အိမ်မြေတိုက်ခန်း အရောင်းအ၀ယ်ကတိစာချုပ်နှင့် တံဆိပ်ခေါင်း အက်ဥပဒေ

''တိုက်ခန်း အရောင်းအဝယ် ကတိစာချုပ်တွေမှာ သတ်မှတ်ထားတဲ့ တံဆိပ်ခေါင်း မပြည့်စုံရင် တရားမဝင်ဘူးဆိုတာ ဟုတ်ပါသလား ဆရာ''ဟု မိတ်ဆွေတစ်ဦးက မေးမြန်းလာပါသည်။
''တိုက်ခန်းအရောင်းအဝယ် ကတိစာချုပ်တစ်ခုတည်း မဟုတ်ဘူး။ ချုပ်ဆိုတဲ့ စာချုပ်အားလုံးမှာ သတ်မှတ်ထားတဲ့ တံဆိပ်ခေါင်းခွန် တန်ဖိုးကို ထမ်းဆောင်ရတယ်။ မပြည့်မီဘူး ဆိုရင်တော့ တရားရုံးမှာ သက်သေခံအဖြစ် အသုံးမပြုနိုင်ဘူး။ စာချုပ်တရားမဝင်ဘူးလို့လည်း ကန့်ကွက်နိုင်တယ်''
''ကုစားလို့ ရပါသလား''

''ကုစားလို့လည်း ရပါတယ်၊ ဒါပေမယ့် ဒီကိစ္စကို အလေးထားဆောင်ရွက်တာ အလွန်နည်းတယ်။ အဆင်ပြေသလို လမ်းဘေးက ဆိုင်တွေက အဆင်သင့်ရိုက်ထားတဲ့ စာချုပ်မှာပဲ အမည်၊ တန်ဖိုး၊ ရက်စွဲ ဖြည့်စွက်ပြီး အလွယ်တကူချုပ်ဆိုလေ့ ရှိကြတယ်''
''တချို့က ပြောတော့ ယခင် ၅/- ကျပ်တန် အခွန်တံဆိပ်ခေါင်းနဲ့ ချုပ်ဆိုထားတဲ့ ကတိစာချုပ်တွေဟာ တရားမဝင်တော့ဘူးလို့ ပြောနေကြတယ် ဟုတ်ပါသလား''
''ဒါကတော့ ချုပ်ဆိုထားတဲ့ ကာလ နှစ်အပိုင်းအခြားကို ကြည့်မှ သိမှာဖြစ်တယ်၊ တံဆိပ်ခေါင်းခွန်ဥပဒေက ပြင်ဆင်ချက်တွေ ရှိနေတော့ သတ်မှတ်ထားတဲ့ နှစ်ကာလအပိုင်းအခြားအတွင်းမှာ ချုပ်ဆိုထားတဲ့ ကတိစာချုပ်တွေ ဖြစ်ရင်တော့ တရားဝင်မှာဖြစ်တယ်''

''ဒီ ၆/- ကျပ်တန် အခွန်တံဆိပ်ခေါင်းနဲ့ ချုပ်ဆိုထားတဲ့ တိုက်ခန်း အရောင်းအဝယ် ကတိစာချုပ်ဟာ တရားမဝင်ဘူးဆိုတာ ဟုတ်ပါသလား''
မိတ်ဆွေဖြစ်သူက တိုက်ခန်း အရောင်းအဝယ် ကတိစာချုပ် တစ်ခုကို ထုတ်ပြပါသည်။
''ဒီစာချုပ်အရတော့ ၂ဝဝ၉ ခုနှစ် မေလပိုင်းက ချုပ်ဆိုထားတဲ့ ကတိစာချုပ်ဖြစ်တယ်၊ အဲဒီကာလက ဆိုရင်တော့ ကတိစာချုပ်ဟာ အခွန်တံဆိပ်ခေါင်း ၆/- ကျပ် ထမ်းဆောင်ရမှာ ဖြစ်ပါတယ်''
''ဒါဆိုရင် ဒီတိုက်ခန်း အရောင်းအဝယ် စာချုပ်ဟာ ဥပဒေနဲ့ ညီညွတ်တယ်လို့ ပြောရမှာပေါ့နော်''

