ကမ္ဘာကျော် ကြယ်ပွင့်များစွာ နေထိုင်ရာ Hollywood Hills တွင် ကန်ဒေါ်လာ ၅ ဒသမ ၆၅ သန်းတန် စံအိမ်တစ်လုံး အရောင်းဈေးကွက်ဝင်နေ၊ ဝယ်ယူမည့်သူအနေဖြင့် လီယိုနာဒို ဒီကာပရီယိုနှင့် အိမ်နီးချင်း ဖြစ်ခွင့်ရမည့် အခွင့်အလမ်းရှိ

အမေရိကန်ပြည်တွင် Celebrity ကဲ့သို့ ကျော်ကြားသည့် အိမ်ခြံမြေ developer ဖြစ်သော House of Rolison မှ Amanda Leigh နှင့် Taylor Hahn တို့က လော့စ်အိန်ဂျလိမြို့၊ Hollywood Hills အရပ် ၊ Bird Street ရှိ စပိန်ဗိသုကာဟန်စံအိမ်တစ်လုံးကို ကန်ဒေါ်လာ ၅ ဒသမ ၆၅ သန်းဖြင့် အရောင်းဈေးကွက်တင်လာသည်။

Bird Street သည် လီယိုနာဒို ဒီကာပရီယို နေထိုင်သည့်စံအိမ်တည်ရှိရာ လမ်းလည်း ဖြစ်သည်။

လီယိုနာဒို ဒီကာပရီယိုသည် Bird လမ်းရှိ စံအိမ်တွင် ဘတ်စ်ကက်ဘောကွင်း ဆောက်လုပ်သည့် ကိစ္စနှင့် ပတ်သက်ပြီး အိမ်နီးချင်းနှင့် အမှုဖြစ်ခဲ့ဖူးသည်။

ဘတ်စ်ကက်ဘောကွင်းဆောက်လုပ်မှုကြောင့် မိမိတို့၏ နေအိမ် structure ထိခိုက်စေသည်ဟုဆိုကာ အိမ်နီးချင်း သက်ကြီးရွယ်အို စုံတွဲက တရားစွဲခဲ့ခြင်းဖြစ်သည်။

နောင်အခါတွင် တရားရုံးပြင်ပ၌ ဖြေရှင်းကာ ပြေလည်မှုရသွားသည်ဟုဆိုသည်။

ဒီကာပရီယိုက အဆိုပါအိမ်နီးချင်း၏ နေအိမ်ကို ဝယ်ယူလိုက်ကာ သူ၏အိမ်နှင့် ခြံဝန်းချင်း ပေါင်းစပ်လိုက်ရာ Bird လမ်းတွင် အကျယ်ဝန်းဆုံး ခြံဝန်းဖြစ်လာသည်။

(ဆက်စပ်သတင်း) လီယိုနာဒို ဒီကာပရီယိုက ဘတ်စ်ကက်ဘောကွင်း ခြံထဲဆောက်သောကြောင့် အမှုဖြစ်ခဲ့ရသော အိမ်နီးချင်း၏ နေအိမ်ကို ကန်ဒေါ်လာ ၁၀ ဒသမ ၅ သန်းဖြင့် ဝယ်ယူ

https://www.imyanmarhouse.com/news/read/1049963

၁၉၄၀ ပြည့်လွန်ကာလများက ဆောက်လုပ်ခဲ့သည့် စံအိမ်ဖြစ်ကာ House of Rolison က ယခုနှစ် မတ်လအတွင်း ဝယ်ယူခဲ့ပြီးနောက် ပြန်လည်ပြုပြင်မွမ်းမံမှုများ ပြုလုပ်ခဲ့သည်။

ပြန်လည်မွမ်းမံရာတွင် စံအိမ်၏ ၂၀ ရာစုအလယ်ပိုင်းလက်ရာများကို ထိန်းသိမ်းရင်း ခေတ်ပြိုင်ဗိသုကာဟန်ဖြင့် မွမ်းမံခဲ့ခြင်းဖြစ်သည်။

