[“အရင်ဘဝက ညီမလေးနဲ့ ကစားနေတာပါ…မေမေ”] အတိတ်ဘဝက ညီမတော်စပ်ခဲ့သူ၏ ဝိဉာဉ်နှင့် အမြဲဆော့ကစားနေသည့် အမေရိကန်မှ သမီးငယ်လေး၏ ဆန်းကြယ်သောဖြစ်ရပ်

သမီးငယ်လေး ကင်ဘလေမှာ မွေးကတည်းက ထူးခြားမှုများနှင့်…။

အနီရောင်ဆံပင်လေးများဖြင့် မွေးလာသူဖြစ်ပြီး ဖွားစ ပထမ ၄ ရက်လုံး မရပ်မနား ငိုကြွေးနေခဲ့ပြီး အိပ်စက်ခြင်းလည်း မရှိ။

ထိုသို့ မနားရသော အခြေအနေဖြင့် လအတန်ကြာရင်ဆိုင်ခဲ့ရသော မိခင်ဖြစ်သူမှာ စိတ်ပျက် ပင်ပန်းမှုဒဏ် မခံနိုင်သည့်အဆုံးတွင် ကင်ဘလေကို သူ၏ အိပ်ရာထဲသို့ ခေါ်ယူအိပ်စက်စေမှသာ အရာရာအဆင်ပြေ သွားသည်။

သမီးငယ် ကင်ဘလေနှင့် မိခင်ဖြစ်သူ အင်ဂျလာတို့မှာ အမေရိကန်ပြည်၊ ဆန်ဒီယေဂိုမြို့တွင် နေထိုင်သူများ ဖြစ်သည်။

အင်ဂျလာက The Ghost Inside My Child အမည်ရှိ အစီအစဉ်တွင် LMN သတင်းဌာနသို့ ပြောသည်မှာ သမိးငယ် ကင်ဘလေမှာ အလွန်နုငယ်စဉ်ကတည်းက ကိုယ်ချင်းစာစိတ် ကြီးမားသူဖြစ်ကြောင်း၊ ဝရုန်းသုန်းကား အခြေအနေမျိုးတွင် စိတ်ရှုပ်တတ်ကြောင်း ပြောပြသည်။

အင်ဂျလာတို့မိသားစုက ကင်ဘလေကို စိတ်ဖြေလျော့မှုရစေရန်နှင့် အသက်ရှူနည်းစနစ်များ သင်ပြပေးရန်အတွက် ကုထုံးဆရာတစ်ဦးထံ ခေါ်ဆောင်သွားခဲ့ဖူးသည်။

“အသေအချာတော့ မပြောနိုင်ပေမယ့် သူ့ရဲ့ အိပ်လို့မရတဲ့ အခြေအနေဟာ ထိရှခံစားလွယ်မှုများတာကြောင့် ဖြစ်နိုင်တယ်လို့ ကျွန်မ ယူဆခဲ့ပါတယ်” ဟု မိခင်ဖြစ်သူ အင်ဂျလာက ပြောသည်။

(▲ သမီးငယ် ကင်ဘလေမှာ အိပ်မရသည့် ပြဿနာနှင့် အမြဲရင်ဆိုင်ခဲ့ရသည်။ ဓာတ်ပုံ-LMN/ YouTube)

“သူအိပ်လို့မရတဲ့ တကယ့်အကြောင်းရင်းကို ကျွန်မ သိလိုက်ရတဲ့အချိန်မှာ ဘာလုပ်ရမှန်း မသိအောင်ဖြစ်သွားခဲ့ရတယ်”

အင်ဂျလာက သမီးငယ် ကင်ဘလေနှင့် ပတ်သက်ပြီး တုန်လှုပ်ခြောက်ခြား ကျောချမ်းခဲ့ရသည့် ဖြစ်ရပ်ကို ပြန်လည်ပြောပြသည်။

ထိုနေ့က သမီးငယ်ကင်ဘလေသည် တစ်ဦးတည်း ဆော့ကစားနေချိန်တွင် တစ်ယောက်ယောက်ကို စကားပြောနေသကဲ့သို့ တွေ့ရသည်။

“ကျွန်မက….ကင်ဘလေ--သမီးဘယ်သူနဲ့ စကားပြောနေတာလဲ…လို့မေးတော့ သူက…ညီမလေးနဲ့ စကားပြောနေတာ မေမေလို့ ပြန်ပြောတယ်။ ကင်ဘလေ အဲဒီအရွယ်တုန်းက သူ့မှာ ညီမ မရှိသေးပါဘူး” ဟု အင်ဂျလာက ပြောသည်။

“ညီမလေးလည်း မရှိဘဲနဲ့ ဘယ်လိုဆော့တာလဲ” ဟု အင်ဂျလာက သမီးငယ်ကို မေးသည်။

“မဟုတ်ဘူးမေမေ။ သမီးရဲ့ အရင်ဘဝက ညီမလေးပါ” ဟု သမီးငယ် ကင်ဘလေက ဆိုသည်။

(▲ မိမိနှင့် ဆော့ကစားနေသူမှာ အတိတ်ဘဝမှ ညီမဖြစ်ကြောင်း ကင်ဘလေက ပြောသည်။ ဓာတ်ပုံ-LMN/ YouTube)

