၂၀၁၅ အိမ်ခြံမြေဈေးနှုန်းမြင့်တက်မှု ညွှန်းကိန်းထုတ်ပြန်လိုက်ရာ တူရကီမှာ ထိပ်ဆုံးတွင်ဦးဆောင်

မျက်မှောက်ကာလ ကမ္ဘာတစ်ဝန်းတွင် နေအိမ်ဈေးနှုန်း မြင့်တက်မှုများမှာ အလွန်လျင်မြန်လျက်ရှိရာ ၀င်ငွေအကန့်အသတ်သာရှိသူများအတွက် နေအိမ်ဝယ်ယူရန် မစဉ်းစားနိုင်တော့သော ကာလဖြစ်သည်။

ကမ္ဘာ့မြို့ ကြီးများရှိ တိုက်ခန်း (သို့မဟုတ်) လုံးချင်းအိမ်တန်ဖိုးများမှာ ၀င်ငွေနည်းပါးသူတို့ တစ်သက်လုံး ငွေစုဆောင်းလျှင်ပင် ၀ယ်ယူနိုင်မည်မဟုတ်သည်အထိ မြင့်တက်လာလျက်ရှိသည်။

နောက်ဆုံးထုတ်ပြန်လိုက်သော အစီရင်ခံစာတစ်ခုတွင် ကမ္ဘာတစ်ဝန်းရှိ အိမ်ခြံမြေဈေးနှုန်း လျင်မြန်စွာမြင့်တက်လျက်ရှိသော နိုင်ငံများကို ဖော်ပြထားသည်။

Knight Frank ၏ ကမ္ဘာလုံးဆိုင်ရာအိမ်ခြံမြေဈေးနှုန်းညွှန်းကိန်းတွင် ကမ္ဘာ့နိုင်ငံပေါင်း ၅၅ နိုင်ငံကိုသုံးသပ်ဖော်ပြထားသည်။

အဆိုပါကမ္ဘာ့နိုင်ငံများအနက် အိမ်ဈေးမြင့်တက်မှု အလျင်မြန်ဆုံးဖြင့် ထိပ်ဆုံးနေရာတွင် ဦးဆောင်လျက်ရှိသည်မှာတူရကီ ဖြစ်သည်။

တူရကီသည် အိမ်ခြံမြေဈေးနှုန်းမြင့်တက်မှု ၁၈ ရာခိုင်နှုန်းဖြင့် ထိပ်ဆုံးတွင် ဦးဆောင်လျက်ရှိခြင်းမှာရင်းနှီးမြှုပ်နှံသူအများစုကတူရကီအိမ်ခြံမြေတို့ကိုယုံကြည်စိတ်ချရမှုရှိသည့် “safe haven” အဖြစ် ရွေးချယ်လာကြခြင်းကြောင့် ဖြစ်သည်။

တူရကီ၏ နောက်တွင် နယူးဇီလန် (၁၄ ဒသမ ၂ ရာခိုင်နှုန်း)၊ ဆွီဒင် (၁၂ ဒသမ ၃ ရာခိုင်နှုန်း)၊ သြစတေးလျ (၁၀ ဒသမ ၇ ရာခိုင်နှုန်း) နှင့် လူဇင်ဘတ် (၉ ဒသမ ၂ ရာခိုင်နှုန်း) တို့ဖြင့် ဦးဆောင်လျက်ရှိသည်။

ဆန့်ကျင်ဘက်အားဖြင့် ဒူဘိုင်းအိမ်ခြံမြေဈေးနှုန်းများမှာ ၂၀၁၅ ခုနှစ်အတွင်း ၁၁ ရာခိုင်နှုန်းကျဆင်းခဲ့သည်။

ဒူဘိုင်းအိမ်ခြံမြေဈေးနှုန်းမှာပုံမှန်အားဖြင့် အတက်ဘက်တွင်သာရှိလေ့ရှိသည်။

၂၀၁၄ ခုနှစ်အတွင်းကဒူဘိုင်းအိမ်ခြံမြေဈေးတက်မှုမှာနယူးဇီလန်၊ ဂျပန်၊ ပြင်သစ်၊ စင်္ကာပူနှင့် စပိန်တို့ထက် ကျော်လွန်ခဲ့သည်။

၂၀၁၅ ခုနှစ်အတွင်းကမ္ဘာ့နိုင်ငံပေါင်း ၅၅ နိုင်ငံအနက် ၄၃ နိုင်ငံတွင် အိမ်ခြံမြေပုံမှန်ဈေးတက်မှု ရှိသည်။

ဘယ်လ်ဂျီယမ်နှင့် နယူးဇီလန်တို့မှာ ၀င်ငွေနှင့် အိမ်ခြံမြေပေါက်ဈေးနှိုင်းယှဉ်လျှင် အိမ်ခြံမြေ၀ယ်ယူနိုင်မှု အနည်းပါးဆုံးနိုင်ငံများ ဖြစ်ကြသည်။

ယူကရိန်းနှင့် ဂရိတို့သည် ၂၀၁၅ ခုနှစ်အတွင်းအားအနည်းဆုံးအိမ်ခြံမြေဈေးကွက်ရှိသည့်နိုင်ငံများဖြစ်ပြီးဈေးနှုန်းကျဆင်းမှု ၁၂ ရာခိုင်နှုန်းနှင့် ၅ ရာခိုင်နှုန်းအသီးသီးရှိခဲ့ကြသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)