လယ်မြေတွေအပေါ် တိုးချဲ့ထားတဲ့ ရွာမြေတွေကိုတော့ မပေးပါဘူး

သမ္မတ ဦးသိန်းစိန်၏ တစ်နိုင်ငံလုံးရှိ ကျေးရွာများကို မြေငှားဂရန် လုပ်ဆောင်ပေးရမည် ဆိုသည့် လမ်းညွှန်ချက်အရ တိုင်းနှင့် ပြည်နယ် အသီးသီးရှိ မြို့နယ်များတွင် တစ်မြို့နယ်လျှင် ရွာတစ်ရွာနှုန်း ရွေးချယ်ကာ ပိုင်ဆိုင်မှု အထောက်အထား ခိုင်မာသည့် မြေငှားဂရန်များ ပေးအပ်လျက် ရှိကြောင်း သတင်းရရှိသည်။

ကျေးရွာနေ ပြည်သူများ ပိုင်ဆိုင်မှု အထောက်အထား ရရှိနိုင်ရန်အတွက် မန္တလေးတိုင်းအတွင်းရှိ ကျေးရွာများတွင် အောက်တိုဘာလအတွင်း၌ မြေငှားဂရမ်များ ပေးအပ်လျက်ရှိသကဲ့သို့ အခြားတိုင်းနှင့် ပြည်နယ် အသီးသီးတွင်လည်း လုပ်ဆောင်လျက်ရှိကြောင်း ပြည်ထဲရေးဝန်ကြီးဋ္ဌာနက ပြောသည်။

အိမ်ဝင်းအတွင်း ဆောက်လုပ်ထားသည့် အဆောက်အဦ ခိုင်မာမှုအပေါ် မူတည်၍ ၁၀ နှစ်ဂရန်နှင့် နှစ် ၃၀ ဂရန်ဟူ၍ မြေငှားဂရန် အမျိုးအစား ၂ မျိုး ခွဲခြား သတ်မှတ်၍ ဆောင်ရွက်ပေးလျက်ရှိကြောင်း ကျောက်ဆည်ခရိုင် အုပ်ချုပ်ရေးမှုး ဦးမြင့်နိုင်က ဧရာဝတီသို့ ပြောသည်။
ဦးမြင့်နိုင်က "အခုပေးတဲ့ မြေငှားဂရန်က မူလရွာမြေကိုပဲ ပေးတာ ဖြစ်ပါတယ်။"
"လယ်မြေတွေအပေါ် တိုးချဲ့ထားတဲ့ ရွာမြေတွေကိုတော့ မပေးပါဘူး။"
"မြေငှားဂရန် သက်တမ်းကုန်ဖို့ ၃ လလိုရင် သက်တမ်းတိုး ဆက်လက် လုပ်ဆောင်ရမှာ ဖြစ်ပါတယ်။"ဟု ဆိုသည်။

၁၀ နှစ် ဂရန်အား နှစ် ၃၀ ဂရန်အဖြစ် ပြောင်းလဲလိုပါက အဆောက်အဦ ခိုင်မာအောင် ဆောက်လုပ်ပြီး နောက်တစ်ကြိမ် သက်တမ်းတိုးချိန်တွင် ပြောင်းလဲလျှောက်ထားနိုင်ကြောင်း ကျောက်ဆည်ခရိုင် အုပ်ချုပ်ရေးမှူးက ဖြည့်စွက်ပြောကြားသည်။
ကျေးရွာများအား မြေငှားဂရန် ပေးအပ်ရာတွင် တစ်ဧကလျှင် တစ်သိန်းနှုန်း တန်ဖိုးသက်မှတ်ကာ တစ်နှစ်လျှင် ၆ ရာခိုင်နှုန်း အခွန်ဆောင်ရမည် ဖြစ်သောကြောင့် အိမ်ဝင်းမှာ တစ်ဧကကျယ်လျှင် ၆၀၀၀ ကျပ်၊ ဧကတစ်ဝက် ကျယ်လျှင် ၃၀၀၀ ကျပ် စသည်ဖြင့် မြေအကျယ်အဝန်းကို လိုက်၍ အခွန်ဆောင်ရမည် ဖြစ်သည်ဟု သိရသည်။

