အိမ်ခြံမြေ၊ တိုက်ခန်း၊ ကွန်ဒိုများရောင်းဝယ်ရာတွင် ဝယ်သူများကအမည်ပြောင်း လျှောက်ထားကာ အခွန်ဆောင်ခြင်းများ မပြုလုပ်ဘဲအရပ်စာချုပ်များနှင့် အထွေထွေကိုယ်စားလှယ် လွှဲစာများကိုသာအသုံးပြုပြီး အဆင့်ဆင့် ရောင်းဝယ်နေကြခြင်းကြောင့် နိုင်ငံတော်အတွက် အခွန်ဘဏ္ဍာနစ်နာမှုများ ဖြစ်ပေါ်နေရသကဲ့သို့ ပိုင်ဆိုင်မှုများအတွက်လည်း တိကျခိုင်မာမှု အားနည်းသည်ဟု လွှတ်တော် ကိုယ်စားလှယ်များ၊တရားလွှတ်တော် ရှေ့နေများနှင့် အိမ်ခြံမြေ အကျိုးဆောင်များက ပြောသည်။
”အစိုးရကလည်း အခွန်နစ်နာတယ်။ အခုဈေးကွက်ထဲမှာ လုပ်နေတဲ့ အရောင်းအဝယ်စာချုပ်နဲ့အထွေ ထွေကိုယ်စားလှယ် လွှဲစာနှစ်ခုနဲ့က ပိုင်ဆိုင်မှုမခိုင်တဲ့အပြင်တရားလည်း မဝင်ဘူး” ဟု တာမွေမြို့နယ် မဲဆန္ဒနယ် အမှတ် (၂) မှတိုင်းဒေသကြီး လွှတ်တော်ကိုယ်စားလှယ်၊ ရန်ကုန်တိုင်းဒေသကြီး လွှတ်တော် ဥပဒေကြမ်း ကော်မတီဝင် တရားလွှတ်တော်ရှေ့နေ ဦးအေးသိန်းက ပြောသည်။
အထွေထွေကိုယ်စားလှယ် လွှဲစာ General Power ၏ သဘောတရားအရလူတစ်ဦး တစ်ယောက်မှ လူ တစ်ဦးတစ်ယောက်သို့ လုပ်ပိုင်ခွင့်ကို ပေးအပ်ထားခြင်းသာဖြစ်သည့်အတွက် GP ရရှိထားသူမှ အခြား လူပုဂ္ဂိုလ်တစ်ယောက်ကို ထပ်ဆင့် ပြန်လည် လွှဲအပ်ပါက အကျုံးမဝင်သည့်အတွက် အိမ်ခြံမြေ၊ တိုက်ခန်း ရောင်းဝယ်မှုများအတွက် အရပ်စာချုပ်များ၊ GP အဆင့်ဆင့်ဖြင့် ရောင်းဝယ်နေခြင်းမှာ ခိုင်မာမှု မရှိသည့်အပြင် ပြဿနာများကို ပိုမိုရှုပ်ထွေးလာစေသည်။
” GP သဘောတရားအရ လွှဲပြီးသား လူက နောက်တစ်ယောက်ကို GP ထပ်လွှဲလို့ မရဘူး။ ထို့အတူ GP ရထားတဲ့ သူကလည်း တခြားလူကို ပြန်လွှဲခွင့်မရှိဘူး။ အပြင်မှာက အရပ်စာချုပ်နဲ့ပဲ လုပ်တာများတယ်။ GP အဆင့်ဆင့်နဲ့ ရောင်းတာက တရားဝင် ပိုင်ဆိုင်မှုမရဘူး။ အဲဒီပြဿနာတွေလည်း အများကြီးပဲ”ဟု ၎င်းက ဆက်လက်ပြောသည်။
ယခင်ခေတ်အဆက်ဆက်တွင် အိမ်ခြံမြေများ၊ ကွန်ဒိုတိုက်ခန်းများ၊ မြေကွက်များအား အရပ်စာချုပ် အဆင့်ဆင့်၊ အထွေထွေကိုယ်စားလှယ်လွှဲစာအဆင့်ဆင့်ဖြင့် ရောင်းချခဲ့သော်လည်း မူလအမည်ပေါက် ပိုင်ဆိုင်သူ၏ အထောက်အထားများ ကိုပါ နောက်ဆုံးဝယ်ယူထားသူများက လက်ဝယ်ရရှိထားရန် လိုအပ် သည်။
