မြေအရောင်းအဝယ်စာချုပ်တစ်ခုကို ပိုင်ဆိုင်မှုခိုင်မာအောင် ဘယ်လိုချုပ်ဆိုမလဲ

ဒီအပတ်အတွက်က အိမ်ခြံမြေဥပဒေအမေးအဖြေကဏ္ဍလေးတစ်ဖန်ပြန်လည်ရောက်ရှိလို့လာပါပြီ။ ဒီအပတ်လေးမှာတော့ အမေးအများဆုံးအိမ်ခြံမြေဥပဒေအမေးအဖြေ (၃)ခုကို တင်ဆက်ဖော်ပြပေးသွားမှာပဲဖြစ်ပါတယ်။

⚖️မေးခွန်း(၁) - မြေအရောင်းအဝယ်စာချုပ်တစ်ခုကို ပိုင်ဆိုင်မှုခိုင်မာအောင် ဘယ်လိုစာချုပ်ချုပ်ဆိုရမလဲ။

မြေအရောင်းအဝယ်တစ်ခု ပြုတော့မည်ဆိုပါက ဝယ်ယူသူမှာ ပိုင်ဆိုင်မှု ခိုင်မာစေရန်အတွက် ရွှေးချယ် ဝယ်ယူရန်မှာ အရေးကြီးပါသည်။ ဝယ်ယူသူ၏ တာဝန်မှာ မဝယ်ယူခင် ရောင်းမှားဝယ်မှား မဖြစ်စေရေးအတွက် တတ်ကျွမ်းနားလည်သူများနှင့် တိုင်ပင်ကာ ထိုက်သင့်သော စီစစ်မှုပြုပြီး လိုအပ်သည်များအား ရောင်းချသူထံ တောင်းဆိုနိုင်ပါသည်။ ဥပမာ - မြေငှားဂရန်ဖြစ်ပါက မြေငှားသက်တမ်း စစ်ဆေးခြင်း၊ အမည်ပေါက် အကွက် အမှတ် မှန်မမှန်၊ ပေအကျယ်အဝန်း ပြည့်မပြည့်၊ အမွေဆက်ခံသူထံမှ ဝယ်ယူရခြင်းဖြစ်ပါက အမွေဆက်ခံ ပိုင်ဆိုင်ကြောင်း မြွတ်ဟကြေညာ မှတ်ပုံတင်စာချုပ်ချုပ်ဆိုထားခြင်း ရှိမရှိ၊ မြေကွက်အား ခွဲစိတ်ရောင်းချခြင်း ဖြစ်ပါက အစိုးရရုံးဌာန၏ သတ်မှတ်ခွင့်ပြုချက်နှင့် အမှုတွဲ အခြေအနေ စည်ပင်ယာရေးကော်မတီ၊ မြေယာ စီမံခန့်ခွဲမှု ကော်မတီထံတွင် စစ်ဆေးမှုပြုရမည် ဖြစ်ပါသည်။

ပိုင်ဆိုင်မှုစာရွက်စာတမ်းများအား အထက်ဖော်ပြပါအတိုင်း အစိုးရဌာနများနှင့် တိုက်ဆိုင်စစ်ဆေးပြီး မှန်ကန်မှုရှိသည့်အခါမှ ဝယ်ယူရန် ဆုံးဖြတ်သင့်ပါသည်။ မြေငှားသက်တမ်း ကျန်ရှိခြင်းမရှိလျှင် ရောင်းသူအား သက်တမ်းတိုး အရင်ဆောင်ရွက်ခိုင်းပါ။ သက်တမ်းကုန်မြေမှာ အစိုးရစီမံခန့်ခွဲပိုင်ခွင့်အတွင်း ပြန်လည် ကျရောက်သောကြောင့် အထူးသတိပြုပါ။ ဝယ်ယူရာတွင်လဲ မလောပါနှင့် မြေပြင်တိုင်းတာမှု ပေပြည့်မပြည့် ၊ ကျူးကျော်ကင်းရှင်းခြင်းရှိမရှိ အရှေ့လားရာ၊ အနောက်လားရာများ မှန်ကန်ခြင်းရှိမရှိ ကွင်းဆင်းသွားရောက်ကာ ပတ်ဝန်းကျင်အခြေအနေလဲ မေးမြန်းသင့်ပါသေးသည်။ ရောင်းချသူအားလဲ ဂရန်မြေဖြစ်လျှင် (၁)နှစ် အတွင်း ကူးယူထားသော မြေပုံရှိမရှိ မရှိလျှင် ထုတ်ယူရန် အချိန်ကာလ ညှီနှိုင်းပါ။ အရောင်းမြေပုံမှာ ဂရန် အမည်ပေါက်နှင့် အမွေဆက်ခံသူများသာ ကူးယူနိုင်သော မြေပုံဖြစ်ပြီး ရောင်းချသူမှာ စာရွက်စာတမ်း ပြည့်စုံ မှန်ကန်မှ ထုတ်ယူနိုင်ပါသည်။ အလွယ်တကူထုတ်မရသောကြောင့် ဝယ်ယူသူအတွက် အထောက်အထား တစ် ရပ် ဖြစ်စေပါသည်။

