နယူးဇီလန်တွင် ကျေးရွာတစ်ခုလုံးကို ဒေါ်လာ ၂ ဒသမ ၉ သန်းမျှဖြင့် အရောင်းဈေးကွက်တင်ထားရာ ရော့ခ်ကြယ်ပွင့်များအပါအဝင် တစ်ကမ္ဘာလုံးမှ စိတ်ဝင်စားသူများပြားနေ

နယူးဇီလန်နိုင်ငံတွင် ကျေးရွာတစ်ခုလုံးကို ရောင်းချရန် အရောင်းဈေးကွက်ဝင်လာသည်။

Lake Waitaki ဟု အမည်ရသောကျေးရွာဖြစ်ပြီး ရွာအကျယ်အဝန်း ၁၄ ဟက်တာရှိသည်။

ရွာအတွင်း အိပ်ခန်း ၃ ခန်းပါ နေအိမ် ၈ လုံး၊ အိပ်ခန်း ၅ ခန်းပါ အိမ်တစ်လုံး၊ စီးပွားရေးလုပ်ငန်းသုံး မီးဖိုဆောင် ပါဝင်သော ကော်ဖီဆိုင်/ဘားနှင့် ကား ၁၀ စင်းဆန့် ဂိုဒေါင်တစ်လုံးတို့ ပါဝင်သည်။

ဈေးကွက်တင် အိမ်ခြံမြေအကျိုးဆောင်၏ ပြောကြားချက်အရ Waitaki ကျေးရွာကို ဒေါ်လာ ၂ ဒသမ ၉ သန်း ဈေးခေါ်ထားကြောင်း သိရသည်။

အနီးရှိ Waitaki ဆည်ကြီးဆောက်လုပ်ရာတွင် အလုပ်သမားများကို ထားရှိရန် ၁၉၃၀ ပြည့်လွန်ကာလများက ဆောက်လုပ်ခဲ့ခြင်းဖြစ်သည်။

Waitaki ကျေးရွာသည် Kurow မြို့မှ ၇ ကီလိုမီတာ၊ Oamaru မြို့မှ ၅၀ ကီလိုမီတာ အကွာတွင် တည်ရှိသည်။

အစည်ကားဆုံးအချိန်က ရွာတွင်နေထိုင်သူ ၂၀၀၀ ဦးကျော် ရှိခဲ့သည်။

အုတ်နေအိမ်များမှာ မန်နေဂျာများအတွက်ဖြစ်ပြီး ဓာတ်ပုံဟောင်းများတွင် တွေ့ရှိရမှုအရ အလုပ်သမားများ နေထိုင်ရန် သစ်သားတဲများ တန်းစီ တည်ရှိခဲ့ဖူးသည်။

ဆည်ကို အလိုအလျောက်စနစ်အသုံးပြုပြီးနောက်ပိုင်း သစ်သားတဲများကို အခြားနေရာသို့ ပြောင်းရွှေ့လိုက်သည်။

ယခုအခါ ထိုနေရာတွင် လူနေထိုင်သည့်အိမ် ၃ လုံးသာ ရှိတော့သည်။

ပင်မအိမ်တွင် ပိုင်ရှင်ဖြစ်သူနေထိုင်ပြီး ကျန်အိမ် ၂ လုံးတွင် မိသားစု ၂ ခု နေထိုင်သည်။ အဆိုပါ အိမ် ၂ လုံးမှာ ပြန်လည်မွမ်းမံပြင်ဆင်မှုများ ပြုလုပ်ထားသည်။

(အိပ်ခန်း ၃ ခန်းပါ နေအိမ် ၈ လုံးအနက် ၂ လုံးကို ပြန်လည်မွမ်းမံမှုများ ပြုလုပ်ထားသည်။ ဓာတ်ပုံ-Supplied)

အရောင်းဈေးကွက်တင်ပေးသည့်အကျိုးဆောင် Kelli Williams က ပြောသည်မှာ လက်ရှိပိုင်ရှင်တို့က ပျက်စီးယိုယွင်းနေသည့် Waitaki ကျေးရွာကို ၂၀၀၁ ခုနှစ်တွင် ဒေါ်လာ ၂၉၄၀၀၀ ဖြင့် ဝယ်ယူခဲ့ခြင်းဖြစ်သည်ဟု ဆိုသည်။

ဝယ်ယူပြီးနောက် ပြန်လည်မွမ်းမံမှုများစွာ ပြုလုပ်ခဲ့ပြီး ကော်ဖီဆိုင်တစ်ခု ဖွင့်လှစ်ခဲ့ကာ ဧည့်ဝန်ဆောင်မှု လုပ်ငန်းတစ်ခု လည်ပတ်ခဲ့သည်။

Waitaki ကျေးရွာကို ၂၀၁၆ ခုနှစ်က ပထမဆုံးအကြိမ် အရောင်းဈေးကွက်တင်ခဲ့ဖူးပြီး ၂၀၁၈ တွင် အရောင်းတင်သည့်ကြော်ငြာမှာ အလွန်ပျံ့နှံ့ကျော်ကြားခဲ့ဖူးသည်။

ကမ္ဘာတစ်ဝန်းမှ စိတ်ဝင်စားသူများစွာ ဆက်သွယ်မေးမြန်းခဲ့ရာ အမေရိကန်မှ ရော့ခ်ကြယ်ပွင့်တစ်ဦးပင် ပါဝင်ခဲ့သည်ဟု ဆိုသည်။

“ပျံ့နှံ့ကျော်ကြားသွားတာ အကြောင်းရှိပါတယ်။ ရွာတစ်ရွာလုံးကို ဝယ်လို့ရတဲ့ အခွင့်အလမ်းက ခဏခဏ မတွေ့နိုင်ဘူးလေ။ ကမ္ဘာလှည့်ခရီးသွားတွေရှုပ်တဲ့လမ်းကြောင်းပေါ်မှာ မရှိဘဲ ဒီလိုနိုင်ငံမျိုးရှိတာကြောင့် လူတွေစိတ်ဝင်စားကြတာပါ။ ကျွန်မ ပြောနိုင်တာကတော့ ဒါက တစ်ယောက်ယောက်အတွက်တော့ ကြီးမားတဲ့ အခွင့်အလမ်းကြီးပါ။ ကျွန်မလို အမြင်ရှိတဲ့သူရှိလိမ့်မယ်လို့ မျှော်လင့်ပါတယ်” ဟု Kelli က ပြောသည်။

(ရွာကလေးတွင် ကော်ဖီဆိုင်နှင့် အရက်ဘား၊ အိပ်ခန်း ၅ ခန်းပါ အိမ်တစ်လုံးတို့ ပါဝင်သည်။ ဓာတ်ပုံ-Supplied)

(ကော်ဖီဆိုင်ကို လက်ရှိပိုင်ရှင်တို့က ပြန်လည်မွမ်းမံမှုများ ပြုလုပ်ထားသည်။ ဓာတ်ပုံ-Supplied)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Entire New Zealand village for sale again - got a spare $2.9m? Photo Credit-Supplied