မင်းတပ်မြို့တွင်းလမ်းတိုးချဲ့မည်ဖြစ်သဖြင့် လမ်းနယ်နိမိတ်နှင့် မလွတ်သည့် ဧရိယာအတွင်းရှိ နေအိမ်အချို့ကို ဖယ်ရှားမည်

ချင်းပြည်နယ်၊ မင်းတပ်မြို့တွင်း လမ်းချဲ့ရာတွင် လမ်းနယ်နိမိတ်နှင့် မလွတ်သည့် ဧရိယာအတွင်းရှိ နေအိမ်များကို ဖယ်ရှား ရှင်းလင်းရမည် ဖြစ်သည့်အတွက် ယင်းနေအိမ်များကို အစားထိုး နေရာပြန်ပေးပြီးမှသာ လမ်းချဲ့ခြင်းလုပ်ငန်း
စတင်မည်ဖြစ်ကြောင်း လမ်းချဲ့ရန်ဦးဆောင် ဆွေးနွေးနေသူ ချင်းပြည်နယ်
လွှတ်တော် ဒုဥက္ကဋ္ဌ ဦးအောင်သန်းက ပြောကြားသည်။

ကျောက်ထု- မင်းတပ်- မတူပီ လမ်းပေါ်ရှိ မင်းတပ်မြို့တွင်းလမ်း အရှည်သုံးမိုင်ကို လမ်းတစ်ဖက်လျှင် ၂၅ ပေစီဖြင့် စုစုပေါင်း ပေ ၅၀ တိုးချဲ့ရန်အတွက် ၂၀၁၆-၂၀၁၇ ဘဏ္ဍာနှစ်တွင် ကျပ်သန်းပေါင်း ၁၃၀ဝ ကျော်ဖြင့် ဆောင်ရွက်ရန် ဘတ်ဂျက် ရရှိထားပြီးဖြစ်ကြောင်း အစိုးရအဖွဲ့ထံမှ သိရသည်။

ယင်းလမ်းချဲ့မည်ဆိုပါက လမ်းဘေး ဝဲယာနှစ်ဖက်တွင် လမ်းနယ်နိမိတ်အတွင်း ကျရောက်နေသည့် အဆောက်အအုံများစွာရှိနေပြီး နေအိမ် အလုံးလိုက်နှင့် အချို့ နေအိမ်သည် အရှေ့ခြမ်း၊ အချို့သည် နေအိမ်အနောက်ခြမ်းစသဖြင့် ပါဝင်နေသဖြင့် အိမ်အလုံးလိုက် ပါဝင်နေသူများအတွက် အခြားနေရာတွင် ပြန်လည် နေထိုင်နိုင်မည့်နေရာ အစားထိုးမှုကို စီစဉ်ပြီးမှသာလျှင် လမ်းချဲ့နိုင်မည်ဖြစ်ကြောင်း ဦးအောင်သန်းက ပြောဆိုသည်။

အဆိုပါ လမ်းတိုးချဲ့ခြင်းကြောင့် ပျက်စီးမှုနှင့် ဖယ်ရှားရမည့် နေအိမ် အရေအတွက်စာရင်းကို ကောက်ယူကာ ပြည်နယ်အစိုးရထံသို့ တင်ပြမည်ဖြစ်ကြောင်း ၎င်းက ရှင်းပြသည်။

“ပြည်နယ်အစိုးရဆီက ကျလာပြီဆိုတာနဲ့ အလုံးလိုက် ပျက်စီးသူတွေကတော့ ဘယ်လို အိမ်နေရာ အစားထိုးပေးမယ့် အစီအစဉ်ကို အားလုံးနဲ့ညှိနှိုင်းပြီးမှ ချဲ့ရမှာဆိုတော့ အမြန်ဆုံးတော့ လုပ်နိုင်ဖို့ ကြိုးစားနေပါတယ်”ဟု ဦးအောင်သန်းက ဆိုသည်။

မင်းတပ်မြို့တွင်း၌ လမ်းဘေးဝဲယာ နှစ်ဖက်တွင် လမ်းနှင့်နီးအောင် လူနေအဆောက် အအုံများ တည်ဆောက်ရန် ခေတ်အဆက် ဆက် ခွင့်ပြုခဲ့ခြင်းကြောင့် အဆောက် အအုံများ များလာခြင်းဖြစ်ပြီး မြို့တွင်း လမ်းချဲ့မည့် ကမ်းပါးဘက်သည် အစိုးရ ဌာနဆိုင်ရာအဖွဲ့အစည်းများ၏ အဆောက် အအုံအများအပြားရှိနေကြောင်း၊ လမ်းချဲ့မည်ဆိုပါက တစ်သမတ်တည်း မလုပ်ဘဲ အများ သဘောတူညှိနှိုင်းပြီးမှ ဆောင်ရွက်ခြင်းသည် အကောင်းဆုံးဖြစ်ကြောင်း မင်းတပ်မြို့ခံ ဆလိုင်းရှယ်အောင်က သုံးသပ် ပြောကြားသည်။

“တော်တော်များများက အိမ်လုံး လုံးပျောက်မယ့်သူတွေ အိမ်ပါတဲ့သူတွေ များနေတယ်။ သူတို့တိုင်းသလိုဆိုရင်တော့ မြို့ပျက်သလို နီးပါးကိုဖြစ်မှာ၊ လွတ်တဲ့သူက ရှားတယ်”ဟု မင်းတပ်မြို့နေ ဦးဟားကလေးက ဆိုသည်။

ယင်းကြောင့် လမ်းတိုးချဲ့မည့် အစီအစဉ်ကို ဒေသခံများနှင့် ညှိနှိုင်းဆွေးနွေးကာ နစ်နာကြေးပေးလျော်ခြင်း (သို့မဟုတ်) လူနေအိမ်များကို အတတ်နိုင်ဆုံး ရှောင်ရှား၍ ကမ်းပါးနေရာများကိုသာ လမ်းချဲ့စေလိုကြောင်း ဒေသခံများက ပြောကြားသည်။

Credit: The Voice