''အင်း- ရှင်းအောင် ပြောပြရမယ်ဆိုရင်တော့ အနီးစပ်ဆုံး ကာလကို စပြီး ပြောရမှာဖြစ်တယ်။ ဒီမှာလည်း သူငယ်ချင်းတို့ လက်လှမ်းမီတဲ့ အဓိက အသုံးများတဲ့ ကတိစာချုပ်ကိုပဲ အဓိကထားပြီး ပြောပြပါမယ်''
၁၉၅၇ ခုနှစ် မြန်မာနိုင်ငံ တံဆိပ်ခေါင်း အက်ဥပဒေအရ ကတိစာချုပ်ဆိုရင် ထိုက်သင့်တဲ့ တံဆိပ်ခေါင်းခွန်ဟာ ၃/- ကျပ် သတ်မှတ်ထားပါတယ်၊ ကျမ်းကျိန်လွှာ၊ လက်ထပ်စာချုပ်တွေမှာတော့ တံဆိပ်ခေါင်းခွန် ၅/- ကျပ် သတ်မှတ်ပါတယ်။
၁၉၉ဝ ပြည့်နှစ်၊ မတ်လ ၃ဝ ရက်နေ့မှာ ပြင်ဆင်ပြဋ္ဌာန်းတဲ့ မြန်မာနိုင်ငံ တံဆိပ်ခေါင်း အက်ဥပဒေကို ပြင်ဆင်သည့် ဥပဒေ အမှတ် ၇/၉ဝ မှာ ကတိစာချုပ်မှာ ထိုက်သင့်တဲ့ တံဆိပ်ခေါင်းခွန် ၆/- ကျပ်အဖြစ် သတ်မှတ်ထားပါတယ်။ ကျမ်းကျိန်လွှာ၊ လက်ထပ်စာချုပ်တွေကိုတော့ ၂၅/- ကျပ်အဖြစ် သတ်မှတ်တာ တွေ့ရပါတယ်။ ၁၉၉ဝ ပြည့်နှစ် ဧပြီလ ၁ ရက်နေ့ကစပြီး ကျင့်သုံးတာဖြစ်ပါတယ်။

၂ဝ၁၂ ခုနှစ်၊ မတ်လ ၁၅ ရက်နေ့မှာ ဘဏ္ဍာရေးနှင့် အခွန်ဝန်ကြီးဌာနရဲ့ အမိန့်ကြော်ငြာစာ အမှတ် ၁၂၂/၂ဝ၁၂ နဲ့ တံဆိပ်ခေါင်း အက်ဥပဒေကို အစားထိုး ပြင်ဆင်ခဲ့ပါတယ်။ ကတိစာချုပ်ဆိုရင် ငွေကျပ် ၆၀၀/- အဖြစ် တံဆိပ်ခေါင်းခွန်ကို သတ်မှတ်ပါတယ်။ ကျမ်းကျိန်လွှာ၊ လက်ထပ်စာချုပ်တွေ ဆိုရင်တော့ ငွေကျပ် ၂၅၀/- အဖြစ် တံဆိပ်ခေါင်းခွန် ထမ်းဆောင်ရမှာဖြစ်ပါတယ်။
ယခုလက်ရှိမှာတော့ ၂ဝ၁၄ ခုနှစ် တံဆိပ်ခေါင်း အက်ဥပဒေ ပြင်ဆင်ချက်အရ ကတိစာချုပ်ဆိုရင် ငွေကျပ် ၃၀၀/- အဖြစ် တံဆိပ်ခေါင်းခွန် သတ်မှတ်ပြီး ကျမ်းကျိန်လွှာ၊ လက်ထပ်စာချုပ်တွေမှာ ငွေကျပ် ၁၅၀/- အဖြစ် တံဆိပ်ခေါင်းခွန် သတ်မှတ်ထမ်းဆောင်ရမှာ ဖြစ်တယ်။

အဲဒီလို သတ်မှတ်ကာလအတွင်းမှာ ထမ်းဆောင်ရမယ့် တံဆိပ်ခေါင်းခွန်နှုန်းအတိုင်း ထမ်းဆောင်ရမှာဖြစ်တယ်။ တကယ်လို့ သတ်မှတ်ကာလအတွင်းမှာ ထမ်းဆောင်ရမယ့် တံဆိပ်ခေါင်းခွန် နှုန်းအတိုင်း အပြည့်အဝ ထမ်းဆောင်ခြင်းမရှိခဲ့ရင်တော့ အဲဒီ စာချုပ်ဟာ ဥပဒေနဲ့ မညီဘူးလို့ သတ်မှတ်နိုင်ပါတယ်''
''တံဆိပ်ခေါင်းခွန် အပြည့်အဝ ထမ်းဆောင်မထားတဲ့ စာချုပ်တွေကို တရားဝင်ဖြစ်အောင် ပြန်လည်ဖြည့်စွက်ထမ်းဆောင်လို့ မရဘူးလား''

