လှိုင်သာယာတွင် ကျူးကျော်များကို မြေဧကသုံးရာ ကွက်လပ်တွင် အစားထိုးနေရာ ချထားပေးရန် ဆွေးနွေးနေ

လှိုင်သာယာမြို့နယ် အတွင်းရှိ ကျူးကျော်များ နေထိုင်ရန် မြို့နယ် မြေဧကသုံးရာ မြေကွက်လပ်တစ်ခုတွင် အစားထိုး နေရာချထားပေးရန် ဆွေးနွေးလျက် ရှိကြောင်း လှိုင်သာယာမြို့နယ် တိုင်း ဒေသကြီးလွှတ်တော်ကိုယ်စားလှယ် ဦးမြတ်မင်းသူက ပြောသည်။

''ကျူးကျာ်တွေနေထိုင်ဖို့ အစားထိုးနေရာချပေးဖို့ စီစဉ်နေတာဟုတ်တယ်။ ဝန်ကြီးချုပ်နဲ့တွေ့တဲ့အခါမှာ ဝန်ကြီးချုပ်ကလည်း အဓိကတော့ ညောင်ရွာက မီးလောင်သွားတဲ့ကျူးတွေနဲ့ လှိုင်သာယာတစ်မြို့ လုံးမှာရှိတဲ့ ကျူးတွေအတွက်ကို ဘယ်လိုဆောင်ရွက်မလဲဆိုတာ ဆွေးနွေးတာပေါ့။ ဧက ၃ဝဝ ပေါ်မှာ ဘယ်လို ဘယ်လိုတွေလုပ်မယ်ဆို တာ ဆွေးနွေးတုန်းအချက်ပဲ ရှိ သေးတယ်''ဟု ၎င်းက ဒီမိုကရေစီတူဒေး၏မေးမြန်းမှုကို မေ ၂ဝ ရက်တွင် ဖြေကြားသည်။

လှိုင်သာယာမြို့နယ် ရှိ မည်သည့်မြေနေရာဧကသုံးရာတွင် ကျူးကျော်များကို နေရာချပေးရန် အတွက် အသေးစိတ်အချက်လက်များကို တိုင်းဒေသကြီးအစိုးရအဖွဲ့နှင့် ထပ်မံဆွေးနွေးရန် လိုအပ် သေးကြောင်း ၎င်းကဆက်လက် ပြောသည်။

'' အသေးအစိတ်အချက်အလက်တွေက ဆက်လက်ဆွေးနွေးဖို့ လိုအပ်နေပါတယ်။ ဝန်ကြီး ချုပ်ကလည်း ဒီကိစ္စကို အကောင်အထည်ဖော်မယ်လို့ ပြောတယ်။ အစိုးရအဖွဲ့က စီစဉ်ဆောင်ရွက်နေတဲ့အပိုင်းရှိတယ်။ ဝန်ကြီးချုပ်တို့ ဘက်က စီစဉ်နေတာပေါ့။ အသေးစိတ်ဆွေးနွေးပြီးရင်တော့ ဘယ်နေရာတွေမှာ ဘယ်ချိန်တွေမှာလဲ ဆိုတာ ရက်သတ်မှတ်လို့ရမှာပေါ့ " ဟု တိုင်းဒေသကြီး လွှတ်တော် ကိုယ်စားလှယ် ဦးမြတ်မင်းသူက ပြောသည်။

ယင်းသို့စီစဉ်နေမှုမှာ မကြာမီကာလအတွင်း အကောင်အထည်ပေါ်လာနိုင်ကြောင်း သက်ဆိုင်ရာအစိုးရအဖွဲ့ တာဝန်ရှိသူများနှင့် ဆွေးနွေးစဉ် ပြောထားကြာင်း ၎င်းက ပြောသည်။

ရန်ကုန်တိုင်း ဒေသကြီးအတွင်းရှိ လှိုင်သာယာမြို့နယ်သည် ကျူးကျော်များ နေထိုင်လျက်ရှိပြီး အိမ်ထောင်စုပေါင်း ၃ဝဝဝဝ ကျော်ရှိကာ လူဦးရေ တစ်သိန်းကျော် နေထိုင်လျက်ရှိကြောင်း၊ ကျူးကျော် စမတ်ကတ် ထုတ်ပေးထားသူ ၃ဝဝဝဝ ကျော်ရှိကြောင်း သိရသည်။

လှိုင်သာယာမြို့နယ် ညောင်ရွာတွင် ပြီးခဲ့သည့် မတ် ၉ ရက် နှင့် ၂၁ ရက်နေ့တို့က မီးဘေးနှစ် ကြိမ်သင့်ခဲ့ပြီး ကျူးကျော်နေထိုင်သူများ အပါအဝင် အိမ်ထောင်စု ၁၉ဝ ကျော် နှင့် လူဦးရေ ၇ဝဝ ကျော် အိုးမဲအိမ်မဲ့ ဖြစ်ခဲ့ရသည်။

Credit: Yangon Media Group