အီဂျစ်တွင် တည်ဆောက်နေသော အုပ်ချုပ်ရေးမြို့တော်သစ်ကြီးအတွင်း ဗဟိုစီးပွားရေးခရိုင်ဇုန်တစ်ခုကို ကန်ဒေါ်လာ ၃ ဘီလီယံ သုံးစွဲဆောက်လုပ်ရန် အီဂျစ်နှင့် တရုတ် သဘောတူလက်မှတ်ရေးထိုး

အီဂျစ်နိုင်ငံ၊ ကိုင်ရိုမြို့တော်အရှေ့ဘက် ၂၈ မိုင်အကွာတွင် ဆောက်လုပ်လျက်ရှိသည့် အုပ်ချုပ်ရေးမြို့တော်သစ်ကြီးအတွင်း ဗဟိုစီးပွားရေးခရိုင်ဇုန် (CBD) ကို ကန်ဒေါ်လာ ၃ ဘီလီယံခန့် အကုန်အကျခံတည်ဆောက်ရန်အတွက် အီဂျစ်အစိုးရနှင့် တရုတ်နိုင်ငံပိုင် ကုမ္ပဏီတို့အကြား သဘောတူစာချုပ်အပြီး
သတ်ချုပ်ဆိုခဲ့ကြသည်။

တရုတ်အစိုးရပိုင် China State Construction Engineering Corporation (CSCEC) ကုမ္ပဏီနှင့် အီဂျစ်အိုးအိမ်ဝန်ကြီးဌာနတို့အကြား သဘောတူလက်မှတ်ရေးထိုးခဲ့ကြခြင်းဖြစ်သည်။

အဆိုပါလက်မှတ်ရေးထိုးမှုတွင် CSCEC ဒုတိယဥက္ကဌ ကျန်းဇူရှန်းနှင့် အီဂျစ်အိုးအိမ်ဝန်ကြီး မိုစတာဖာ မက်ဘိုလီတို့ လက်မှတ်ရေးထိုးခဲ့ကြသည်။
ယင်းအခမ်းအနားသို့ အီဂျစ်သမ္မတ အဗ္ဗဒယ် ဖာတာ အယ်လ်စီစီနှင့် အီဂျစ်နိုင်ငံဆိုင်ရာ တရုတ်သံအမတ်ကြီး ဆောင်းအီဂိုတို့လည်း တက်ရောက်ခဲ့ကြသည်။

ဗဟိုစီးပွားရေးခရိုင်ဇုန် (CBD) အတွင်း ၃၄၅ မီတာ (၁၁၃၁ ဒသမ ၈၉ ပေ) အမြင့်ရှိ မိုးမျှော်တိုက်ကြီးတစ်လုံးလည်း ပါဝင်မည်ဖြစ်ကာ အာဖရိကတိုက်တွင် အမြင့်မားဆုံး အဆောက်အအုံကြီးဖြစ်လာမည် ဖြစ်သည်။

စီးပွားရေးဆိုင်ရာ အဆောက်အအုံ ၁၂ လုံး၊ လူနေအဆောက်အအုံ ၅ လုံးနှင့် ဟိုတယ် ၂ လုံး ပါဝင်မည် ဖြစ်သည်။
စီမံကိန်းတစ်ခုလုံးကို ၄၃ လ ( ၃ နှစ်ခွဲကျော်) အတွင်း အပြီးသတ်ဆောက်လုပ်သွားရန် ရည်မှန်းထားသည်။

ယခုစီမံကိန်း ကနဦးသဘောတူလက်မှတ်ရေးထိုးမှုကို တရုတ်သမ္မတ ရှီကျင့်ဖျင်ရှေ့မှောက်တွင် လက်မှတ်ရေးထိုးခဲ့ခြင်းဖြစ်ပြိး ၂၀၁၆ ခုနှစ်၊ ဇန်နဝါရီလအတွင်း အီဂျစ်နိုင်ငံသို့ ရှီကျင့်ဖျင်၏ အလည်အပတ်ခရီးစဉ်အတွင်းတွင် ဖြစ်သည်။

ယခုစီမံကိန်းမှာ တရုတ်ပြည်၏ ခါးပတ်နှင့်လမ်းမခြေလှမ်းတွင် တရုတ်-အီဂျစ်ပူးပေါင်းဆောင်ရွက်မှု၏ အခန်းကဏ္ဍ တစ်စိတ်တစ်ပိုင်း လည်း ဖြစ်သည်။
ပြီးခဲ့သော ၂၀၁၆ ခုနှစ်အတွင်း တရုတ်-အီဂျစ် သံတမန်ဆက်ဆံရေး နှစ်ပေါင်း ၆၀ ပြည့်ခဲ့ပြီး တရုတ်-အီဂျစ်ယဉ်ကျေးမှုနှစ်အဖြစ် သတ်မှတ်ခဲ့ကြသည်။

အီဂျစ်တွင် အုပ်ချုပ်ရေးမြို့တော်သစ် ဆောက်လုပ်ရေးလုပ်ငန်းမှာ အမျိုးသားမဟာစီမံကိန်းကြီးတစ်ခုဖြစ်ပြီး စတုရန်းကီလိုမီတာ ၇၀၀ အထိ ချဲ့ထွင်သွားရန် ရည်ရွယ်ထားသည်။

တရုတ်သမ္မတ၏ ဖိတ်ကြားချက်အရ အီဂျစ်သမ္မတစီစီသည် ယခုနှစ်စက်တင်ဘာအစောပိုင်းတွင် ဘရာဇီး၊ ရုရှား၊ အိန္ဒိယ၊ တရုတ်နှင့် တောင်အာဖရိကနိုင်ငံတို့ပါဝင်သည့် BRICS အဖွဲ့၏ နဝမအကြိမ်မြောက် ထိပ်သီးဆွေးနွေးပွဲသို့လည်း တက်ရောက်ခဲ့သေးသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)