စရန်ပေးစာချုပ်ချုပ်ဆိုသည့်အခါတွင်လဲ ကန့်ကွက်သူရှိမရှိ သတင်းစာကြေညာမှုပြုပြီး ကန့်ကွက်သူ ပေါ်ပါက ရောင်းသူမှ သတ်မှတ်ရက် (၇)ရက်အတွင်း ဖြေရှင်းဆောင်ရွက်ရန်နှင့် အကယ်၍ဖြေရှင်းမှု မပြုနိုင် လျှင် ပုံမှန်အတိုင်း ရောင်းသူမှ စရန်(၂)ဆပေးရန်အတွက် စာချုပ်အား တတ်ကျွမ်းနားလည်သည့် ရှေ့နေများနှင့် ပြင်ဆင်ကာ စာချုပ်ချုပ်ဆိုမှုပြုပါ။ သတင်းစာကြေညာရန်လဲ မမေ့ပါနှင့် မြေကွက်ဝယ်ယူမှုအား အစီအစဉ်တကျ ဆောင်ရွက်ပါ။ မြေကွက်အား လင်မယားနှစ်ဦးပိုင်ဆိုင်မှုရှိပြီး တစ်ဦးအမည်ပေါက်လဲ နှစ်ဦးလုံးအား အရောင်းအဝယ်စာချုပ်တွင် လက်မှတ်ရေးထိုးမှုပြုလျှင် နောင်တွင် ငြင်းပယ်ခြင်း၊ ကန့်ကွက်ခြင်း မဖြစ်ပေါ်တောပါ။ ရောင်းသူမှ၎င်းနှင့်သက်ဆိုင်သည့် ရောင်းခွန်ထမ်းဆောင်ပေးအပ်ရန်လိုအပ်ပြီး စရန်ပေးစာချုပ်တွင် အသေးစိတ် ထည့်သွင်းချုပ်ဆိုပါ။

ကန့်ကွက်သူမပေါ်ပေါက်သည့်အခါမှ အပြီးအပိုင်ငွေကြေစာချုပ်ချုပ်ဆိုရန် ဆောင်ရွက်ရမည်ဖြစ်ပြီး ကျန်ငွေအားလဲ အရောင်းမြေပုံ ထွက်ရှိသည့်အခါ၊ ရာဖြတ်တင်၍ ရောင်းခွန်၊ ဝယ်ခွန် တံဆိပ်ခေါင်းခွန် ထမ်း ဆောင်သည့်အခါ၊ ရောင်းသူဝယ်သူ(၄)လအတွင်း မှတ်ပုံတင်စာချုပ် ချုပ်ဆိုသည့်အခါ၊ မြေကွက်အား ဝယ်ယူသူ အမည်ပြောင်းဆောင်ရွက်ပြီး ဂရန်ထွက်ရှိသည့်အခါစသဖြင့် ကျန်ငွေအား မြေကွက်တန်ဖိုးပေါ်မူတည်၍ တစ် စိတ်တစ်ဒေသစီ ခွဲဝေပေးချေခြင်းလဲ ပြုနိုင်ပါသည်။ မြေကွက်တန်ဖိုး မြင့်သည့်အခါ ငွေပေးချေခြင်းအား အထက်ဖော်ပြပါအတိုင်း လုပ်ငန်းစဉ်အလိုက်ခွဲဝေ သတ်မှတ်ပေးချေခြင်းက ပိုအဆင်ပြေစေပါသည်။ ထိုအခါမှ ရောင်းချသူများအား ရောင်းခွန်ထမ်းဆောင်၍ မှတ်ပုံတင်စာချုပ်ချုပ်ဆိုရန် ခေါ်ဆိုရလွယ်ကူမည်ဖြစ်ပြီး ရောင်း ချသူမှ လိုအပ်သည်များ အခမဲ့ ကူညီဆောင်ရွက်ပေးခြင်းဖြင့် ဝယ်ယူသူ ဂရန်အမည်ပြောင်း မြန်ဆန်မည်ဖြစ် ပါကြောင်း ဖြေဆိုရေးသားပေးလိုက်ပါသည်။

