နိုင်ငံခြားဘဏ်များတွင် ပို့ကုန်၊ သွင်းကုန် လုပ်ငန်းရှင်များကို ဘဏ်စာရင်းဖွင့်ခွင့်ပေးရန် ဗဟိုဘဏ်စီစဉ်

ပို့ကုန်၊ သွင်းကုန် လုပ်ငန်းရှင်များကို ပြည်တွင်း၌ ဘဏ်ခွဲ လာရောက်ဖွင့်ထားသည့် နိုင်ငံခြားဘဏ် ၁၃ ခုတွင် ဘဏ်စာရင်း ဖွင့်ခွင့်ပေးရန် စီစဉ်နေကြောင်း မြန်မာနိုင်ငံတော် ဗဟိုဘဏ်ထံမှ သိရသည်။

လက်ရှိအချိန်တွင် နိုင်ငံခြားဘဏ်များကို ဖွင့်ခွင့်ပေးထားသော်လည်း ပြည်တွင်းဘဏ်များကဲ့သို့ လုပ်ငန်းလုပ်ကိုင်ခွင့်များ ချပေးထားခြင်း မရှိကြောင်း၊ သို့သော် နောက်ပိုင်းတွင် ပြည်တွင်းဘဏ်များ ဈေးကွက်ယှဉ်ပြိုင်နိုင်ပါက လုပ်ငန်းများ တဖြည်းဖြည်းချင်း လုပ်ကိုင်ခွင့်ပေးမည်ဖြစ်ပြီး လတ်တလောတွင် ဘဏ်စာရင်းကိစ္စများကို အရင်ဆုံးချပေးရန် ဆောင်ရွက်နေကြောင်း ဗဟိုဘဏ်၏ တာဝန်ရှိသူတစ်ဦးက ပြောကြားသည်။

“နိုင်ငံခြားဘဏ်တွေက ပရိုမိုးရှင်းအနေနဲ့ ပြည်တွင်းက ပို့ကုန်၊ သွင်းကုန် လုပ်ငန်းရှင်တွေကို ဘဏ်အကောင့် ဖွင့်ပေးမလို့ တင်ပြလာတာတွေ ရှိတယ်။ ဒါတွေကို ဗဟိုဘဏ်ဥက္ကဋ္ဌကို တင်ပြထားတယ်။ သူခွင့်ပြုပြီးတာနဲ့ လုပ်ခွင့်ပေးမှာပါ”ဟု ၎င်းကဆိုသည်။

ဗဟိုဘဏ်အနေနှင့် စီးပွားရေး လုပ်ငန်းရှင်များကို နိုင်ငံခြားဘဏ်များတွင် အကောင့်ဖွင့်ခွင့်ပေးခြင်းအားဖြင့် ငွေပေးချေရေး ကိစ္စများပါ အဆင်ပြေစေနိုင်ပြီး ယင်းဘဏ်များမှ ချေးငွေရရှိနိုင်ပါကလည်း လုပ်ငန်းချဲ့ထွင်ရန် အကျိုးအမြတ်ကောင်းများ ရရှိနိုင်ကြောင်း ရေထွက် ပို့ကုန်လုပ်ငန်းရှင် ဒေါ်တိုးနန္ဒာတင်က ပြောကြားသည်။

“နိုင်ငံခြားဘဏ်တွေက သူတို့ရဲ့ Network ကလည်း ကျယ်တယ်။ ဒီတော့ ငွေလွှဲဖို့ဆိုရင် သူတို့က ဝန်ဆောင်မှု ပိုကောင်းတယ်။ သူတို့ဆီက ပြည်တွင်းဘဏ်တွေထက် အတိုးသက်သက်သာသာနဲ့ ချေးငွေရမယ်ဆိုရင် အကောင့်ဖွင့်ချင်ကြမှာပါပဲ”ဟု ၎င်းက သုံးသပ် ပြောကြားသည်။

လက်ရှိတွင် နိုင်ငံခြားဘဏ် ၁၃ ခုကို ဖွင့်ခွင့်ပေးထားပြီး နောက်ထပ် လျှောက်ထားသည့် နိုင်ငံခြားဘဏ်များကိုလည်း လိုင်စင်ချပေးရန် စိစစ်ဆောင်ရွက်နေကြောင်း ဗဟိုဘဏ်ထံမှ သိရသည်။

Credit: The Voice