ပြန်လည်မွမ်းမံမှုတွင် အဖြူရောင်ဝက်သစ်ချသားနှင့် ခရမ်းရောင်သမ်းသော အီတလီထွက် စကျင်ကျောက်တို့ကို အသုံးပြုခဲ့သည်။

၁၉၄၆ ခုနှစ်တွင် ဆောက်လုပ်ခဲ့ပြီး စံအိမ်အကျယ် ၃၈၅၅ စတုရန်းပေရှိကာ အိပ်ခန်း ၄ ခန်းနှင့် ရေချိုးခန်း ၅ ခန်း ပါဝင်သည်။

(Amanda Leigh နှင့် Taylor Hahn ။ ဓာတ်ပုံ-GavinCater)

(ဧည့်ခန်းမှတဆင့် အိမ်နောက်ဘက် မြေယာအလှပြုပြင်ထားသည့် ခြံဝန်းသို့ ပေါက်သည်။ ဓာတ်ပုံ-Nils Timm)

(အိပ်ခန်း ၄ ခန်းအနက်မှ တစ်ခန်း။ ဓာတ်ပုံ-Nils Timm)

(မနက်ခင်းတွင် ကော်ဖီ သို့မဟုတ် အအေးသောက်နိုင်မည့် နေရာလေး။ ဓာတ်ပုံ-Nils Timm)

စံအိမ်တွင် သစ်သားနံရံဖြင့် အလှဆင်ထားသော အဝင်ခန်းမမှတဆင့် စားဖိုမှူးအဆင့်ကိုင်တွယ်နိုင်သော မီးဖိုဆောင်သို့ ရောက်ရှိမည်ဖြစ်ပြီး မီးဖိုဆောင်တွင် နံနက်စာ စားရန်နေရာပါဝင်သည်။

ကောင်းကင်အလင်းကောင်းစွာရသော ဧည့်ခန်းတွင် ဓာတ်ငွေ့သုံး မီးလင်းဖိုတစ်ခု ပါဝင်သည်။

အမိုးခုံး စင်္ကြန်လမ်းမှတဆင့် ညစာစားခန်းသို့ ရောက်ရှိမည်ဖြစ်ပြီး ညစာစားခန်းတွင် စိတ်ကြိုက်ပုံဖော်ထားသော အရက်ဘားတစ်ခု ပါဝင်သည်။

အပေါ်ထပ်တွင် ပင်မအိပ်ခန်းရှိသည်။ ပင်မအိပ်ခန်းတွင် သီးသန့်လသာဆောင်ပါဝင်ကာ တိုက်ကပ်ပန်းများဖြင့် အလှဆင်ထားပြီး ရေတံခွန်တစ်ခုကို အပေါ်စီးမှ စီးမိုးတွေ့မြင်ရမည် ဖြစ်သည်။

ပင်မအိပ်ခန်းတွင် ထုတ်တန်းဖော် မျက်နှာကြက်၊ ဓာတ်ငွေ့သုံး မီးလင်းဖို၊ နားနေ နေရာနှင့် Spa အသွင် ရေချိုးခန်းတို့ ပါဝင်သည်။

(ထုတ်တန်းဖော် မျက်နှာကြက်၊ နားနေ နေရာ၊ ဓာတ်ငွေ့သုံး မီးလင်းဖိုတို့ ပါဝင်သော ပင်မအိပ်ခန်း။ ဓာတ်ပုံ-Nils Timm)

(မီးလင်းဖိုပါသော ဧည့်ခန်း။ ဓာတ်ပုံ-Nils Timm)

(လိုက်ကာနွယ်များ အုပ်ဆိုင်းနေသည့် အိမ်နောက်ဘက် ရေကူးကန်။ ဓာတ်ပုံ-Nils Timm)

ဈေးကွက်တင်ပေးသူမှာ Netflix ၏ Reality show ဖြစ်သော Buying Beverly Hills မှ စတားတစ်ဦးဖြစ်သူ Farrah Brittany ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: You can be Leo DiCaprio’s neighbor for $5.65M in the Hollywood Hills (nypost)

Photo Credit- GavinCater,Nils Timm