⚖️မေးခွန်း(၂) - အမည်ငှားစနစ်နဲ့ ဝယ်ယူခြင်းဆိုသည်မှာ အဘယ်နည်း။

အမည်ငှားစနစ်ဖြင့် တိုက်ခန်း၊ အိမ်ခြံမြေအား ဝယ်ယူခြင်းအား ဘီနာမီစနစ်ဖြင့် ဝယ်ယူခြင်းဟု ခေါ်ဆိုပါသည်။ အမည်ငှားစနစ်ဖြင့် ဝယ်ယူသည်ဆိုပါက ငွေရှင်သည်သာ ပိုင်ရှင်အစစ်အမှန်ဖြစ်ပြီး အမည်ခံမှာ ပစ္စည်း အား ခေတ္တလက်ခံထားရှိခြင်းပဲ ပြုနိုင်ပါသည်။ ပစ္စည်းပိုင်ရှင်မှ ပြန်လည်တောင်းယူသည့်အခါ အမည်ငှားမှ ပြန် လည် ပေးအပ်ရန်တာဝန်ရှိပါသည်။

သားသမီး၊ ဆွေမျိုး သားချင်း၊ တူ/တူမ၊ မြေးများအတွက် ရည်စူး၍ အကြီးအကဲမှ ငွေစိုက်၍ ဝယ်ယူပေး ခြင်းဖြစ်ပါက အဆိုပါ ငွေထုတ်ပေးခြင်းမှာ ဘီနာမီစနစ်ဖြင့် ဝယ်ယူခြင်းမျိုး မဟုတ်ပါ။ အပိုင်ပေးအပ်ခြင်း သဘာပင် ဖြစ်ပါသည်။ ဘီနာမီစနစ်ဖြင့် အမည်ခံ/အမည်ငှား ဝယ်ယူခြင်းမှာ အခြားအိန္ဒိယ၊ တရုတ်နိုင်ငံများတွင် အသုံးများကြ ပါသည်။ အရောင်းအဝယ်များတွင်သာ ဘီနာမီစနစ်ဖြင့် ဝယ်ယူခြင်းရှိသည် မဟုတ်ဘဲ စီးပွားရေးလုပ်ငန်းများ ၊ အစုရှယ်ဟာ ထည့်ဝင်ခြင်းများတွင်လဲ ဘီနာမီစနစ်ဖြင့် ကိုယ်စားဆောင်ရွက်စေခြင်းများလဲရှိပါသည်။ ဘီနာမီ အမည်ခံမှာ ဝယ်သူဟန် စာချုပ်ချုပ်ဆို ဝယ်ယူမှုပြုပေးခြင်းဖြစ်ကာ သီးခြားသဘောတူညီချက်လဲ ၎င်းတို့ကြား တွင် ခံစားခွင့်အတွက်ထားရှိပြီး နှုတ်သဘောတူညီချက် (သို့) စာချုပ်စာတမ်းဖြင့် ပြုလုပ်ထားသည်များလဲ ရှိပါသည်။

ဘီနာမီစနစ်ဖြင့် အရောင်းအဝယ်များတွင် ငွေပေးချေသူ၏ နာမည်အား ထည့်သွင်းချုပ်ဆိုရန် မလိုပါ။ အမည်ငှားဖြင့် နာမည်သုံး ဝယ်ယူခြင်းဖြစ်ပြီး အငြင်းပွှားမှုပေါ်ပေါက်ပါက အကြောင်းအရာပေါ်မူတည်၍ အရောင်းအဝယ်၏ ရည်ရွယ်ချက်၊ ပါဝင်သူများ ဆက်စပ်မှု၊ ပိုင်ဆိုင်မှုစာချုပ်စာတမ်း သိမ်းဆည်းမှု၊ ပစ္စည်းအား လက်ရှိထားရှိမှု၊ ငွေအား အမှန်တကယ်ပေးချေသူ အစရှိသည်တို့ကို သုံးသပ်ပြီး ဘီနာမီစနစ်ဖြင့် ဝယ်ယူခြင်း မှန်မမှန် ဆုံးဖြတ်ရမည်ဖြစ်ပါသည်။

