ဗဟုသုတ | Posted by ရွှေစင်ဝင်း
အမွေမမီမြေးဆိုသည်မှာ ဘိုးဘွားများရှေ့ ကွယ်လွန်သော သားသမီးမှ ကျန်ရှိနေသော မြေးကို အမွေမမှီ မြေးဟု ခေါ်ပါသည်။ ဘိုးဘွားများက အရင်ကွယ်လွန်ပြီး သားသမီးများမှ နောက်မှ ကွယ်လွန်ခြင်းဖြစ်ပါက ကျန် ရှိနေသော မြေးများမှာ အမွေမီမြေး ဖြစ်ပါသည်။
အမွေခွဲဝေစဉ် သားသမီးမှ သက်ရှိထင်ရှားရှိနေပါက မြေးများမှာ ဘိုးဘွားများ၏ အမွေပုံပစ္စည်းနှင့် တိုက်ရိုက်သက်ဆိုင်ခြင်းမရှိဘဲ သားသမီးနှင့်သာ သက်ဆိုင်ပါသည်။ အမွေ၏သဘောမှ သွေးနီးသူမှ သွေးဝေးသူအား ပယ်ခြင်းမျိုးဖြစ်ပါသည်။ အမွေမမီ မြေးအချင်းချင်း ခွဲဝေရသောအခါတွင် အမွေပုံပစ္စည်းမှာ အညီအမျှရရှိမည်ဖြစ် ပါသည်။
ဘိုးဘွားတို့၏ အမွေပစ္စည်းအပေါ်တွင် မြန်မာ့ဓလေ့ထုံးတမ်းဥပဒေအရ အမွေခွဲဝေမှုပြုရာ၌ အမွေမမီ မြေးမှာ သားကြီးသမီးကြီး ဩရသမှ မွေးဖွားထားသော မြေးဖြစ်ပါက ကျန်ရှိသည့် ဦးလေး၊ ဦးကြီး၊ ဒေါ်လေး၊ ဒေါ်ကြီးနှင့်အတူ အညီအမျှ ခွဲဝေရရှိပါသည်။ ( မစောငွေနှင့် မသိန်းရင်၊ ၁ အယ်ဘီအာ ၁၉၈ စီရင်ထုံး) သားကြီးသမီးကြီး ဩရသမဟုတ်သော အခြားသားသမီးများမှ မွေးဖွားသူ အမွေမမီမြေးဖြစ်ပါက မိမိ၏ မိဘများ သက်ရှိထင်ရှားရှိလျှင်ရရှိမည့် အမွေဝေစု၏ လေးပုံတစ်ပုံသာ ရရှိပါသည်။ အမွေမမီမြေးများမှာ ဝမ်းကွဲ ဦးကြီး၊ ဒေါ်ကြီးများနှင့်သာ အမွေခွဲဝေခြင်းဖြစ်ပါက မိမိအမိအဖရှိစဉ် ရရှိမည့် အမွေအတိုင်း အပြည့်အဝရရှိ သည်။(မောင်စိန်ရွှေနှင့် မောင်စိန်ကြီး၊၁၃ ရန်ကုန် ၆၉ ပီစီ) အဘိုးအဘွားနှစ်ဦးအနက် တစ်ဦးသေဆုံးပြီး ကျန်တစ်ဦးမှ နောက်အိမ်ထောင်ပြုလျှင် အမွေမမီမြေးများ အမွေတောင်းခံခြင်း မပြုနိုင်သေးကြောင်း ဖော်ပြထားသည်ကို ( ဦးထွန်းမြိုင်နှင့် ဦးဘထွန်း-၂ အယ်ဘီအာ ၂၉၂) တွင် တွေ့ရှိနိုင်ပါသည်။
အမွေမမီမြေးများမှ ၎င်းတို့မိဘများ သက်ရှိထင်ရှားရှိစဉ် ရရှိသည့်အခွင့်အရေးအတိုင်း အမွေကိုခံစားရ ခြင်းမျိုးမဟုတ်ဘဲ ၎င်းတို့ အမွေမမှီမြေးအဖြစ် ခံစားခွင့်ရနိုင်သည့်အတိုင်း အမွေဆက်ခံခြင်းမျိုးဖြစ်ပါသည်။ အမွေ မမီ မြေးများသည် ဘိုးဘွားများနှင့်အတူ မနေလဲ အမွေမမီမြေး၏ အခွင့်အရေးမှာ မဆုံးရှုံးကြောင်း ဥပဒေ ဗဟုသုတအနေဖြင့် ရေးသားဖော်ပြပေးလိုက်ပါသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
iMyanmarHouse.com ၏ ဥပဒေအကြံပေး ပညာရှင်အဖွဲ့ မှ အထူးရေးသားဖော်ပြသည်။
Credit: iMyanmarHouse.com
