လင်မယားကွာရှင်းကာ အိမ်ခြံမြေဝယ်ယူခွင့်ရယူနေခြင်း ဟာကွက်ကို ကိုင်တွယ်ရန်အတွက် တရုတ်တွင် အိမ်ခြံမြေဥပဒေပြင်ဆင်

တရုတ်နိုင်ငံ၏မြို့တော် ပေကျင်းတွင် ဇနီးမောင်နှံများသည်
အိမ်ခြံမြေများ ထပ်မံဝယ်ယူခွင့်ရရန်အတွက် လင်မယားကွာရှင်းနေမှုများကို ကာကွယ်ရန် အတွက် အာဏာပိုင်တို့က အိမ်ခြံမြေဥပဒေကို ပြင်ဆင်လိုက်ကြောင်း ဟောင်ကောင်အခြေစိုက် သတင်းဝက်ဘ်ဆိုက် တစ်ခုတွင် ဖော်ပြသည်။

ဇနီးမောင်နှံများသည် ဒုတိယမြောက်နေအိမ်ကို ဝယ်ယူရာတွင်
ပထမဆုံး နေအိမ်ဝယ်ယူသူများအား ပေးအပ်သည့်အခွင့်အရေး ရနိုင်ရန်အတွက် လက်ထပ်ပြီးနောက် တစ်နှစ်မပြည့်မီတွင်ပင် ကွာရှင်းမှုများပြုလုပ်လာကြသည်မှာ အလွန်များပြားလျက်ရှိနေသည်။
ယခုစည်းမျဉ်းကို တရုတ်ဗဟိုဘဏ်၊ ဘဏ်လုပ်ငန်းနှင့်အိုးအိမ်အာဏာပိုင်အဖွဲ့က ထုတ်ပြန်ခဲ့ခြင်းဖြစ်ပြီး စည်းမျဉ်းသစ် ၈ ခု ထုတ်ပြန်ခဲ့ခြင်းဖြစ်သည်။

အိမ်ခြံမြေဝယ်ယူမှုများတွင် ဟာကွက်များရှိနေသည့် ဥပဒေကို ပြီးခဲ့သော မတ်လ ၁၇ ၇က် ၊ သောကြာနေ့က ပြင်ဆင်ခဲ့ခြင်းဖြစ်သည်။
ယခုစည်းမျဉ်းတွင် ဒုတိယအကြိမ်နေအိမ်ဝယ်ယူသူဟူသည့် စကားရပ်၏ အဓိပ္ပာယ်ဖွင့်ဆိုမှုကို ချဲ့ထွင်ခဲ့ပြီး မိမိအမည်ဖြင့် နေအိမ်မဝယ်ယူဖူးသေးသော်လည်း အိမ်ခြံမြေချေးငွေရယူဖူးခြင်းရှိသူများကို ဒုတိယအကြိမ်နေအိမ်ဝယ်ယူသူဟု သတ်မှတ်ခဲ့ခြင်း ဖြစ်သည်။

နေအိမ်သစ်တစ်လုံးဝယ်ယူလိုသောကြောင့် လက်ရှိနေအိမ်ကို ရောင်းချသူများ၊ ကွာရှင်းပြတ်စဲသည့် ဇနီးမောင်နှံများကိုလည်း ပထမဆုံးနေအိမ်ဝယ်ယူသူများ၏ ခံစားခွင့် ပယ်ဖျက်လိုက်သည်။

အကယ်၍ ဇနီးမောင်နှံနှစ်ဦးသည် မတ်လ ၁၇ ရက်မတိုင်မီ ကွာရှင်းပြတ်စဲခဲ့ပြီး အိမ်ခြံမြေချေးငွေမှတ်တမ်းမရှိပါက ပထမဆုံးအကြိမ်နေအိမ်ဝယ်ယူသူအဖြစ် သတ်မှတ်ခံရမည်ဖြစ်ပြီး မတ်လ ၁၇ နောက်ပိုင်းကွာရှင်းပြတ်စဲသူများကိုမူ ထည့်သွင်းစဉ်းစားတော့မည် မဟုတ်ဟု ဆိုသည်။

(မှတ်ချက်။ တရုတ်နိုင်ငံ၊ နန်ကျင်းတွင်လည်း နှစ်ရက်တာအတွင်း လင်မယားကွာရှင်းမှုပေါင်း ၁၆၀ ခန့်ရှိခဲ့သည့် သတင်းကို iMyanmarHouse.com တွင် ရေးသားဖော်ပြခဲ့ပြီး ဖြစ်ပါသည်။ ပြန်လည်ဖတ်ရှုလိုပါက http://www.imyanmarhouse.com/news/read/586381 အင်တာနက်လင့်ခ်တွင် ဖတ်ရှုနိုင်ပါသည်။)

ဒေသခံမဟုတ်သည့် ဝယ်လက်များအနေဖြင့် လပေါင်း ၆၀ တစ်ဆက်တည်း အခွန်ပေးဆောင်ထားခြင်းမရှိပါက ပေကျင်းတွင် အိမ်ခြံမြေဝယ်ယူခွင့်ရမည်မဟုတ်ကြောင်း ပေကျင်းအာဏာပိုင်တို့က ပြောကြားထားသည်။

ဘဏ်များကလည်း ဝယ်လက်က လက်ငင်းပေးချေမည့်ငွေ၏ ရင်းမြစ်မည်သည့်နေရာမှ ရရှိသည်ကို စုံစမ်းစစ်ဆေးမည်ဟု ဆိုသည်။
အများစုမှာ အိမ်ခြံမြေအကျိုးဆောင် (သို့မဟုတ်) အခြားငွေချေးသူများထံမှ ချေးယူကာ ပေးချေကြခြင်းကြောင့် ဖြစ်သည်။

ပေကျင်း၏ ယခုခြေလှမ်းနောက်တွင် ပြည်မကြီးရှိ မြို့ကြီး ၉ မြို့တွင်လည်း စည်းမျဉ်းတင်းကျပ်မှုများ ပြုလုပ်လာခဲ့သည်။


Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)