မှတ်ပုံတင်စာရင်းမှ ပယ်ဖျက်ခံရသည့် ကုမ္ပဏီများ မူလအမည်ဖြင့် မှတ်ပုံတင်ခွင့်မပြု

မှတ်ပုံတင်စာရင်းမှ ပယ်ဖျက်ခံရသည့် ကုမ္ပဏီများမှာ ပြန်လည်မှတ်ပုံတင်မည်ဆိုပါက မူလနဂိုရှိရင်းစွဲအမည်ဖြင့် မှတ်ပုံတင်ခွင့်ပြုမည်မဟုတ်ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနမှ ညွှန်ကြားရေးမှူး ဦးမျိုးမင်းက ပြောကြားသည်။

အဆိုပါ စာရင်းပယ်ဖျက်ခံရသည့် ကုမ္ပဏီများသည် တရားရုံးဆိုင်ရာ ကိစ္စရပ်များပေါ်ပေါက်လာပါက အသုံးပြုနိုင်ရန် ကွန်ပျုတာစနစ်ထဲတွင် ၂ နှစ်ခန့် သိမ်းဆည်းထားမည်ဖြစ်ကြောင်း ၎င်းက ဆိုသည်။

“မှတ်ပုံတင်အသစ် ပြန်လုပ်ရင် ဆင်တူယိုးမား နာမည်တစ်ခုကို သုံးရပါမယ်”ဟု ၎င်းက ပြောဆိုသည်။

ဇန်နဝါရီလကုန်နောက်ပိုင်း ပြန်လည်မှတ်ပုံတင်မည်ဆိုပါက ခိုင်လုံသောအကြောင်းပြချက်ရှိမှသာ ဒဏ်ကြေးပေးဆောင်၍ မှတ်ပုံတင်ခွင့်ရမည်ဖြစ်ပြီး အကြောင်းပြချက်မပေးနိုင်ပါက မှတ်ပုံတင်အသစ် တင်ရမည်ဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနထံမှ သိရသည်။

လက်ရှိအချိန်တွင် MyCO စနစ်ဖြင့် မှတ်ပုံတင်ရန် ကျန်ရှိနေသော ကုမ္ပဏီပေါင်း တစ်သောင်းခွဲနီးပါးအထိရှိပြီး ယင်းကုမ္ပဏီများကို စာရင်းမှ ပယ်ဖျက်သွားမည်ဖြစ်သည်။

၂၀၁၇ ခုနှစ်တွင် အတည်ပြုခဲ့သည့် မြန်မာနိုင်ငံ ကုမ္ပဏီအက်ဥပဒေသစ်အရ တစ်နိုင်ငံလုံးရှိ မှတ်ပုံတင်ပြီးသား ကုမ္ပဏီများသည် ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနတွင် အီလက်ထရွန်နစ်မှတ်ပုံတင်စနစ် (MyCO) ဖြင့် ၂၀၁၈ ခုနှစ် ဩဂုတ်လ ၁ ရက်နေ့မှ ၂၀၁၉ ခုနှစ် ဇန်နဝါရီ ၃၁ ရက်နေ့အတွင်း ပြန်လည်မှတ်ပုံတင်ရမည်ဖြစ်သည်။

MyCO စနစ်ဖြင့် မှတ်ပုံတင်ထားသည့် ကုမ္ပဏီပေါင်း လေးသောင်းခုနစ်ထောင်ကျော်ရှိပြီဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနထံမှ သိရသည်။

Credit: The Voice