တောင်ကိုရီးယားတွင် ရှယ်ယာဈေးနှုန်းများကျဆင်းကာအမြတ်အစွန်းနည်းပါးလာမှုကြောင့် ကိုရီးယားရင်းနှီးမြှုပ်နှံသူတို့သည် အမေရိကန်ပြည်ထောင်စု၊ မန်ဟက်တန်နှင့် ဆန်ဖရန်စစ္စကိုတို့တွင်ရှိသောမိုးမျှော်တိုက်ကြီးများရှိအိမ်ခြံမြေကဏ္ဍတွင် ရင်းနှီးမြှုပ်နှံမှုများပြောင်းလဲလုပ်ကိုင်လာလျက်ရှိကြောင်းဆိုးလ်အခြေစိုက် အိမ်ခြံမြေ၀က်ဘ်ဆိုက်တစ်ခုတွင် ဖော်ပြသည်။
တောင်ကိုရီးယားသည် သက်ကြိးရွယ်အိုဦးရေများပြားကာအမျိုးသားပင်စင်ရန်ပုံငွေ ကိုရီးယားငွေ ၅၀၇ ထရီလီယံ
(ကန်ဒေါ်လာ ၄၁၃ ဒသမ ၂ ဘီလီယံ) အထိထားရှိရသည့် နိုင်ငံဖြစ်ပြီး ပြီးခဲ့သည့်နှစ်အတွင်းအမေရိကန်အိမ်ခြံမြေလောကတွင် စတုတ္ထမြောက်အကြီးမားဆုံးရင်းနှီးမြှုပ်နှံခဲ့သည့် နိုင်ငံဖြစ်သည်။
ယခုနောက်ပိုင်းကာလများအတွင်းတောင်ကိုရီးယားရှိရှယ်ယာဈေးနှုန်းများကျဆင်းလျက်ရှိရာစတော့ဈေးကွက်တွင် ငွေရှာရန် မလွယ်ကူကြောင်းဆိုးလ်အခြေစိုက် ဆရာများပင်စင်ရန်ပုံငွေအဖွဲ့မှ ကမ္ဘာလုံးဆိုင်ရာအလှည့်အပြောင်းရင်းနှီးမြှုပ်နှံမှုအဖွဲ့၏ အကြီးအကဲကင်မ်ချန်ဟိုကပြောကြားသည်။
ယခင်နှစ် နိုဝင်ဘာလအတွင်း ဆိုးလ်အခြေစိုက် မီရဲ့ ကမ္ဘာလုံးဆိုင်ရာရင်းနှီးမြှုပ်နှံမှုကုမ္ပဏီသည် ဆန်ဖရန်စစ္စကိုရှိFairmontဟိုတယ်ကိုကန်ဒေါ်လာသန်း ၄၅၀ ဖြင့် ၀ယ်ယူခဲ့ပြီးလော့တီဟိုတယ်ကလည်းနယူးယောက်ပဲလေ့စ်ဟိုတယ်ကိုကန်ဒေါ်လာ ၈၀၅ သန်းဖြင့် ၀ယ်ယူခဲ့သည်။
ကမ္ဘာတစ်ဝန်းရှိ ရင်းနှီးမြှုပ်နှံသူတို့သည် ရှယ်ယာဈေးများကျဆင်းမှုကြောင့် အမေရိကန်ဓနများတွင် ရင်းနှီးမြှုပ်နှံမှုများပိုမိုပြုလုပ်လာကြသည်။
အမေရိကန်ပြည်ထောင်စုတွင် ယခင်နှစ်အတွင်းအိမ်ခြံမြေ၀ယ်လက်များ၏ ၁၅ ဒသမ ၄ ရာခိုင်နှုန်းမှာ ပြည်ပမှ ဖြစ်ကြသည်။
ယခင်က ပြည်ပ၀ယ်လက်ရာခိုင်နှုန်းအားဖြင့် ၆ ဒသမ ၄ ရာခိုင်နှုန်းသာရှိခဲ့သည်။
“အမေရိကန်ပြည်ထောင်စုမှာရှိတဲ့ နယူးယောက်နဲ့ ဆန်ဖရန်စစ္စကိုလို မြို့ ကြီးတွေကိုအလုံခြုံဆုံးရင်းနှီးမြှုပ်နှံမှုဈေးကွက်လို့ တစ်ကမ္ဘာလုံးက ရှုမြင်ကြတယ်”ဟုဆိုးလ်အခြေစိုက် အိမ်ခြံမြေအတိုင်ပင်ခံအဖွဲ့ဖြစ်သောSavills Korea မှ အတိုင်ပင်ခံဒါရိုက်တာ ဂျိုအန်ဟောင်ကပြောကြားသည်။
ကိုရီးယားရင်းနှီးမြှုပ်နှံသူတို့သည် ဖွံ့ဖြိုးပြီးနိုင်ငံများရှိအိမ်ခြံမြေကဏ္ဍတွင်ရင်းနှီးမြှုပ်နှံမှုများပိုမိုပြုလုပ်လာကြခြင်း၏ အကြောင်းရင်းမှာကိုရီးယားစီးပွားရေးနာလန်ထူမှု နှေးကွေးနေခြင်းနှင့် အိမ်ခြံမြေဈေးကွက် သေးငယ်မှုတို့ကြောင့်ဖြစ်ကြောင်း ဂျိုအန်ဟောင်ကဆက်လက်ပြောကြားသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
