Starship Troopers နှင့် တာဇံသရုပ်ဆောင် ကက်စပါဗန်ဒီယန်၏ နေအိမ် ကန်ဒေါ်လာ ၃ သန်းနီးပါးဖြင့် ရောင်းချမည်

၁၉၉၇ ခုနှစ်တွင် ရိုက်ကူးထုတ်လုပ်ခဲ့သည့် သိပ္ပံဆန်းကြယ်ဇာတ်ကားကြီးဖြစ်သော Starship Troopers တွင် ဂျွန်နီရီကိုအဖြစ် သရုပ်ဆောင်ကာ ကမ္ဘာကျော်တစ်ဦးဖြစ်လာခဲ့သော ကက်စပါဗန်ဒီယန်နှင့် ဇနီးဖြစ်သူ ကက်သရင်း အောက်ဇန်ဘာ့ဂ်ျတို့ ပိုင်ဆိုင်သည့် နေအိမ်ကြီးတစ်လုံး ကန်ဒေါ်လာ ၂ ဒသမ ၇၇ သန်းဖြင့်ရောင်းချရန် အရောင်းဈေးကွက်သို့ ၀င်ရောက်လာကြောင်း လော့စ်အိန်ဂျလိအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

နေအိမ်တည်ရှိသည့်နေရာမှာ အမေရိကန်ပြည်ထောင်စု၊ ကယ်လီဖိုးနီးယားပြည်နယ်၊ လော့စ်အိန်ဂျလိမြို့၊ မာလီဘူးအရပ်တွင် ဖြစ်သည်။

ကက်စပါဗန်ဒီယန်နှင့် ကက်သရင်း အောက်ဇန်ဘာ့ဂ်ျတို့သည် ပြီးခဲ့သော ၂၀၁၅ ခုနှစ်အတွင်း ကွာရှင်းပြတ်စဲခဲ့ကြရာ ကွာရှင်းပြီးနောက်ပိုင်း ယခုနှစ်ဧပြီလအတွင်း ယင်းနေအိမ်ကြီးကို ကန်ဒေါ်လာ ၂ ဒသမ ၉၉၅ သန်းဖြင့် ရောင်းချခဲ့သော်လည်း ရောင်းမစွံခဲ့ချေ။

ခြံဝန်းအကျယ်အ၀န်း တစ်ဧကခန့်ကျယ်ကာ ပင်လယ်ကမ်းခြေတွင် တည်ရှိသော ယင်းနေအိမ်ကြီးကို လွန်ခဲ့သော ၁၀ နှစ်ခန့်က ကန်ဒေါ်လာ ၁ ဒသမ ၆ သန်းဖြင့် ၀ယ်ယူခဲ့ကြခြင်းဖြစ်သည်။

အဆိုပါနေအိမ်ကို မြေထဲပင်လယ်ဗိသုကာဟန်ဖြင့် ဆောက်လုပ်ထားခြင်းဖြစ်ပြီး ၁၉၈၀ ပြည့်နှစ်တွင် ဆောက်လုပ်ခဲ့ခြင်း ဖြစ်သည်။

နေအိမ်ကြမ်းခင်းဧရိယာမှာ စတုရန်းပေ ၃၇၀၁ ပေ ရှိပြီး ခြံဝန်းအတွင်း ငါးအလှမွေးကန်များ၊ ပန်းဥယျာဉ်များ၊ သစ်ခွခြံနှင့် သီးပင်စားပင်များစွာ ပါဝင်သည်။

အိပ်ခန်း ၅ ခန်းနှင့် ရေချိုးခန်း ၃ ခန်း ပါဝင်ပြီး ဧည့်ခန်း၊ အိပ်ခန်းတို့တွင် မီးလင်းဖိုများ ပါဝင်ကာ အိပ်ခန်းအတွင်းမှတစ်ဆင့် ပင်လယ်ရှုမြော်ခင်းကို တိုက်ရိုက်တွေ့မြင်နိုင်သည်။

ကက်စပါဗန်ဒီယန်သည် ဇာတ်ကားများစွာ သရုပ်ဆောင်ခဲ့သည့်အနက် အကျော်ကြားဆုံးမှာ Starship Troopers (၁၉၉၇) ၊ တာဇံနှင့် ပျောက်ဆုံးနေသောမြို့တော် (၁၉၉၈)နှင့် ၀ါရှင်တန်အားဗင်း၏ ဂန္ထ၀င်ဝတ္ထုကို ပြန်လည်ရိုက်ကူးသည့်ဇာတ်ကားဖြစ်သော Sleepy Hollow (၁၉၉၉) တို့ ဖြစ်ကြသည်။

ကက်စပါဗန်ဒီယန်ကို အမေရိကန်ပြည်ထောင်စု၊ ဖလော်ရီဒါပြည်နယ်၊ မီလ်တန်မြို့တွင် ၁၉၆၈ ခုနှစ်၊ ဒီဇင်ဘာလ ၁၈ ရက်တွင် မွေးဖွားသည်။

ဖခင်မှာ အမေရိကန်ရေတပ်မှ တပ်မှူး၊ တိုက်လေယာဉ်မောင်းလေသူရဲတစ်ဦးဖြစ်ပြီး မိခင်မှာ မူကြိုကျောင်းဆရာမတစ်ဦးဖြစ်သည်။

ကက်စပါဗန်ဒီယန်သည် အိမ်ထောင် ၂ ဆက်ရှိခဲ့ပြီး ကာရီမစ်ချမ်နှင့် ၁၉၉၃ တွင် လက်ထပ်ကာ ၁၉၉၇ တွင် ကွာရှင်းသည်။

ကက်သရင်းအောက်ဇန်ဘာ့ဂ်ျနှင့် ၁၉၉၉ တွင် လက်ထပ်ပြီး ၂၀၁၅ ခုနှစ်တွင် ကွာရှင်းပြတ်စဲခဲ့သည်။


Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)