''ကုစားလို့တော့ ရပါတယ်။ ပြီးခဲ့တဲ့ ဖေဖော်ဝါရီလထဲက ထင်တယ်။ ဘဏ္ဍာရေးဝန်ကြီးဌာန၊ ပြည်တွင်း အခွန်များ ဦးစီးဌာနကနေပြီး အသိပေးကြေညာချက် ထုတ်ပြန်ခဲ့တယ်။ နေ့စဉ်ထုတ် နိုင်ငံတော်သတင်းစာ တွေမှာလည်း ထည့်သွင်းဖော်ပြပေးခဲ့တယ်။ အဲဒီ ကြေညာချက်အရဆိုရင် တံဆိပ်ခေါင်း လျော့နည်းထမ်းဆောင်ထားသော စာချုပ်များကို တည်ဆဲ တံဆိပ်ခေါင်း အက်ဥပဒေနှင့်အညီ လိုက်နာဆောင်ရွက်ပြီးသော စာချုပ်စာတမ်းများဖြစ်စေရေးအတွက် ပြည်ထောင်စု အစိုးရအဖွဲ့၏ သဘောတူညီချက်ဖြင့် တံဆိပ်ခေါင်းခွန် ဒဏ်ကြေးကင်းလွတ်ခွင့်ကာလကို ၃၁.၃.၂ဝ၁၆ ရက်အထိ သတ်မှတ်ဆောင်ရွက်ပေးမည်ဖြစ်ကြောင်း ကြေညာခဲ့တယ်''
''သတ်မှတ်ရက် ၃၁.၃. ၂ဝ၁၆ နေ့အတွင်းမှာ လျော့နည်းတဲ့ တံဆိပ်ခေါင်းခွန်ကို ဖြည့်စွက် ထမ်းဆောင်ရတဲ့ သဘောလား''
''မှန်ပါတယ်၊ ဥပမာ- ၂ဝ၁၂ ခုနှစ် ဧပြီလအတွင်းမှာ ကတိစာချုပ်ကို ၆/- ကျပ်တန် အခွန်တံဆိပ်ခေါင်းနဲ့ ချုပ်ထားခဲ့မယ်ဆိုရင် ၂ဝ၁၂ ခုနှစ် တံဆိပ်ခေါင်းခွန် အက်ဥပဒေအရ ၆၀၀/- ကျပ် ထမ်းဆောင်ရမှာ ဖြစ်တဲ့အတွက် ကျန်တဲ့ ၅၉၄/- ကျပ်ကို မြို့နယ် အခွန်ဦးစီးဌာနမှာ ဥပဒေနဲ့အညီ ပေးသွင်းသွားရမှာဖြစ်တယ်''
''ဒဏ်ငွေဆိုတာက ဘယ်လိုလဲ''

''အဲဒီ သတ်မှတ်ရက် ၃၁. ၃.၂ဝ၁၆ ကျော်မှ ဆောင်ရွက်မယ်ဆိုရင် လျော့နည်းထမ်းဆောင်ထားလို့ ထပ်မံထမ်းဆောင်ရမယ့် တံဆိပ်ခေါင်းခွန်အပြင် လျော့နည်းထမ်းဆောင်သော တံဆိပ်ခေါင်းခွန်၏ (၁ဝ)ဆ ကို တံဆိပ်ခေါင်း အက်ဥပဒေပုဒ်မ ၃၅ (က) အရ ထမ်းဆောင်ရမှာ ဖြစ်တယ်''
''ကုစားမှုရရင်တော့ နစ်နာမှုတော့ မရှိနိုင်ဘူးပေါ့''
''မှန်ပါတယ်- ဒါကြောင့် သတ်မှတ်ထားတဲ့ တံဆိပ်ခေါင်း အက်ဥပဒေနဲ့အညီ တံဆိပ်ခေါင်းခွန် ထမ်းဆောင်လို့ စာချုပ်ချုပ်ဆိုသင့်တယ် သူငယ်ချင်း''ဟု အကြံပြု ဆွေးနွေးလိုက်ပါသည်။

Credit : ဈေးကွက်ဂျာနယ်