အရောင်းအဝယ်စာချုပ်တွင် ဘီနာမီအမည်ခံ၏ နာမည်တစ်ခုထဲသာ သုံး၍ စာချုပ်ချုပ်ဆိုရမည်ဖြစ်ပြီး ငွေပေးချေသူနာမည်နှင့် ဘီနာမီ အမည်ခံ၏ နာမည်နှစ်ဦး စလုံးအား စာချုပ်တွင် ထည့်သွင်းချုပ်ဆိုရန် မလိုပါ။ ဒေါ်ကြည်ခင်နှင့် ဦးမင်းငွေဝင်းပါ - ၂ အမှုတွင် တရားပြိုင် အား ဘီနာမီစနစ်ဖြင့် ဝယ်ယူခြင်းဖြစ်ပါက စာချုပ် တွင် တရားလိုငွေပေးသူ၏ အမည်ကို ဝယ်ယူသူအနေဖြင့် ပါဝင်ရန်မသင့်ကြောင်း သုံးသပ်ထားသည်ကို တွေ့ရှိရပါသည်။ ဘီနာမီစနစ်မှာ ယုံကြည်အပ်နှံမှုပင်ဖြစ်သဖြင့် ဖောက်ဖျက်ပါက တရားစွဲဆိုခွင့်လဲရှိကြောင်း ဖြေဆို ရေးသားပေးလိုက်ပါသည်။

⚖️မေးခွန်း(၃) - တိုက်ခန်းဝယ်သူအနေဖြင့် စရန်ငွေပေးသည့်နေ့တွင် ရောင်းသူထံမှ မည်သည့် စာရွက်စာတမ်းများကို တောင်းယူရမည်နည်း။

တိုက်ခန်းတစ်ခန်း ဝယ်ယူမည်ဆိုပါက အဆောက်အဦမှာ မည်သည့်မြေအမျိုးပေါ်တွင် ဆောက်လုပ်ထားခြင်းဖြစ်ကြောင်း သိရှိအောင် အရင်မေးမြန်းပါ။ မြေပိုင်ဆိုင်မှု မှတ်တမ်းမှာ သက်ဆိုင်ရာတွင်ရှိပြီး မြေမှာ မည်သူနာမည်ပေါက်ဖြစ်ပါသလဲ၊ ဂရန်သက်တမ်း၊ မြေခွန်ထမ်းဆောင်သူတို့အားလဲ မေးမြန်းခြင်းပြုနိုင်ပါသည်။ အဆိုပါမြေမှာ မြေပိုင်ရှင်ကိုယ်တိုင် ဆောက်လုပ်ခွင့်ပါမစ်တင်၍ ဆောက်လုပ်ခြင်း ရှိသလို၊ ကန်ထရိုက်မှ တဆင့်ဆောက်လုပ်ခွင့်ပါမစ်တင် ဆောက်လုပ်ခြင်းလဲရှိပါသည်။ အကျိုးတူစာချုပ် ချုပ်ဆိုမှုရှိပါက မိမိဝယ်ယူ မည့်အခန်းအား ပိုင်ဆိုင်ခွင့်ရှိသူမှာ မြေရှင်လား၊ ကန်ထရိုက်လား အခန်းခွဲဝေမှု တိတိကျကျ သိရှိရန်အတွက် ဝယ်ယူသူမှ အကျိုးတူစာချုပ် မိတ္တူတစ်စောင် တောင်းယူပါ။

မိမိဝယ်ယူသောအခန်းမှာ ကန်ထရိုက်အခန်းဖြစ်ပါကလဲ ကန်ထရိုက်ထံတွင်လဲ ဂရန်မိတ္တူတစ်စောင်ရှိသောကြောင့် အထောက်အထားအဖြစ် တောင်းယူထားနိုင်ပါသည်။ ထို့ပြင် စည်ပင်သာယာရေးကော်မတီ၊ ယာ /အုံဌာနမှ ထုတ်ပေးထားသော ဆောက်လုပ်ခွင့်ပါမစ်မိတ္တူအား မဖြစ်မနေ တောင်းယူရမည်ဖြစ်ပါသည်။ ဆောက်လုပ်ပြီးစီးပြီး တပါးတည်းလက်ရောက် ရယူနိုင်သော တိုက်ခန်းဖြစ်ပါက အဆောက်အအုံပြီးစီးကြောင်း အသိအမှတ်ပြုမှု လူနေထိုင်ခွင့်ပြုသော BCC (Building Complete Certificate) မိတ္တူတစ်စောင်ပါ တောင်းယူရန် လိုပါသည်။

