သီးခြားသက်သာခွင့်အက်ဥပဒေပုဒ်မ - ၉ နှင့် စပ်လျဉ်း၍ ဥပဒေဗဟုသုတအနေဖြင့် ရေးသားဖော်ပြပေးလိုက်ပါသည်။

သီးခြားသက်သာခွင့်အက်ဥပဒေအရ ဆောင်ရွက်နိုင်သော အကြောင်းအရာများမှာ ပစ္စည်းကိုလက်ရောက်ပေးအပ်ခြင်းများ၊ ဥပဒေအရ လုပ်ဆောင်ဖွယ်ရာတာဝန်ရှိသည်ကို လုပ်ဆောင်စေခြင်းများ၊ ဥပဒေအရ တစ်စုံတစ်ရာ မပြုလုပ်ဘဲနေရန် တာဝန်ရှိသူအား ထိုအမှုကို မပြုလုပ်စေရန် တားမြစ်ခြင်းများ၊ အမှုသည်တို့၏ ရပိုင်ခွင့်များကို မြွတ်ဟကြေညာပေးခြင်းများ၊ ပစ္စည်းထိန်းခန့်အပ်ခြင်းများ တို့ဖြစ်ပါသည်။

သီးခြားသက်ခွင့်အက်ဥပဒေပုဒ်မ - ၉ အရ တရားစွဲဆိုမှုများမှာမှု တရားလိုမှာ မရွှေ့မပြောင်းနိုင်သော ပစ္စည်းဥပစာအတွင်းမှ ဥပဒေမဲ့ ဖယ်ရှားခံရသည်မှ (၆)လအတွင်း တရားစွဲဆိုရမည်ဖြစ်ပါသည်။

တရားလိုမှာ လက်မဲ့ဖြစ်ရသည်နှင့် တပြိုင်နက် တရားစွဲဆိုရန် အကြောင်းပေါ်ပေါက်ပါသည်။ ဥပစာမှ လက်လွတ်ဖယ်ရှားခံရသော တရားလိုမှာ အဆိုပါဥပစာအား ပိုင်ဆိုင်မှု အခိုင်အမာရှိခြင်း/မရှိခြင်းနှင့် မသက်ဆိုင်ပါ။ ပိုင်ရေးဆိုင်ခွင့်အတွက် ပြဿနာမပေါ်ပေါက်ပါ (ဦးချစ်ထွန်းနှင့် ဒေါ်ငွေဆောင် ၁၉၆၃၊မတစ၊၁၄၂) စီရင်ထုံးတရားနည်းလမ်းအတိုင်း မဟုတ်သော ဖယ်ရှားခံရခြင်းမှာ ဥပဒေအရ တရားစွဲဆိုရန် အကာအကွယ်ရရှိပါသည်။ တရားပြိုင်မှာ ဥပစာအား ပိုင်ဆိုင်မှုရှိစေကာမှု ဥပဒေမဲ့ ဖယ်ရှားခြင်းအတွက် အမှုအား ရင်ဆိုင်ရမည်ဖြစ် ပါသည်။

ပိုင်ဆိုင်ခွင့်နှင့်မသက်ဆိုင်ဘဲ တရားလိုမှာ ဥပစာအား ဥပဒေတစ်ရပ်ရပ်နှင့်အညီ လက်ဝယ်ထားရာမှ ဥပဒေနှင့်မညီ လက်လွတ်ခံရသည့်အခါ သက်သာခွင့်ရရှိခြင်းဖြစ်ပါသည်။ ပစ္စည်းလက်ရှိဖြစ်သူ၏ သဘောတူညီမှုလည်းမရှိ / တရားရုံး၏ အမိန့်အရလည်းမဟုတ်ဘဲ တရားပြိုင်မှ ကျူးကျော်ဖယ်ရှားခြင်းမှာ သီးခြား(၉)နှင့် သက်ဆိုင်ပါသည်။ ပစ္စည်းပိုင်ဆိုင်ခွင့်နှင့် မသက်ဆိုင်ဘဲ လက်ရှိဖြစ်သူ၏ နစ်နာမှုအတွက် ရည်ရွယ်၍ တရားစွဲဆိုခြင်းပင်ဖြစ်ပါသည်။ (ဦးမောင်မောင်မြင့်နှင့် ဦးခင်မောင်ကြီး ၁၉၉၆၊မတ စ၊၄၉) သီးခြား(၈)ကဲ့သို့ သီးခြား(၉)မှာ ပိုင်ရေးဆိုင်ခွင့်အပေါ် အခြေခံ၍ တရားစွဲဆိုခြင်း မဟုတ်သည့်အတွက် အနိုင်ဒီဂရီရရှိလျှင် လက်ရောက်ပေးအပ်ရန်သာ အမိန့်ချမှတ်မည်ဖြစ်ပြီး အဆောက်အအုံရှိလျှင်တော့ ဖျက်သိမ်း၍ ဖယ်ရှားထွက်ခွာမှုအတွက် အမိန့်ချမှတ်မည်မဟုတ်ပါ။

သီးခြားသက်သာခွင့် ဥပဒေပုဒ်မ - ၉ အရ ချမှတ်သော ဒီဂရီ အမိန့်တစ်ရပ်ကို တရားမကျင့်ထုံးဥပဒေပုဒ်မ-၁၁၅ အရ ပြင်ဆင်မှု တက်‌ရောက်နိုင်ကြောင်း ဥပဒေဗဟုသုတအနေ ဖြင့် ရေးသားဖော်ပြပေးလိုက်ပါသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

iMyanmarHouse.com ၏ ဥပ​ဒေအကြံ​ပေး ပညာရှင်​အဖွဲ့ မှ အထူးရေးသားဖော်ပြသည်။

Credit: iMyanmarHouse.com