အင်ဂျလာက သမီးငယ်အတွက် ရတက်မအေးဖြစ်သောကြောင့် ကလေးအထူးကုဆရာဝန်တစ်ဦးထံ ပြောပြရာ အဆိုပါ ဆရာဝန်က အလေးမထားခဲ့ဘဲ သမီးငယ်၏ အသိဉာဏ်ထက်မြက်မှု လက္ခဏာတစ်ရပ်သာ ဖြစ်ကြောင်း၊ သမီးငယ်တွင် ကြီးမားသည့် စိတ်ကူးစိတ်သန်းတစ်ခုရှိနေခြင်းသာဖြစ်ကြောင်း ပြောခဲ့သည်။

ထို့နောက် အင်ဂျလာက သမီးငယ် ကင်ဘလေအား အတိတ်ဘဝမှ ညီမငယ်ဆိုသူအကြောင့် ထပ်မံမေးမြန်းခဲ့ပြီး နာမည်မေးခဲ့သည်။

ထိုအခါ ကင်ဘလေက “ဟုတ်ကဲ့မေမေ။ သူ့နာမည်က ဆာရာ..တဲ့။ သူက ဝမ်းနည်းအားငယ်နေလို့ သမီးနဲ့ လာဆော့ချင်နေတာ” ဟု ဖြေသည်။

မည်သည့်အတွက် ဝမ်းနည်းရသနည်းဟု မေးသောအခါ “သမီးတို့ အရင်ဘဝ အတူနေခဲ့ကြတုန်းက သူက သမီးကို မီးထဲကို တွန်းချပြီး သတ်ခဲ့တာ။ ဒါပေမယ့် မတော်တဆဖြစ်တာပါ။ သူက အဲဒါကို အရမ်းခံစားနေ ရတာ” ဟု ကင်ဘလေက ပြောပြသည်။

(▲ အင်ဂျလာက သမီးငယ် ကင်ဘလေကို အတိတ်၏ စိတ်အာရုံများ ဖြတ်တောက်စေလိုသည်။ ဓာတ်ပုံ-LMN/ YouTube)

“ကျွန်မခေါင်းထဲ တွေးနေမိတာက…အိုး…ဘုရားသခင်။ ငါတို့တော့ ပြဿနာပဲ။ ဒါက ပုံမှန်ကိစ္စတစ်ခု မဟုတ်ဘူး..လို့ တွေးနေမိပါတယ်” ဟု အင်ဂျလာက ပြောသည်။

အဆိုပါ ပြဿနာကို မည်သို့ဖြေရှင်းရမည်မသိသောကြောင့် အလွန်စိတ်ပူကြောင်း အင်ဂျလာက ပြောသည်။

ကင်ဘလေ တဖြေးဖြေးကြီးပြင်းလာချိန်တွင် အင်ဂျလာက ဆာရာ၏ အကြောင်းနှင့် ဖြစ်ရပ်အသေးစိတ်ကို မေးမြန်းကြည့်သည်။

ကင်ဘလေက ပြောပြသည်မှာ “သမီးက အင်္ဂလန်နိုင်ငံ လီဗာပူးမြို့မှာ ၁၈၆၀ ပြည့်နှစ်ကနေ ၁၈၇၀ ပြည့်နှစ် အကြား နေထိုင်ခဲ့ပါတယ်။ အဖေက ကုန်သည်တစ်ယောက်ပါ။ အစ်ကိုရဲ့ နာမည်က သောမတ်၊ အဲဒီတုန်းက သမီးရဲ့ နာမည်က ခရစ္စတီးနားပါ။” ဟု ဆိုသည်။

“ဆာရာလို့ခေါ်တဲ့ ညီမလေးတစ်ယောက်လည်းရှိတယ်။ အမေ့နာမည်က အင်နာပါ။ မိသားစုက ဆင်းရဲကြတယ်။ အိမ်လေးကလည်း တော်တော်သေးတယ်။ ကောက်ရိုးအိပ်ယာမှာ အိပ်ကြရပါတယ်။ တစ်ညမှာ တစ်အိမ်လုံးအိပ်နေတဲ့အချိန် မီးဖိုကနေ အိမ်ကို မီးလောင်ပါတယ်”

(▲ ဆာရာက မိမိကို အားပေးနှစ်သိမ့်ကြောင်း ကင်ဘလေက ပြောသည်။ ဓာတ်ပုံ-LMN/ YouTube)

“ထုတ်တန်းကို မီးလောင်တော့ ပြုတ်ကျလာတော့မယ်ထင်ပြီး တွန်းလိုက်တာမှာ သမီးကို မီးထဲတွန်းချသလို ဖြစ်သွားတယ်”

ကင်ဘလေမှာ ယခုအခါ အသက် ၂၁ နှစ်အရွယ်ရှိပြီဖြစ်ပြီး ဆာရာနှင့် ပတ်သက်မှုများမှ ရုန်းထွက်နိုင်ရန် ခက်ခက်ခဲခဲ ကြိုးစားနေရဆဲ ဖြစ်သည်။

ဆာရာကို မတွေ့မြင်ရတော့သော်လည်း သူရှိနေသည်ကို ခံစားရကြောင်း၊ ဆာရာ မိမိနောက်တွင် ရှိနေမှုအပေါ် စိတ်ကျေနပ်နှစ်သိမ့်မှု ခံစားရကြောင်း ကင်ဘလေက ပြောသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: My sister accidentally killed me by pushing me into the fire before I was reborn' Photo Credit-LMN/YouTube