လုပ်ကြံခံခဲ့ရသော အမေရိကန်သမ္မတ ဂျွန်အက်ဖ်ကနေဒီ၏ ဇနီးဘက်မှ ဘေးဖြစ်သူပိုင်ဆိုင်သောနေအိမ် အရောင်းဈေးကွက်ဝင်လာ

၁၉၆၃ ခုနှစ်၊ နိုဝင်ဘာလ ၂၂ ရက်တွင် လုပ်ကြံသတ်ဖြတ်ခြင်းခံခဲ့ရသော အမေရိကန်သမ္မတ ဂျွန်အက်ဖ်ကနေဒီ၏ ဇနီး ဂျက်ကလင်း ကနေဒီ အိုနာစစ်၏ ဘေးဖြစ်သူ (အဘိုး၏အဖေ) ပိုင်ဆိုင်သော ဖီလာဒဲလ်ဖီးယားနေအိမ် အရောင်းဈေးကွက်ဝင်လာကြောင်း နယူးယောက်အခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

အဆိုပါနေအိမ်သည် ဂျက်ကလင်း၏ အဘေးဖြစ်သူ မိုက်ကယ် ဘိုဗီးယားက ၁၈၅၀ ပြည့်လွန်ကာလများတွင် ဝယ်ယူခဲ့ခြင်းဖြစ်ပြီး ယခုအခါ အရောင်းဈေးကွက်သို့ ကန်ဒေါ်လာ ၁ ဒသမ ၈ သန်းဖြင့် ရောက်ရှိလာသည်။
မိုက်ကယ် ဘိုဗီးယားသည် ပြင်သစ်တွင် နပိုလီယံဖမ်းဆီးခံလိုက်ရပြီးနောက် ၁၈၁၅ ခုနှစ်တွင် အမေရိကန်ပြည်ထောင်စုသို့ ထွက်ခွာခဲ့သည်။

ယင်းနောက် ဖီလာဒဲလ်ဖီးယားတွင် ပရိဘောဂလုပ်ငန်းဖြင့် ငွေကြေးအတော်အတန်စုဆောင်းမိကာ အမှတ် ၃ လမ်းပေါ်တွင် နေအိမ် ၃ လုံး ဝယ်ယူခဲ့ခြင်းဖြစ်ကြောင်း အရောင်းဈေးကွက်တင်သည့် Fox & Roach ကုမ္ပဏီက ဆိုသည်။
“ဒီအိမ်နဲ့ အနီးဝန်းကျင်မှာ သမိုင်းဝင်ဖြစ်ရပ်တွေ များစွာရှိနေပါတယ်။ အနားမှာဆိုရင် လွတ်လပ်ရေးခန်းမ၊ လွတ်လပ်ရေးခေါင်းလောင်း၊ အမေရိကန်တော်လှန်ရေးပြတိုက်တွေရှိနေပြီး သောမတ်စ် ဂျက်ဖာဆင်က သမိုင်းဝင်လွတ်လပ်ရေးကြေညာစာတမ်းကို ဒီပြတိုက်နေရာမှာ ရေးသားခဲ့တာ ဖြစ်ပါတယ်” ဟု ဈေးကွက်တင်သည့်ကုမ္ပဏီမှ အကြီးအကဲဖြစ်သူ ဖရန့်ခ် ဒီဖာဇီယိုက ပြောကြားသည်။

နေအိမ်မှာ ၃ ထပ်အဆောက်အအုံဖြစ်ပြီး ကြမ်းခင်းဧရိယာမှာ စတုရန်းပေ ၅၉၀၀ ကျယ်ဝန်းသည်။
အိမ်ခန်း ၇ ခန်းနှင့် ရေချိုးခန်း ၄ ခန်း ပါဝင်ပြီး စတုရန်းပေ ၁၂၀၀ ခန့် အကျယ်အဝန်းရှိသည့် မြေအောက်ခန်းနှင့် မီးလင်းဖို ၇ ခုလည်း ပါဝင်သည့်အပြင် ဖျော်ဖြေရေးဆိုင်ရာ နေရာများ အများအပြား ပါဝင်သည်။
လက်ရှိအားဖြင့် မိသားတစ်စုတည်းနေထိုင်သည့် လူနေအိမ်အဖြစ် အသုံးပြုလျက်ရှိသော်လည်း ကွန်ဒိုမီနီယံအဖြစ် ပြောင်းလဲဆောက်လုပ်နိုင်ခွင့်လည်းရှိကြောင်း ဒီဖာဇီယိုက ပြောကြားသည်။

“ဆွဲချင်တဲ့ရုပ်ပုံ ဆွဲလို့ရတဲ့ ကင်းဗတ်စအလွတ်တစ်ခုလိုပါပဲ။ ဝယ်လက်အနေနဲ့ ဒီသမိုင်းဝင်နေအိမ်ကို ခေတ်သစ်လူနေမှု ပုံစံမျိုး ပြောင်းလဲမွမ်းမံခွင့် ရရှိထားပါတယ်” ဟု ဒီဖာဇီယိုက ဆက်လက်ပြောကြားသည်။
တရားဝင်အိမ်ခြံမြေမှတ်တမ်းများအရ အဆိုပါနေအိမ်ကို ဒေသတွင်းမိသားစုတစ်ခုက နှစ်ပေါင်း ၄၀ ကျော် ပိုင်ဆိုင်ထားခဲ့ခြင်းဖြစ်ကြောင်း သိရသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)