”မူလအမည်ပေါက် ပိုင်ရှင်ရဲ့အထောက်အထားလည်း လိုတဲ့အပြင် အဆင့်ဆင့် ပြောင်းထားတဲ့ အရပ်စာချုပ်တွေ၊ GP တွေလည်း လိုတယ်။ အဆင့်ဆင့်ကြားမှာ တစ်ခုခု လိုနေတယ် ဆိုရင်တော့ အဲဒီမြေကို မဝယ်သင့်ဘူး။ ဝယ်တဲ့သူတွေက အမြန်ဆုံး အခွန်ဆောင် ငွေသွင်း အမည်ပေါက် လျှောက်ထားပြီးမှသာ ပိုင်ဆိုင်မှုက တရားဝင်မှာ ဖြစ်တယ်။ GP မှာက ပျော့ကွက်၊ ဟာကွက်တွေ ရှိတယ်” ဟု တရားလွှတ်တော် ရှေ့နေ ဦးအေးမင်းက ပြောသည်။
တန်ဖိုး ကျပ်သိန်း ၁ဝဝ အောက်သာ ရှိသည့် မြို့ပြင်မြေကွက်များတွင် အိမ်ခြံမြေ ပွဲစားများက အမြတ် အနည်းငယ်မျှဖြင့် အချင်းချင်း ပြန်လည်ရောင်းချနေခြင်းကြောင့် ဂရန်ပေါက် မြေများထက် ရောင်းဝယ်ရ လွယ်ကူသည့် မြေချပါမစ် စလစ်မြေများ ပိုမိုဈေးကောင်းလျက်ရှိကြောင်း အိမ်ခြံမြေအကျိုးဆောင်များက ပြောသည်။
”ဂရန်မြေတွေက အလုပ်ရှုပ်တယ်။ GP လွှဲတာတွေ လုပ်ရတယ်။ စလစ်ကျတော့ လက်ပြောင်း လက်လွှဲ စာချုပ်ချုပ်ပြီး အရောင်းအဝယ်လုပ်ကြတယ်။ ဝယ်ရောင်းသမားတွေက ဖြစ်နိုင်ရင် ဂရန်မြေထက်စလစ်မြေကို ပိုကြိုက်တယ်။ မြေတစ်ကွက် ဝယ်တော့မယ်ဆိုရင် စလစ်လား၊ ဂရန်လားဆိုတာ ကြိုပြီးမေးလာကြတယ်” ဟု ဒဂုံမြို့သစ်အရှေ့ပိုင်းရှိ ရွှေလက်ရာအိမ်ခြံမြေ အကျိုးဆောင်လုပ်ငန်းမှ ကိုကျော်သန်းက ပြောသည်။
အိမ်ခြံမြေ၊ ကွန်ဒို တိုက်ခန်းများကို အရောင်းအဝယ်ပြုလုပ်ပြီးပါကပိုင်ဆိုင်မှု အမှန်သေချာစေရန်စာချုပ် စာတမ်း မှတ်ပုံတင်ရုံးတွင် အရောင်းအဝယ်စာချုပ်ပြသ၍ သတ်မှတ်ထားသည့် အခွန်နှုန်းထားများကို တရား ဝင်ပေးသွင်းစေပြီး နာမည်ပြောင်းပြီးမှသာ ပိုင်ဆိုင်မှု တရားဝင် ဖြစ်စေမည် ဖြစ်သည်။
”ရန်ကင်းရုံးမှာ သွားပြီးတော့အမည်ပေါက် သွားလျှောက်ဖို့ဆိုရင် နားလည်မှုနဲ့ စာချုပ်အသစ် တစ်ခု ထပ်ချုပ်ပြီး ပြကြတယ်။ သတ်မှတ်နှုန်းထားအတိုင်း ကောက်တယ်ဆိုပေမယ့်လည်း အပြင်ဈေးနဲ့ သူတို့ ဈေးက အရမ်းကွာနေတော့ တစ်မျိုးမြင်မှာ စိုးလို့ ဝယ်တဲ့သူတွေကနာမည်ပြောင်း လျှောက်မယ်ဆိုရင် ရောင်းသူနဲ့ တစ်ခါတည်းညှိပြီး ရုံးမှာပြဖို့အတွက် နောက်စာချုပ်တစ်ခု ထပ်ချုပ်ကြတယ်။ အဲဒါကလည်း ဝယ်ပြီး အမှန်တကယ်နေတဲ့ သူတွေကသာ အမည်ပြောင်း လျှောက်တာပါ။ ဝယ်ရောင်းသူဌေးတွေက အဲဒီအလုပ်ကို လှည့်တောင် မကြည့်ပါဘူး” ဟု ၎င်းက ပြောသည်။
Credit :The Trade Times
