အမေရိကန်ပြည်၊ မြောက်ကာရိုလိုင်းနားတွင် မုန်တိုင်းဒဏ်သင့် ပြည်သူများအား ဆောက်လုပ်ရေး လုပ်ငန်းများ အခမဲ့ လုပ်ဆောင်ပေးသော ဆောက်လုပ်ရေးကန်ထရိုက်တာတစ်ဦးကို ဒေသခံတို့က ဘုရားသခင် စေလွှတ်လိုက်သူဟု တင်စားချီးကျူးလျက်ရှိ

အမေရိကန်ပြည်၊ မြောက်ကာရိုလိုင်းနားတွင် မုန်တိုင်းဒဏ်သင့် ပြည်သူများအား ဆောက်လုပ်ရေး လုပ်ငန်းများ အခမဲ့ လုပ်ဆောင်ပေးသော ဆောက်လုပ်ရေးကန်ထရိုက်တာတစ်ဦးကို ဒေသခံတို့က ဘုရားသခင် စေလွှတ်လိုက်သူဟု တင်စားချီးကျူးလျက်ရှိ

ဟယ်လင် ဟာရီကိန်းမုန်တိုင်းသည် အမေရိကန်ပြည်၊ မြောက်ကာရိုလိုင်းနားပြည်နယ်ကို လွန်ခဲ့သော ၃ လခန့်က ဝင်ရောက်တိုက်ခတ်ခဲ့ခြင်း ဖြစ်သည်။

ကမ္ဘာ့သတင်းများတွင် အခြားအကြောင်းအရာများဖြင့်သာ ဖုံးလွှမ်းနေပြီး မြောက်ကာရိုလိုင်းနားမှ တိတ်ဆိတ်သော တောင်ပေါ်မြို့လေးများ မုန်တိုင်းကြောင့် ရေလွှမ်းမိုးကာ အရာရာ ပျက်စီးသွားသည့် ဖြစ်ရပ်မှာမူ သတင်းများတွင် ရောက်မလာခဲ့။

သို့သော် အမျိုးသားတစ်ဦးမှာမူကာ အခြားသတင်းအကြောင်းအရာများအပေါ် အာရုံပြောင်းမသွား။

သူ၏ အာရုံတွင် မုန်တိုင်းကြောင့် ထိခိုက်ပျက်စီးနေသည့် မြို့လေး၏ အကြောင်းသာ အမြဲကြီးစိုးနေခဲ့သည်။

မြောက်ကာရိုလိုင်းနားမှ တစ်ခုသော ဒေသခံတို့က ထိုအမျိုးသားကို ‘ဘုရားသခင်စေလွှတ်လိုက်သူ’ ဟု တင်စားပြောဆို ချီးကျူးလျက်ရှိနေသည်။

ဂျိတ်ခ် ဂျာဗစ် (Jake Jarvis) အမည်ရှိ အမျိုးသားသည် ဆောက်လုပ်ရေးနှင့် အဆောက်အအုံများ ဖျက်သိမ်းပေးသည့် လုပ်ငန်းများ လုပ်ဆောင်သော Precision Grading အမည်ရှိ ကုမ္ပဏီကို တည်ထောင်လုပ်ကိုင်နေသူ ဖြစ်သည်။

မြောက်ကာရိုလိုင်းနားပြည်နယ်၊ ဟန်ဒါဆန်ခရိုင်တွင် တည်ရှိသော Bat Cave မြို့လေးသည် ဟယ်လင် ဟာရီကိန်းမုန်တိုင်းဒဏ်ကို အပြင်းအထန်ခံခဲ့ရသော မြို့လေးဖြစ်သည်။

ဂျိတ်ခ် ဂျာဗစ်သည် Bat Cave မြို့လေးတွင် ပျက်စီးနေသောအိမ်များ ပြန်လည်ဆောက်လုပ်ပေးခြင်း၊ တံတားများ ဆောက်လုပ်ပေးခြင်းတို့ အပါအဝင် ဆောက်လုပ်ရေးလုပ်ငန်းများကို ဒေါ်လာ ထောင်သောင်းချီ အကုန်အကျခံ ဆောက်လုပ်ပေးလျက်ရှိသည်။

(ဂျာဗစ်က ၎င်းဆောက်လုပ်ပေးခဲ့သော တံတား၏ ကြံ့ခိုင်မှုကို စစ်ဆေးနေပုံ။ ဓာတ်ပုံ-Jake Javis)

ဂျိတ်ခ် ဂျာဗစ်သည် မုန်တိုင်းစတင်တိုက်ခတ်သည့်နေ့ကတည်းက Bat Cave မြို့လေးတွင် ရှိနေခဲ့သည်။

