့လိုပါတယ်။ ဘာကြောင့်လဲဆိုတော့ ဘာစီမံကိန်းမှ အကောင်အထည်မဖော်ကြလို့ပါပဲ” ဟု ဟွန်ဆန်က ဆက်လက်ပြောကြားသည်။

ကျွန်းများပေါ်တွင် ဆောက်လုပ်ရေးလုပ်ငန်းများ အကောင်အထည်ဖော်ရန် စီစဉ်မှုများကို သဘာဝပတ်ဝန်းကျင် ထိန်းသိမ်းရေးသမားများက ရတက်မအေးဖြစ်နေခဲ့ကြသည်မှာ ကြာမြင့်ခဲ့ပြီ ဖြစ်သည်။

ကမ္ဘောဒီးယားလူ့အခွင့်အရေးနှင့်ဖွံ့ဖြိုးရေးအသင်း Adhoc ယခုမြေနေရာပြန်လည်သိမ်းယူမည့် ကျွန်းများတွင် ခိုတွန်ဆေ၊ ခိုရပ်ဆေ၊ ခိုရောင်နှင့် ခိုရောင် ဆမ်လွမ်တို့လည်း ပါဝင်ပြီး အဆိုပါကျွန်းများပေါ်ရှိ စီမံကိန်းများကို ကမ္ဘောဒီးယားဖွံ့ဖြိုးရေးကောင်စီက စောင့်ကြည့်ကွပ်ကဲခဲ့ခြင်း ဖြစ်သည်။

ခိုတွန်ဆေကျွန်းရှိ အပန်းဖြေစခန်းငယ်တစ်ခုမှ မန်နေဂျာ ချီယန် ဆမ် အမ်က ပြောကြားရာတွင် သူဌေးကြီးများဖြစ်သော ထရွိုင်ဖက်နှင့် ဝင်းအာဝါတို့ ပိုင်ဆိုင်သော ကုမ္ပဏီများစွာသည် ကျွန်း၏အခြားဘက်ခြမ်းတွင် လွန်ခဲ့သည့်နှစ်ပေါင်းများစွာကတည်းက ဆောက်လုပ်ရေး လုပ်ငန်းများ စတင်ခဲ့သော်လည်း နောက်ပိုင်းတွင် လုပ်ငန်းများ ဆက်လက်အကောင်အထည်မဖော်တော့ဘဲ စွန့်ပစ်ထားခဲ့ကြသည်ဟု ဆိုသည်။

အနာဂတ်တွင် အကောင်အထည်ဖော်လာတော့မည့် စီမံကိန်းများကြောင့် နှစ်ပေါင်းများစွာ နေထိုင်လာခဲ့ကြသည့် ကျေးရွာသားများ ဖယ်ရှားခံရမည်ကို ချီယန် ဆမ် အမ်က ရတက်မအေးဖြစ်နေသည်။

“ကျွန်တော်တို့ ဒီမှာပဲ နေချင်ကြတယ်။ ဒီနေရာတွေကို မရောင်းလိုက်ချင်ပါဘူး” ဟုလည်း ၎င်းက ဆက်လက်ပြောကြားသည်။

ခိုရောင်ကျွန်းပေါ်တွင် အကောင်အထည်ဖော်လာနေသည့် စီမံကိန်းများကြောင့် ဒေသခံမိသားစု ၁၀၀ ကျော်နှင့် မြေယာပိုင်ဆိုင်မှု အငြင်းပွားခြင်းများလည်း ပေါ်ပေါက်ခဲ့သည်။

ဝန်ကြီးချုပ် ဟွန်ဆန်က သူ၏မိန့်ခွန်းအတွင်း ပြောကြားခဲ့ရာတွင် အစိုးရအရာရှိများနှင့် ချမ်းသာကြွယ်ဝသည့် ရင်းနှီးမြှုပ်နှံသူများသည် မြေယာများ ရယူနိုင်ရန်အတွက် ကျေးလက်ရွာသားများကို ငွေပေး၍ ဝယ်ယူခဲ့ကြသည်ဟု သံသယဖြစ်ဖွယ်များရှိနေကြောင်း ထည့်သွင်းပြောကြားသွားသည်။

“ရှင်းရှင်းပြောပဲပြောရရင် ၂၀၀၈ မတိုင်မီက အဲဒီနေရာမှာ လူဘယ်လောက်လောက် နေထိုင်ခဲ့ကြလဲလို့ မေးပါမယ်”

“သူတို့က ခိုရောင်မှာ နေထိုင်ကြတဲ့ ရွာသားတွေရဲ့ နာမည်ကို အသုံးချကြတယ်။ ပြီးရင် ဘယ်မှာမှ မနေကြဘူး။ ဒါတွေက သူတို့အတွက် ရင်းနှီးမြှုပ်နှံတာ သက်သက်ပဲ” ဟု ဝန်ကြီးချုပ်က ဆိုသည်။

ဝန်ကြီးချုပ်က မြေယာအငြင်းပွားမှုများကို မိမိထံထိ အရောက်ပို့ကာ ဖြေရှင်းခိုင်းကြသော အစိုးရအရာရှိများနှင့် ပြည်နယ်အုပ်ချုပ်ရေးမှူးများကိုလည်း အပြစ်တင်ခဲ့သည်။

“ဥပဒေဟာ ကျွန်တော့်ရဲ့ အမိန့်တွေပေါ်မှာပဲ အခြေခံပြီး အကောင်အထည်ဖော်မနေသင့်ဘူး။ ဒီတိုင်းသာဆို ဖြစ်သမျှကိစ္စတိုင်းအတွက် ဝန်ကြီးချုပ်ဆီက အမိန့်တွေကို စောင့်နေရပါလိမ့်မယ်” ဟု ဟွန်ဆန်က ပြောကြားခဲ့သည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)