အနိမ့်ဆုံး အိမ်ခြေ ၁၀၀ ရှိခြင်း၊ မြေပိုင်ဆိုင်မှု အရှုပ်အရှင်း ကင်းခြင်း၊ လမ်းပန်းဆက်သွယ်ရေး ကောင်းခြင်း၊ ရွာ၏ တည်ဆောက်ပုံ နေရာအနေအထား ကောင်းခြင်း စသည့် စံနှုန်းများအပေါ် မူတည်၍ တစ်မြို့နယ်လျှင် တစ်ရွာနှုန်း စံပြကျေးရွာအဖြစ် ရွေးချယ်ကာ မြေငှားဂရန်များ စတင်လုပ်ဆောင်ပေးခြင်းဖြစ်ပြီး ကျန်ရှိသောရွာများအတွက် မြေငှားဂရန်များ ဆက်လက် လုပ်ဆောင်ပေးသွားမည် ဖြစ်ကြောင်း သိရသည်။

ရွာတစ်ရွာအတွက် ဂရန်ပြုလုပ်ပေးရာတွင် အချိန် ၃ လ ခန့်ကြာမည်ဟု ခန့်မှန်းထားသော်လည်း ၃ လခွဲခန့် အထိ ကြာမြင့်လျက် ရှိကြောင်း၊ အခြားသော ကျေးရွာများတွင် ဆက်လက် လုပ်ဆောင်ပေးနိုင်ရန်အတွက် ဝန်ထမ်း အင်အားများစွာ သုံးစွဲရမည် ဖြစ်သောကြောင့် မန္တလေးတိုင်းအတွင်း စံပြသတ်မှတ်ထားသော ကျေးရွာများအားလုံးကို မြေငှားဂရန် ပေးနိုင်မည့် အချိန်ကိုမူ အတိအကျ မပြောနိုင်သေးကြောင်း ကြေးတိုင်နှင့် မြေစာရင်းဌာနမှ ဝန်ထမ်းတစ်ဦးက ဧရာဝတီသို့ ပြောသည်။

ယင်းဝန်ထမ်းက “အခြားကျေးရွာတွေကိုလည်း ဆက်လုပ်ပေးမှာပါ။ လုပ်ငန်းစဉ် များပြားတဲ့အတွက် အချိန်ကာလကတော့ နှစ်နဲ့ချီ ကြာနိုင်ပါတယ်။ မြေပိုင်ဆိုင်မှု အရှုပ်အရှင်းကင်းရင်တော့ မြန်ပါတယ်”ဟု ဆိုသည်။

လူနေထိုင်ခွင့်အတွက် မြေငှားဂရန်၊ စက်မှုလုပ်ငန်းသုံး မြေငှားဂရန်၊ သာသနာ့လုပ်ငန်းသုံး မြေငှားဂရန် စသည်ဖြင့် မြေငှားဂရန် ၇ မျိုး ရှိသည့်အနက် ယခုပေးသည့် မြေငှားဂရန် အမျိုးအစားမှာ လူနေထိုင်ခွင့်ပေးသည့် မြေငှားဂရန် ဖြစ်ကြောင်း သိရသည်။

မန္တလေးတိုင်းအတွင်းရှိ ကျောက်ဆည်၊ မြစ်သား၊ စဥ့်ကူး၊ တံတားဦး၊ အမရပူရနှင့် ပုသိမ်ကြီးစသည့် မြို့များမှ စံပြကျေးရွာများအား မြေငှားဂရန် ပေးအပ်သည့် အခမ်းအနားများကို အောက်တိုဘာလအတွင်း အဆိုပါ ကျေးရွာများ၌ ပြုလုပ်ခဲ့သည်။
မြန်မာနိုင်ငံတွင် ကျေးရွာပေါင်း ၆ သောင်းကျော် ရှိကြောင်း ပြည်ထဲရေးဝန်ကြီးဌာနထံမှ သိရသည်။

Credit: Irrawaddy News