“အပျက်အစီးတွေ နေ့တိုင်းတွေ့နေရတာ စိတ်မသက်သာစရာပါ။ ဒါတွေနဲ့ ကျွန်တော်ကိုယ်တိုင် ရင်ဆိုင်ခဲ့ရတာပါ” ဟု ဂျာဗစ်က ပြောသည်။

Bat Cave တွင် နေရာတိုင်း အပျက်အစီးများချည်း ပြည့်နှက်နေသည်။

“ပြီးခဲ့တဲ့ညက အေးစက် မှောင်မဲနေတဲ့ကြားက ကျွန်တော်တို့ ည ၉ နာရီအထိ အလုပ်လုပ်ခဲ့ကြပါတယ်။ ကျွန်တော်တို့မှာ မီးလုံးတွေပါလာပါတယ်။ ကျွန်တော်တို့ တတ်နိုင်သမျှ အစွမ်းကုန် ကြိုးစားကြပါတယ်” ဟု ဂျာဗစ်က ပြောသည်။

(မိသားစုတစ်ခုအတွက် ဂျာဗစ်က ဆောက်လုပ်ပေးခဲ့သည့် တံတား။ ဓာတ်ပုံ-Jake Javis)

လက်ရှိအားဖြင့် ဂျာဗစ်သည် ရေစီးနောက် ပါသွားသော Paula Master ဆိုသော အမျိုးသမီး၏နေအိမ်ကို ဖြိုဖျက်ပေးနေသည်။

အိမ်ကို တစ်စစီဖျက်သိမ်းကာ သူ၏အဖွဲ့က ရှင်းလင်းသယ်ဆောင်နေသည်။

နေအိမ်ဖျက်သိမ်းခြင်းမှာ စက်ယန္တယားကြီးများ အသုံးပြုရပြီး ဒေါ်လာ ထောင်ချီကုန်ကျသည့် လုပ်ငန်းဖြစ်သည်။

နေအိမ်ဖျက်သိမ်းမှုကို Paula က သမီးဖြစ်သူနှင့်အတူ စောင့်ကြည့််နေခဲ့သည်။

မိသားစုနှင့် အမှတ်တရများစွာရှိခဲ့သော အိမ်လေးမှာ ပျောက်ကွယ်သွားခဲ့ပြီ ဖြစ်သည်။

(နေအိမ်ဖျက်သိမ်းရာတွင် ပြန်လည်သိမ်းဆည်းပေးထားသော ပစ္စည်းတစ်ခုကို Paula ၏ သမီးဖြစ်သူက ပြုံးရွှင်စွာ လက်ခံရယူနေပုံ။ ဓာတ်ပုံ-WLOS Staff)

“ကျွန်မတို့မှာ ကံကောင်းထောက်မစွာနဲ့ ကယ်တင်မယ့် နတ်ဘုရားတွေ ပေါ်ပေါက်လာတယ်။ သူက အဲ့လို နတ်ဘုရားတစ်ပါးပါပဲ” ဟု Paula က ပြောသည်။

ဂျာဗစ်သည် သူ၏ စုဆောင်းငွေအပြင် အခြားသူတို့ လှူဒါန်းငွေများဖြင့် အခမဲ့ ဆောက်လုပ်ရေးလုပ်ငန်းများ လုပ်ဆောင်ပေးနေခြင်း ဖြစ်သည်။

(ဟယ်လင်မုန်တိုင်းကြီး တိုက်ခတ်ပြီးနောက်ပိုင်း ဂျာဗစ်က စက်ယန္တရားကြီးများသုံးကာ အခမဲ့ ကူညီပေးနေသည်။ ဓာတ်ပုံ-WLOS Staff)

(ဂျာဗစ်ဖောက်လုပ်ပေးထားသည့် လမ်းပေါ်တွင် အမျိုးသားတစ်ဦး ကားမောင်းဖြတ်သန်းနေပုံ။ ဓာတ်ပုံ-Jake Javis)

Bat Cave မြို့လေး၏ မီးသတ်ဌာနအကြီးအကဲ စတိဗ် ဖရီးမန်းက ပြောသည်မှာ ဂျာဗစ်သည် မိမိတို့ဒေသအတွက် တန်ဖိုးမဖြတ်နိုင်သူတစ်ဦးဖြစ်ကြောင်း ပြောသည်။

“သူက ဘုရားသခင် စေလွှတ်လိုက်တဲ့သူပါ” ဟု ဖရီးမန်းက ဆိုသည်။

(နေအိမ်တစ်လုံး ဖျက်သိမ်းပေးနေသည်ကို ဒေသခံတို့ ကြည့်ရှုနေပုံ။ ဓာတ်ပုံ-WLOS Staff)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Bat Cave community praises contractor for free construction work after Helene Photo Credit-WLOS Staff, Jake Javis