ဇနီးဖြစ်သူနှင့် ကွာရှင်းပြီးနောက် ချစ်သူသစ်ရရှိထားသော ထပ်ဆင့်အော်စကာဆုရှင် သရုပ်ဆောင်မင်းသား ဘင်အက်ဖလက် ကယ်လီဖိုးနီးယားတွင် နေအိမ်ဝယ်ယူ

ထပ်ဆင့်အော်စကာဆုရင် ဘင်အက်ဖလက်သည် ကယ်လီဖိုးနီးယားပြည်နယ်တွင် နေအိမ်တစ်လုံး ဝယ်ယူလိုက်ကြောင်း သတင်းများ ထွက်ပေါ်လာသည်။

ဘင် အက်ဖလက်၏ အမည်ရင်းမှာ ဘင်ဂျမင် ဂီဇာ အက်ဖလက် ဘို့ထ်ဖြစ်ပြီး ၁၉၇၂ ခုနှစ်၊ သြဂုတ်လ ၁၅ ရက်တွင် အမေရိကန်ပြည်ထောင်စု၊ ကယ်လီဖိုးနီးယားပြည်နယ်၊ ဘာကလေမြို့တွင် မွေးဖွားသည်။

အမေရိကန် ရုပ်ရှင်သရုပ်ဆောင်၊ ရုပ်ရှင်ထုတ်လုပ်သူအဖြစ် ဖြတ်သန်းခဲ့သည်။

အနုပညာခရီးအတွင်း အော်စကာဆု ၂ ကြိမ်၊ ရွှေကမ္ဘာလုံးဆု ၃ ကြိမ်၊ BAFTA ဆု ၂ ကြိမ်နှင့် Screen Actors Guild Awards ၂ ကြိမ် ရရှိခဲ့သည်။

ဇာတ်ကားပေါင်းများစွာတွင် ပါဝင်သရုပ်ဆောင်ခဲ့သည့်အနက် ထင်ရှားသည်မှာ Armageddon (၁၉၉၈), Shakespeare in Love (၁၉၉၈)နှင့် Pearl Harbor (၂၀၀၁) တို့ ဖြစ်ကြသည်။

ရုပ်ရှင်သရုပ်ဆောင် ဂျနီဖာ ဂါနာနှင့် ၂၀၀၅ ခုနှစ်တွင် လက်ထပ်ခဲ့ပြီး သားသမီး ၃ ဦး ထွန်းကားကာ ၂၀၁၅ ခုနှစ်တွင် လမ်းခွဲခဲ့ကြပြီး ၂၀၁၇ ခုနှစ်၊ အစောပိုင်းတွင် အပြီးသတ်ကွာရှင်းပြတ်စဲခဲ့ကြသည်။

၁၉၉၇ ခုနှစ်တွင် ပါဝင်သရုပ်ဆောင်ခဲ့သည့် Good Will Hunting နှင့် ၂၀၁၂ ခုနှစ်ဇာတ်ကားဖြစ်သော Argo ဇာတ်ကားများအတွက် အော်စကာဆု ရရှိခဲ့သည်။

ဘင်အက်ဖလက် ဝယ်ယူခဲ့သည့် နေအိမ်မှာ အမေရိကန်ပြည်ထောင်စု၊ ကယ်လီဖိုးနီးယားပြည်နယ်၊ လော့စ်အိန်ဂျလိမြို့အနောက်ဘက်၊ ပစိဖိတ် ပါလစ်ဆိတ်အရပ်တွင် တည်ရှိသည်။

ကန်ဒေါ်လာ ၁၉ ဒသမ ၂၅ သန်းဖြင့် အရောင်းအဝယ်ဖြစ်ခဲ့ဖွယ်ရှိသည်ဟု Celebrity သတင်းဝက်ဘ်ဆိုက်တစ်ခုဖြစ်သော X17 က ခန့်မှန်းထားသည်။

ကန်ဒေါ်လာ သန်း ၂၀ ဟူသည်မှာ အလွန်များပြားသည့် ဈေးနှုန်းဖြစ်ပြီး ဘင်အက်ဖလက်က မည်သူ့ကို ရည်ရွယ်ကာ ဝယ်ယူခဲ့ခြင်း ဖြစ်နိုင်ပါသနည်း။

ခန့်မှန်းကြသည်မှာ ဇနီးဖြစ်သူ ဂျနီဖာ ဂါနာနှင့် ကွာရှင်းပြတ်စဲပြီးနောက် "Saturday Night Live" အစီအစဉ် ထုတ်လုပ်သူ လင်းဆေး ရှိုးကပ်စ်နှင့် ချစ်ကြိုက်လျက်ရှိရာ ရှိုးကပ်စ်အတွက် ရည်ရွယ်ခြင်းဖြစ်နိုင်ကြောင်း ခန့်မှန်းကြသည်။

E! News ဝက်ဘ်ဆိုက်၏ ဖော်ပြချက်အရ ဘင်အက်ဖလက်နှင့် ရှိုးကပ်စ်တို့သည် ပြီးခဲ့သော ဗယ်လင်တိုင်းနေ့ကတည်းကပင် လော့စ်အိန်ဂျလိဝန်းကျင်တွင် နေအိမ်လိုက်လံရှာဖွေလျက်ရှိသည်ဟု ဆိုသည်။

မျက်မြင်တစ်ဦး၏ ပြောကြားချက်အရ ၎င်းတို့နှစ်ဦးသည် ကန်ဒေါ်လာ ၈ သန်းနှင့် ၁၀ သန်း တန်ကြေးအသီးသီးရှိသော နေအိမ်များကို ကြည့်ရှုသွားကြသည်ဟု ဆိုသည်။
ချစ်သူများနေ့တွင် နေအိမ်လိုက်လံရှာဖွေရခြင်းထက် ပိုမိုကာစိတ်ကူးယဉ်ဆန်သည့် အဖြစ်မျိုးမရှိတော့ဟု ဆိုနိုင်သည်။

သို့ရာတွင် ထိုနေ့က ကြည့်ရှုခဲ့သော နေအိမ်များကို မနှစ်သက်၍ထင်သည်၊ ဘင်အက်ဖလက်မှာ နေအိမ်ဝယ်ယူမည့် တန်ဖိုးပမာဏကို နှစ်ဆခန့် တိုးမြှင့်လိုက်၏။

နေအိမ်အတွင်း အိပ်ခန်း ၇ ခန်း၊ ရေချိုးခန်း ၉ ခန်း ပါဝင်ပြီး ခြံဝန်းအကျယ် ဧကဝက်ရှိကာ နေအိမ်အကျယ်အဝန်းမှာ ၁၃၄၅၃ စတုရန်းပေ ကျယ်ဝန်းသည်။

East Coast traditional ဗိသုကာဟန်ဖြင့် ဆောက်လုပ်ထားပြီး စားဖိုမှူးအဆင့် ကိုင်တွယ်နိုင်သည့် မီးဖိုဆောင်၊ အားကစားလေ့ကျင့်ခန်းမ၊ ရုပ်ရှင်ရုံ၊ ဝိုင်သိုလှောင်ခန်းတို့လည်း ပါဝင်ကာ ခြံဝန်းအတွင်းတွင် ရေကူးကန်နှင့် ဧည့်ဂေဟာအိမ်တို့ ပါဝင်သေးသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)