ကန်ထရိုက်တိုက် ဆောက်လုပ်ခွင့် လျှောက်ထားမှု ပြန်များလာ

ကန်ထရိုက်တိုက်နှင့် ၁၂ ထပ်အောက် အထပ်မြင့်တိုက်ဆောက်လုပ်ခွင့် လျှောက်ထားသူအရေအတွက်မှာ ယခုလအတွင်း ၄၀ ရာခိုင်နှုန်းခန့် ပြန်လည်မြင့်တက်လာခဲ့ကြောင်း ရန်ကုန်မြို့တော်စည်ပင်သာယာရေး ကော်မတီဝင်(၆) ဦးဌေးအောင်က ပြောသည်။

အစိုးရ အပြောင်းအလဲနှင့်အတူ နိုင်ငံခြားရင်းနှီးမြှုပ်နှံမှုများ ဝင်ရောက်မှုနှုန်းမြင့်တက်နိုင်သည့် အခြေအနေကြောင့် လုပ်ငန်းရှင်အချို့ ကြိုတင်ပြင်ဆင်လာကြသည့်အတွက် ကန်ထရိုက် အဆောက်အအုံဆောက်လုပ်မှု အရေအတွက် ပြန်တက်လာခဲ့ခြင်း ဖြစ်နိုင်သည်ဟု ဆောက်လုပ်ရေးလုပ်ငန်းရှင်တစ်ဦးလည်း ဖြစ်သည့် ဦးဌေးအောင်က ဆိုသည်။

‘‘အထပ်မြင့် အဆောက်အအုံဆောက်လုပ်ခွင့်က ကျွန်တော်တို့ကော်မတီအီးစီအစည်းအဝေးမှာလည်း စိစစ်ဖို့ တင်လာတာ တော်တော်တက်လာတယ်။ သတိထားမိသလောက်ဆို ၄၀ ရာခိုင် နှုန်းလောက် တက်လာတာ။ အခု နောက်ပိုင်း မရမ်းကုန်းဘက်ကို ပိုပြီး ဆောက်လုပ်ရေးအပိုင်းတွေ ပိုစိတ်ဝင်စားလာကြတယ်’’ဟု ၎င်းက ပြောသည်။

ရန်ကုန်မြို့တွင်း အထပ်မြင့်အဆောက်အအုံ ဆောက်လုပ်မှုနှင့်ပတ်သက်၍ ၁၂ ထပ်ခွဲအထိကို ရန်ကုန်မြို့တော်စည်ပင်သာယာရေးကော်မတီက စိစစ်ခွင့်ပြုပေးနေခြင်းဖြစ်ပြီး ယင်းအထပ်အရေအတွက်အထက် ဆောက်လုပ်ခွင့်ကို အစိုးရအဖွဲ့က စိစစ်ခွင့်ပြု ခြင်းဖြစ်သည်။

ထို့ကြောင့် အစိုးရအဖွဲ့က ဆုံးဖြတ်သည့် ၁၂ ထပ်ခွဲအထက် အဆောက်အအုံဆောက်လုပ်ခွင့် ကို လုပ်ငန်းရှင်အများစုက ၎င်း တို့အားကျော်လွန်၍ အစိုးရအဖွဲ့သို့ တိုက်ရိုက်တင်နေကြခြင်းကြောင့် ယင်း၏တိုးတက်မှုကို အတိအကျ သိရှိရန်မလွယ်ကြောင်း ၎င်းက ဆိုသည်။

ပြည်တွင်းဆောက်လုပ်ရေးလုပ်ငန်းများမှ ကန်ထရိုက် အဆောက်အအုံ ဆောက်လုပ်မှုမှာ ၂၀၁၅ သင်္ကြန်အပြီး ကာလမှစ၍ ကျဆင်းခဲ့ပြီး မိုးတွင်းကာလနှင့် ရွေးကောက်ပွဲရှိနေခြင်းကြောင့် ယင်းလုပ်ငန်းမှာ ကြာမြင့်စွာ ဆက်လက်ကျဆင်းခဲ့သည်။

ဆောက်လုပ်ရေး လုပ်ငန်းများမှာ လက်ရှိတွင် ကောင်းမွန်သည့် အခြေအနေရောက်ရှိရန် တာစူဆဲအဆင့်သာ ရှိနေသေးပြီး သိသာသည့်တိုးတက်မှု ရောက်ရှိစေရေး အချိန်ယူရန် လိုအပ်နေသေးသည်ဟု ဆောက်လုပ်ရေးလုပ်ငန်းရှင် ဦးဉာဏ်သစ်လှိုင်က သုံးသပ်သည်။

‘‘ရှေ့ဆက်တော့ ကောင်းလာဖို့ ရှိပါတယ်။ အခုကတော့ ဆောက်လုပ်ရေးလုပ်ငန်းတွေ ဖွံ့ဖြိုးဖို့အတွက် စည်ပင်ရဲ့အထပ်အမြင့်ကန့်သတ်တဲ့ကိစ္စတွေကြောင့် တွင်ကျယ်သင့်သလောက် မတွင်ကျယ်တဲ့ အခြေအနေတွေတော့ ရှိနေသေးတယ်’’ ဟု ၎င်းက ဆိုသည်။

Credit: 7Daydaily