ကြိုပွိုင့်တိုက်ခန်းများ ဝယ်ယူခြင်းနှင့် ဆောက်လုပ်ပြီး အဆောက်အဦ၏ တိုက်ခန်းဝယ်ယူခြင်းမှာ ကွာခြားမှုရှိပါသည်။ ကြိုပွိုင့်တိုက်ခန်းအား ဝယ်ယူသည့်အခါ ကန်ထရိုက်မှ မူလဆောက်လုပ်ထားသော အဆောက်အအုံများအား ပြီးစီးအောင် ဆောက်လုပ်အပ်နှံနိုင်ခြင်း ရှိမရှိ စုံစမ်းကြည့်ရန်လိုပြီး မူလအဆောက်အအုံများ၏ အရည်အသွေးကြည့်၍ ဝယ်ယူရန် ဆုံးဖြတ်ရမည်ဖြစ်ပါသည်။ ကြိုပွိုင့်စနစ်၏ ငွေပေးချေပုံမှာ အလွှာအလိုက် ရောင်းချသူမှ တစ်ထပ်ချင်းဆောက်လုပ်ပြီးစီးပြီးတိုင်း ဝယ်ယူသူမှ အကြိမ်အရေအတွက်ဖြင့် ငွေပေးချေရမည်ဖြစ်ပါသည်။ စာချုပ်ပါ သတ်မှတ်အချိန်အတိုင်း ရောင်းချသူမှ ဆောက်လုပ်မပြီးစီးလျှင် ဝယ်ယူသူမှ ကြိုပွိုင့်စာချုပ်အတိုင်း နစ်နာကြေးများ တောင်းဆိုခြင်းလဲ ပြုနိုင်ပါသည်။

ရောင်းသူ၏ မှတ်ပုံတင်၊ အိမ်ထောင်စုစာရင်း နှင့် ကုမ္ပဏီအနေဖြင့် ရောင်းချခြင်းဖြစ်ပါက ကုမ္ပဏီအစည်းအဝေးမှတ်တမ်း၊ ကုမ္ပဏီမှတ်ပုံတင်လက်မှတ်မိတ္တူတို့ တောင်းယူထားရန် လိုပါသည်။ တိုက်ခန်း အရောင်းအဝယ်စာချုပ်၌ မြေရှင်အသိအမှတ်ပြုမှု လက်မှတ်ရေးထိုးစေခြင်းမှာလဲ မပါမဖြစ် ပါဝင်သောကြောင့် ရောင်းသူဝယ်သူ ကြိုတင်ဆွေးနွေးထားသင့်ပါသည်။ မြေရှင်အသိအမှတ်ပြုမှုမှာ ရောင်းဈေးတန်ဖိုးအပေါ်တွင် ရာခိုင်နှုန်းဖြင့် ပေးချေမှုပြုကြပါသည်။

စာရွက်စာတမ်းများပြည့်စုံမှုရှိ၍ စရန်ပေးစာချုပ် ချုပ်ဆိုသည့်အခါတွင် လဲကန့်ကွက်ရှိမရှိ တိုက်ခန်းဝယ်ယူသူမှ သတင်းစာကြေညာမည်ဖြစ်ကြောင်း ကန့်ကွက်ပေါ်လာပါက ရောင်းသူ မှ တာဝန်ယူရန်နှင့် အရှုပ်အရှင်းများ ဖြေရှင်းဆောင်ရွက်မရပါက စရန်ငွေ(၂)ဆပေးရန် ရောင်းသူအား ဝယ်ယူသူ မှ ကတိပြုစေရမည်ဖြစ်ကြောင်း ဖြေဆိုရေးသားပေးလိုက်ပါသည်။

လူကြီးမင်းတို့ဝေဝါးနေတဲ့ ဥပဒေဆိုင်ရာမေးခွန်းများကို အိမ်ခြံမြေဥပဒေအကြံပေးရှေ့နေများမှ အပတ်စဉ် တနင်္ဂနွေနေ့ည ၇ နာရီတိုင်းမှာ မြန်ဆန်မှန်ကန်တိကျစွာဖြင့် ဖြေကြားပေးသွားမှာဖြစ်လို့.....မေးမြန်းတိုင်ပင်လိုသမျှ iMyanmarHouse Page Message Box နဲ့ အောက်ဖော်ပြပါ Link မှာ မေးမြန်းနိုင်ပါကြောင်း လက်တို့လိုက်ပါစေ။

မေးခွန်းပေးပို့ရန် Link ➡

https://www.imyanmarhouse.com/property-questions-answers-ask

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

iMyanmarHouse.com ၏ ဥပ​ဒေအကြံ​ပေး ပညာရှင်​အဖွဲ့ မှ အထူးရေးသားဖော်ပြသည်။

Credit: iMyanmarHouse.com